AZƏRBAYCAN PREZİDENTİ İLHAM ƏLİYEVİNÇIXIŞI
Əziz bacılar və qardaşlar!
Sizi ürəkdən salamlayıram. Bu gün gözəl bayramdır - Milli Qurtuluş bayramıdır. Biz bu bayramı birlikdə qeyd edirik.
Mən bu bayramı bu gün səhər Gürcüstanda yaşayan soydaşlarımızla birlikdə qeyd etməyə başladım. Mən çox şadam ki, orada yaşayan azərbaycanlılarla görüşüm olubdur və bu görüş çox gözəl keçibdir. Ondan sonra bu bayramı Qazaxda, Ağstafada, Tovuzda, indi də Şəmkirdə sizinlə birlikdə keçirirəm. Doğrudan da, bu, böyük bayramdır. Xalqımızın ümummilli lideri Heydər Əliyev on bir il bundan əvvəl xalqın tələbi ilə Azərbaycana hakimiyyətə qayıtmışdır. Məhz o dövrdən sonra Azərbaycan bütün sahələrdə uğurla inkişaf etməyə başlamışdır. Azərbaycanda demokratik cəmiyyət yaranmışdır. Azərbaycan dünya birliyinə layiqli üzv olmuşdur. Ümummilli liderimiz, Ali baş komandan Heydər Əliyevin bilavasitə rəhbərliyi nəticəsində Azərbaycanda güclü ordu yaradılmışdır. Bu ordu qarşıda duran bütün vəzifələri həll etməyə qadirdir.
Neft strategiyası uğurla davam edir. Bu gün Bakı-Tbilisi-Ceyhan neft kəməri inşa edilir. Demək olar ki, işlərin böyük əksəriyyəti görülübdür. Bu kəmər istismara veriləndən sonra Azərbaycana böyük həcmdə maliyyə axını gələcəkdir. Bu bizə imkan verəcək ki, ölkəmizi hərtərəfli inkişaf etdirək, mövcud olan sosial problemləri həll edək. Ümumiyyətlə, Azərbaycanı gücləndirək, Azərbaycanı qüdrətli dövlətə çevirək.
Bu 10-11 il ərzində bütün sahələrdə böyük işlər görülübdür. İndi Azərbaycan öz inkişaf dövrünü yaşayır. Azərbaycanda regional inkişaf Proqramı həyata keçirilir və mən çox şadam ki, qısa müddət ərzində böyük həcmdə iş yerləri açılıbdır. İş yerlərinin açılması bizim prioritet məsələmizdir. Bütün bölgələrdə, hər bir qəsəbədə, kənddə insanlar gərək işlə təmin olunsunlar. İşsizlik aradan qaldırılmalıdır. Yoxsulluq aradan qaldırılmalıdır. Mən əminəm ki, biz qarşımızda duran bütün məqsədlərə çatacağıq.
Mən seçkilərdən əvvəl Şəmkirdə olmuşdum, şəmkirlilərlə görüşmüşdüm. Mən o görüşü çox yaxşı xatırlayıram. O gözəl sözləri, mənə olan ümidləri xatırlayıram. Mən çalışıram ki, bütün ümidləri doğruldum. Çalışıram ki, öz fəaliyyətimlə, əməyimlə doğma xalqımıza ləyaqətlə xidmət edim.
Əziz şəmkirlilər, mən sizi bir daha ürəkdən salamlayıram. Siz bütün dövrlərdə Azərbaycanın dövlətçiliyinə xidmət etmisiniz. Azərbaycanımızın, dövlətimizin müstəqilliyini gücləndirmisiniz. Azərbaycanın ən çətin dövrlərində şəmkirlilər Azərbaycan dövlətçiliyinə dayaq, arxa olmuşlar. Bunu bütün Azərbaycan bilməlidir. Burada yaşayan insanlar çox zəhmətkeş, əməksevər, vətənpərvər insanlardır. Mən sizə öz dərin hörmətimi, dərin məhəbbətimi bildirirəm.
Mən indi bu şəhərdən keçərkən gördüm ki, müxtəlif yerlərdə tikinti gedir. Bu, uğurun ən başlıca şərtidir, amilidir. Harada tikinti, yaradıcılıq, quruculuq, abadlıq işləri gedirsə, o bölgə inkişaf edir. Bu məni çox sevindirir. Çox istəyirəm ki, gözəl, böyük zövqlə yeni binalar tikilsin, müəssisələr tikilsin. Belə idman obyektləri tikilsin.
Bilirsiniz ki, mən idmana artıq yeddi ildir ki, rəhbərlik edirəm və çox şadam ki, idman sürətlə inkişaf edir. Son dövrdə futbolda da dönüş yaranıbdır. Azərbaycanın milli futbol komandası artıq çox uğurla çıxış edir, qələbələr qazanır. Çox güclü komandalarla yüksək səviyyədə oynayır. Bu, onu göstərir ki, iş olan yerdə nəticə də olur. Əminəm ki, bu gün burada oynayacaq futbolçular da, – mən onların hamısına qələbə arzulayıram, – Azərbaycanımızı, doğma Vətənimizi beynəlxalq yarışlarda ləyaqətlə təmsil edəcəklər.
Sizi bu bayram münasibətilə bir daha ürəkdən təbrik edirəm. Sizə cansağlığı, xoşbəxtlik, səadət arzulayıram.
Sağ olun.
X X X
Şəmkir şəhər sakini Prezident İlham Əliyevə müraciətlə dedi:
- Əziz Prezidentimiz İlham Əliyev!
Əziz Mehriban xanım!
Rayonumuza xoş gəlmisiniz! Mən Sizinlə fəxr edirəm. Ona görə ki, 34 il ərzində respublikaya quruculuq, abadlıq, tikinti işlərini sizin qayınatanız, İlham müəllimin atası bəxş etmişdir. Mən fəxr edirəm ona görə ki, onun yurdunda belə oğul böyüyür, belə lider böyüyür. “Zər qədrini zərgər bilər” deyirlər. Yəni bizim qədrimizi o bilirdi, onun layiqli davamçısı bilir. Başqa heç kəs bizim qədrimizi bilə bilməz. Mən Sizə uzun ömür, cansağlığı, tutduğunuz bu yüksək vəzifədə böyük nailiyyətlər, uğurlar arzulayıram. Biz Sizinlə fəxr edirik. İngilis dilində xaricdə danışanda hamımız deyirik ki, Allah, sən onu bədnəzərdən qoru. O, bizim üçün, gələcəyimiz üçün, bu günümüz, sabahımız üçün lazımdır. Atanız respublikamızın bugünü, gələcəyi, sabahı üçün ömrünü şam kimi əritdi. Allahdan diləyim odur ki, Siz daim yaşayıb-yaradasınız. Sizinlə fəxr edirik. Bu gün Şəmkirə ikinci bir bayram bəxş etdiniz.
Allah Sizi həmişə bayramlı, toylu-büsatlı eləsin!
X X X
Azərbaycan Prezidenti İlham Əliyev iyunun 15-də axşamüstü Gəncə şəhərinə gəldi.
(Dövlətimizin başçısının Gəncəyə səfəri barədə geniş hesabat qəzetin növbəti nömrəsində dərc olunacaqdır).
Bölmənin digər xəbərləri
