Mən sizin hamınızı ürəkdən salamlayıram və seçdiyiniz şərəfli peşənizdə sizə uğurlar arzulayıram.

Dünən bütün Azərbaycan xalqı və onun Silahlı Qüvvələri Azərbaycanın dövlət bayramını – Milli Qurtuluş gününü qeyd edirdi. Bu bayram Azərbaycanda geniş qeyd olunurdu. Eyni zamanda, başqa ölkələrdə də qeyd edilirdi. Mən bu bayramı, ilk növbədə, dünən səhər Gürcüstanda olarkən, orada yaşayan soydaşlarımızla birlikdə qeyd etdim. Ondan sonra Azərbaycanın müxtəlif rayonlarında oldum. Qazax, Ağstafa, Tovuz, Şəmkir rayonlarında oldum və bu bayramı yerli əhali ilə birlikdə qeyd etdik.

Həqiqətən, iyunun 15-i Azərbaycan tarixində çox önəmli yer tutur. Məhz 1993-cü il iyunun 15-də ümummilli liderimiz Heydər Əliyev xalqın tələbi ilə Azərbaycana rəhbərliyə qayıtmışdır. Azərbaycan o vaxt çox çətin dövr yaşayırdı.

Azərbaycan, demək olar ki, uçurum kənarında idi, ölkədə xaos, anarxiya, hərc-mərclik, özbaşınalıq hökm sürürdü. İqtisadiyyat böhran içində idi. İldən-ilə iqtisadi tənəzzül müşahidə olunurdu və 1993-cü ildə artıq kritik həddə çatmışdı. Siyasi, iqtisadi, hərbi böhran Azərbaycanı çox çətin vəziyyətə salmışdı. Əgər 1993-cü ilin iyun ayında xalq öz müdrikliyini göstərməsəydi, öz liderinə üz tutmasaydı və Heydər Əliyevi hakimiyyətə dəvət etməsəydi, ölkəmizin gələcəyi sual altında olardı. Xalqımızın lideri bu ağır yükü öz üzərinə götürdü. Ölkəmizdə sabitlik yarandı, qeyri-qanuni silahlı birləşmələr tərksilah edildi, asayiş bərpa olundu, qardaş qırğınının qarşısı alındı, müharibə dayandırıldı. Azərbaycan inkişaf etməyə başladı.
Son 11 il ərzində ölkəmiz bütün sahələrdə böyük uğurlara nail olmuşdur. Bütün bu uğurlar xalqımızın ümummilli lideri Heydər Əliyevin adı ilə bağlıdır. Azərbaycan beynəlxalq təcriddən çıxa bildi. Ölkəmiz beynəlxalq aləmin çox dəyərli üzvünə çevrildi. Azərbaycanın beynəlxalq nüfuzu ildən-ilə artır. Bu gün beynəlxalq təşkilatlarda bizə göstərilən münasibət, diqqət bir daha göstərir ki, 1993-cü ildə Heydər Əliyev tərəfindən seçilən siyasi strategiya böyük uğurlar gətirmişdir.
Azərbaycan iqtisadi cəhətdən gücləndi, ölkəmiz böyük iqtisadi layihələr həyata keçirməyə başladı. Bunun nəticəsində bütün qonşu dövlətlərlə müqayisədə deyə bilərik ki, Azərbaycan liderliyini saxlayır, əldən vermir və bunu daha da gücləndirir. Bu, təkcə bizim deyil, bütün beynəlxalq təşkilatların rəyidir. Azərbaycana gələn xarici qonaqların rəyidir. Ölkəmiz ildən-ilə gözəlləşir, güclənir, abadlaşır. Azərbaycanda sosial problemlər öz həllini tapır. Bu istiqamətdə hökumət böyük işlər görür. Ən çətin vəziyyətdə yaşayan, Ermənistan təcavüzündən əziyyət çəkən soydaşlarımız - qaçqınlar, köçkünlər böyük diqqətlə əhatə olunurlar. Onların çoxlu problemləri vardır, amma, biz çalışırıq ki, bunları aradan qaldıraq. Bilirsiniz ki, xalqımızın ümummilli lideri Heydər Əliyevin təşəbbüsü ilə qaçqınlara, köçkünlərə yardımlar edilir, onlar üçün yeni müasir qəsəbələr, şəhərciklər salınırdı. Bu siyasət davam edir.
Son on il Azərbaycana bütün sahələrdə böyük xeyirlər gətiribdir. Bizim vəzifəmiz, bizim məqsədimiz bu uğurlu meylləri inkişaf etdirmək, Azərbaycanı hərtərəfli inkişaf etdirmək, gücləndirməkdir. Heydər Əliyevin neft strategiyası Azərbaycana artıq böyük faydalar verdi, xeyirlər gətirdi. Bunun hesabına Azərbaycanın iqtisadi potensialı güclənir və heç kəs üçün sirr deyil ki, iqtisadi potensial gücləndikcə ölkənin ordu potensialı da güclənir. Hər şey iqtisadiyyatdan asılıdır, hər şey iqtisadi durumdan asılıdır. Ona görə bizim başlıca vəzifəmiz iqtisadiyyatımızı şaxələndirmək, hərtərəfli inkişaf etdirmək, Azərbaycanı daha da gücləndirməkdir. Bu istiqamətdə son aylar ərzində çox önəmli addımlar atılmışdır.
Qəbul edilmiş sosial-iqtisadi və regional inkişaf proqramları uğurla həyata keçirilir. Mən çox şadam ki, ilk növbədə, bu, regionlarda özünü daha açıq-aydın göstərir, büruzə verir. Bizim məqsədimiz də məhz budur, Azərbaycanın hər bir bölgəsini inkişaf etdirməkdir. Etdiyim səfərlər çərçivəsində bir daha əmin oluram ki, Azərbaycana böyük hörmət var, Azərbaycanla dünyada hesablaşırlar, Azərbaycana hörmət edirlər, beynəlxalq aləmdə Azərbaycanın nüfuzu artır. Eyni zamanda, ölkə daxilində də bu istiqamətdə, iqtisadi inkişaf istiqamətində böyük işlər görülür, bölgələrdə yeni iş yerləri açılır. Bilirsiniz ki, iş yerləri açılması bizim siyasətimizin əsas istiqamətlərindən biridir. Bu istiqamətdə artıq böyük işlər görülübdür.
Ordu quruculuğunda böyük işlər görülübdür. Heç kəs üçün sirr deyil ki, Heydər Əliyev 1993-cü ildə hakimiyyətə gələndə Azərbaycanda, demək olar ki, ordu yox idi. Ayrı-ayrı silahlı birləşmələr vardı və onların bir hissəsi hansısa siyasi qüvvələrin təsiri altında idi, bəziləri isə fərdi qaydada əməliyyatlarda iştirak edirdi. Ordu quruculuğu və bu istiqamətdə əldə edilmiş uğurlar ölkəmizə imkan verib ki, bu gün Azərbaycanın nizamlı, güclü ordusu var. Orduda peşəkarlıq artır, ordunun maddi-texniki bazası güclənir və biz böyük planlar həyata keçirəcəyik. Ordumuzun maddi-texniki bazası bundan sonra daha da möhkəmlənəcəkdir. Azərbaycanın buna imkanları var və orduya diqqət, orduya qayğı bizim əsas məsələmizdir.
Mən Azərbaycanın qarşısında heç bir ciddi problem görmürəm. Qeyd etdiyim kimi, ölkəmiz beynəlxalq aləmdə nüfuz qazanıb, beynəlxalq təşkilatların dəyərli üzvünə çevrilibdir. Bütün etdiyim xarici səfərlər məni bir daha əmin etdi ki, ölkəmiz düz yoldadır. Xarici siyasətimiz düz istiqamətdə qurulub, aparılır. İqtisadi baxımdan ölkəmiz nəinki bölgədə, MDB məkanında və bəzi Şərqi Avropa ölkələri ilə müqayisədə daha da inamla, daha da sürətlə inkişaf edir. Bütün beynəlxalq maliyyə qurumları bunu görür və təsdiqləyir. Bu baxımdan da Azərbaycanın qarşısında heç bir problem yoxdur. Uğurlu neft strategiyasının tərkib hissəsi kimi Bakı-Tbilisi-Ceyhan neft kəmərinin, Bakı-Tbilisi-Ərzurum qaz kəmərinin işə düşməsi nəticəsində Azərbaycana böyük həcmdə maliyyə resursu daxil olacaqdır. Bu da öz növbəsində imkan verəcəkdir ki, ölkəmiz hərtərəfli inkişaf etsin. Azərbaycanda sosial problemlər həll olunur, əmək haqları, pensiyalar artırılır, bu istiqamətdə daha da ciddi addımlar atılacaqdır. O cümlədən orduda qulluq edən şəxslərin həyat səviyyəsinin yaxşılaşdırılması istiqamətində çox önəmli addımlar atılacaqdır. Bu, bizim strateji hədəfimizdir. Ölkəmiz bazar iqtisadiyyatı prinsipləri əsasında inkişaf edir, iqtisadiyyatımız liberal iqtisadiyyatdır, amma eyni zamanda, sosial problemlərə böyük diqqət göstərilir. Azərbaycanda sosial ədalət prinsipləri qorunur və ən çətin, ən ağır vəziyyətdə yaşayan insanlara bundan sonra da kömək göstəriləcəkdir. Bilirsiniz ki, yoxsulluqla, işsizliklə mübarizə fəal gedir və mən əminəm ki, gələn 5 il ərzində bu məsələ öz müsbət həllini tapacaqdır.
Bir sözlə, ölkəmiz qarşısında heç bir ciddi məsələ yoxdur, qonşularımızla ikitərəfli münasibətlər də çox yüksək səviyyədə qurulubdur. Azərbaycanın qarşısında bir məsələ var – bu da Ermənistan-Azərbaycan, Dağlıq Qarabağ münaqişəsinin həllidir. Ermənistanın təcavüzü nəticəsində torpaqlarımız işğal altındadır. Bir milyon qaçqın, köçkünümüz var. Siz bilirsiniz ki, Azərbaycan hökuməti bu məsələni sülh yolu ilə həll etmək istəyir. Amma, əfsuslar olsun ki, bu günə qədər aparılmış danışıqlar heç bir nəticə vermir. Bu məsələ ilə bilavasitə məşğul olan, vasitəçilik missiyasını həyata keçirən ATƏT-in Minsk qrupunun fəaliyyəti, təəssüflər olsun ki, heç bir səmərə vermir. Biz bir daha qeyd etmək istəyirik ki, sülh danışıqlarının aparılmasına tərəfdarıq. Amma, əlbəttə ki, bunun da bir həddi olmalıdır. Azərbaycan xalqının səbri tükənməz deyildir. Mən bunu dəfələrlə, o cümlədən beynəlxalq tribunalardan bəyan etmişəm ki, Azərbaycan heç vaxt torpaqlarının itirilməsi ilə barışmayacaq, nəyin bahasına olursa-olsun, öz doğma torpaqlarını azad edəcəkdir. Bunu etmək üçün cəmiyyətdə səfərbərlik olmalıdır. Gənclərimiz, əsgərlərimiz vətənpərvərlik ruhunda tərbiyə edilməlidirlər. Ölkəmiz hərtərəfli inkişaf etmiş ölkəyə çevrilməlidir. Bizim iqtisadi potensialımız güclənməlidir. Sizə deyə bilərəm ki, bu gün Azərbaycanın iqtisadi potensialı Ermənistanın iqtisadi potensialından bir neçə dəfə üstündür. Azərbaycanın dövlət büdcəsi Ermənistandakından 3 dəfə böyükdür və ümid edirəm ki, 2005-ci ildə bu, 4 dəfə çox olacaqdır. Azərbaycanda gördüyümüz işlər, aparılan iqtisadi islahatlar nəticəsində bizim iqtisadi potensialımız daha da güclənəcəkdir. Orduya hər il ayrılan xərclər artır. Bu siyasət bundan sonra da davam etdiriləcəkdir. Mən bəyan edirəm ki, orduya xərclənən vəsait bundan sonra artacaqdır, biz ordumuzun maddi-texniki bazasını daha da gücləndirməliyik. Bütün bunları etmək üçün bizdə imkanlar var, iqtisadi imkanlar yaranır, güclənir. Siyasi iradə var, Azərbaycanda sabitlik var. Ötən ilin oktyabr ayında keçirilmiş prezident seçkilərində Azərbaycan xalqı öz seçimini birmənalı şəkildə ifadə edibdir. Azərbaycan xalqı Heydər Əliyev siyasətinə səs veribdir. Bu gün Azərbaycan xalqının dəstəyi mənim üçün çox önəmlidir. Bir Prezident kimi bir Ali baş komandan kimi, mən bu dəstəyə güvənirəm, arxalanıram və əminəm ki, bizim cəmiyyətimiz, hər bir vətəndaşımız bu istiqamətdə daha da fəal rol oynayacaqdır.
Siz bilirsiniz ki, xalqımızın ümummilli lideri Heydər Əliyevin keçmişdə, hələ ötən əsrin 70-ci illərində də orduya diqqəti böyük idi. Baxmayaraq ki, o vaxt Azərbaycan müstəqil dövlət deyildi, müttəfiq respublika idi, amma məhz Heydər Əliyevin təşəbbüsü ilə Bakıda Naxçıvanski adına ixtisaslaşdırılmış məktəb yaradılmışdı.
Demək olar ki, bu, çox nadir bir hadisə idi. Çünki digər respublikalarda belə məktəblər yox idi. Mərkəzi hökumət, Sovet İttifaqı Kommunist Partiyası bu məsələyə o qədər də müsbət baxmırdı. Heydər Əliyev buna böyük çətinliklə müvəffəq olmuşdu. Naxçıvanski adına məktəb bu gün də Azərbaycana xidmət edir. Yəqin ki, xalqımızın lideri o vaxt da Azərbaycanı müstəqil dövlət kimi görürdü. Bu gün ordumuzda xidmət edən zabitlərin bir çoxu Naxçıvanski adına məktəbin məzunlarıdır.
Xatırlayırsınız ki, məhz Naxçıvanski adına məktəbin 30 illiyi qeyd edilərkən, xalqımızın ümummilli lideri əsgərlər, zabitlər, generallar qarşısında çıxış edərkən onun səhhətində problemlər yaranmışdı. O, iki dəfə öz nitqini dayandırmışdır. Amma bütün buna ciddi baxmayaraq o, iki dəfə kürsüyə qayıtmış, öz nitqini başa çatdırmışdı. Budur, bizim hamımız üçün nümunə, budur, bizim hamımız üçün örnək. Bu fədakarlıq, bu cəsarət, bu siyasi iradə bizim hamımız üçün böyük örnək, nümunə olmalıdır. Biz hamımız çalışmalıyıq ki, xalqımızın ümummilli lideri Heydər Əliyevə oxşayaq, onun yolu ilə gedək. Azərbaycan xalqı bu istiqamətdə böyük işlər görür, bu siyasəti birmənalı şəkildə dəstəkləyir.
Mən əminəm ki, gələn illərdə Azərbaycan özünün ən ağrılı, ən çətin problemini Ermənistan-Azərbaycan, Dağlıq Qarabağ münaqişəsini həll edəcəkdir. Bu münaqişə yalnız və yalnız beynəlxalq hüquq normaları əsasında öz həllini tapa bilər. Yalnız və yalnız Azərbaycanın ərazi bütövlüyü çərçivəsində öz həllini tapa bilər. Bəzən səslər eşidilir ki, bu məsələdə kompromis olmalıdır. Azərbaycan heç bir dövlətin torpağını zəbt etməyibdir. Özünə məxsus olmayan heç bir bölgəni işğal etməyib ki, hansısa kompromisə getsin. Bu məsələdə, torpaq məsələsində heç bir kompromisdən söhbət gedə bilməz. Bunu başqa tərəf nə qədər tez anlasa, o qədər də yaxşı olacaqdır. Mən əminəm ki, biz bu məsələni həll edəcəyik. Azərbaycan güclü dövlətdir, inkişaf edir, bu, bizə məsələni həll etməyə imkan verəcəkdir.
Əziz əsgərlər, zabitlər, generallar!Siz Gəncə şəhərində xidmət edirsiniz. Gəncə Azərbaycanın qədim şəhəridir, gözəl diyarıdır. Azərbaycanın ikinci şəhəridir və Gəncəyə böyük diqqət, qayğı göstərilir. Son illər ərzində Gəncədə aparılan quruculuq, abadlıq işləri hamımızı çox sevindirir. Mən keçmişdə də Gəncədə dəfələrlə olmuşam. Prezident seçkiləri ərəfəsində, ondan əvvəlki dövrlərdə də olmuşam. Çox istəyirdim ki, Gəncədə quruculuq, abadlıq işləri getsin. Sizə deyə bilərəm ki, uzun fasilədən sonra Gəncədə ilk böyük tikili məhz Milli Olimpiya Komitəsi tərəfindən inşa edilmişdir. 2002-ci ildə Milli Olimpiya Komitəsi Gəncədə böyük idman kompleksini tikib istifadəyə vermişdir. Bu, Milli Olimpiya Komitəsinin Gəncəyə etdiyi hədiyyə idi. Bu addımla biz bütün digər qurumlara da işarə etdik ki, Gəncəyə diqqət göstərilməlidir. Burada yaşayan insanlara diqqət göstərilməlidir. Bu gün çox şadam, çox sevinirəm, görürəm ki, Gəncə öz simasını dəyişibdir. Burada yeni yollar salınır, yeni müəssisələr tikilir, dayanmış müəssisələr öz fəaliyyətini bərpa edir. Sosial infrastruktur qurulur, digər məsələlər öz həllini tapır. Gəncə hava limanının yenidən qurulması üçün önəmli addımlar atılmışdır. Gəncə hərtərəfli inkişaf etməlidir. Azərbaycanın ikinci şəhəri daha da gözəlləşməlidir. Mən bilirəm ki, siz - burada xidmət edən əsgərlər Gəncəni sevirsiniz. Bu, gözəl şəhərdir. Burada yaşayan insanlar da Azərbaycan cəmiyyətinin dəyərli üzvləridir. Azərbaycan dövlətçiliyinə gəncəlilərin töhfəsi böyük olmuşdur. Mən sizi bir daha ürəkdən salamlayıram. Sizə seçdiyiniz şərəfli peşənizdə uğurlar arzu edirəm. Vətən uğrunda xidmətlərinizdə uğurlar arzulayıram.Sağ olun!

X X X

Sonra Ali baş komandan xidmətdə fərqlənən hərbçilərin bir qrupuna qiymətli hədiyyələr təqdim etdi.
Prezident İlham Əliyev hərbi hissə ilə tanış oldu, texnikaya, əsgərlərin nümunəvi çıxışlarına baxdı, şəraitlə maraqlandı, yeməkxanada əsgərlərlə birlikdə nahar etdi. Ali baş komandan hərbi hissədə görülən işləri yüksək qiymətləndirdi.

X X X

Azərbaycan Prezidenti İlham Əliyev iyunun 16-da axşamüstü Bakıya qayıtdı.