AZƏRTAC xəbər verir ki, avqustun 28-də Prezident İlham Əliyev Sumqayıtda yenidən qurulmuş Nəsimi adına mədəniyyət və istirahət parkında olmuşdur.

Buradakı “Göyərçin” abidəsi və park dövlətimizin başçısının tapşırığı ilə yenidən qurulmuşdur. Parkda yerə daş plitələr döşənmiş, dekorativ gül kolları və ağaclar əkilmiş, müasir işıqlandırma sistemi quraşdırılmış, köpüklü fəvvarə tikilmişdir. Sakinlərin istirahəti üçün lazımi şəraitin yaradıldığı parkda iaşə obyektləri də fəaliyyət göstərir. Sumqayıtda Yeni ailə quranlar günü hər il iyul ayında bu parkda qeyd edilir.

Prezident İlham Əliyev və xanımı Mehriban Əliyeva burada şəhər ictimaiyyətinin nümayəndələri ilə görüşüb söhbət etdilər.

SAKİN: Cənab Prezidentimiz, qəhrəman Sumqayıt şəhərinə xoş gəlmisiniz. Allah-Taaladan Sizə uzun ömür, cansağlığı, işinizdə müvəffəqiyyətlər arzu edirəm. İnsanlarımızı mehribanlığa, həmrəyliyə çağırıram. Biz Sizin əsgərinizik, nə vaxt əmr etsəniz gedərik. Mənim özümün 80 yaşım var. Sumqayıtdakı bu gözəl bərpa işlərinə, bu komplekslərə, məscidlərə, bu parklara görə çox sağ olun. Allah rəhmət eləsin Heydər Əliyevə, onun qoyduğu təməldir, indi də Siz davam etdirirsiniz. Mehriban xanım, çox sağ olun, var olun, xoş gəlmisiniz.

İLHAM ƏLİYEV: Çox sağ olun, təşəkkür edirəm. Sumqayıta gələndə sevinirəm ki, şəhər gözəlləşir, abadlaşır, yaxşı xiyabanlar, küçələr salınır. Bu park da gözəlləşibdir. Xatırlayıram, bir neçə il əvvəl bu parka gəlmişdim, vəziyyət o qədər də ürəkaçan deyildi.

SAKİN: Heç yox idi, bərbad halda idi.

İLHAM ƏLİYEV: Amma görün, indi nə gözəl olubdur.

SAKİN: Deyəsən, beşinci dəfədir buraya gəlirsiniz. Rəhmətlik atanız, ulu öndər Heydər Əliyev Sumqayıtı çox sevirdi, sumqayıtlıları da çox sevirdi. Görürük ki, Siz də bizi sevirsiniz. Çox sağ olun, bizim şəhərin işi ilə məşğulsunuz, problemləri ilə maraqlanırsınız, həll edirsiniz. Mən Sumqayıtın Ağsaqqallar Şurasının sədriyəm. Siz Heydər Əliyev tərəfindən əsası qoyulmuş siyasəti uğurla aparırsınız. Biz ağsaqqallar, sumqayıtlılar Sizə arxa-dayağıq. Sizə cansağlığı, uzun ömür, ailə səadəti, Sizin rəhbərliyiniz altında ölkəmizə əmin-amanlıq, ən xoş günlər diləyirik.

İLHAM ƏLİYEV: Sağ olun, mən Sumqayıtın inkişafına doğrudan da çox böyük diqqət göstərirəm və işlərlə maraqlanıram. Biz Sumqayıtı, eyni zamanda, çox müasir sənaye şəhərinə çevirməliyik. Əvəllər Sumqayıt məhz bu məqsədlər üçün də salınıbdır. Amma əvvəllər tikilmiş fabriklər, zavodlar bu gün artıq köhnəlmişdir.

SAKİN: 250 minlik Sumqayıtda indi 500 min əhali yaşayır. 500 min əhali işıq, su, qaz, çörək - hamısı ilə təmin olunur. Şəhərdə çoxlu qaçqın-köçkün vardır. Bu da böyük problemdir. Şəhərdə hər şey, bütün kommunikasiya 250 min əhali üçün nəzərdə tutulmuşdu. Amma indi olub 500 min əhali. Hələ gəlib-gedən qonaqları demirəm.

İLHAM ƏLİYEV: Bəli, buna görə biz son illər ərzində ən böyük elektrik stansiyasını məhz Sumqayıtda tikirik. 517 meqavat gücündə stansiya həm Sumqayıtı dayanıqlı elektrik enerjisi ilə təmin edəcək, həm də ümumiyyətlə, bizim energetika sistemimizi sağlamlaşdıracaqdır. Bakı-Sumqayıt yolunun tikintisi artıq başa çatıbdır. Beton örtüklü gözəl yoldur. İndi beton örtüklü yollar ancaq dünyanın ən inkişaf etmiş ölkələrinin ən birinci şəhərlərində salınır. Bu ətrafda heç yerdə beton örtüklü yol yoxdur. Biz bunu Bakıdan Sumqayıta tikdik. İndi Sumqayıtdan şimal sərhədinə qədər gedəcəkdir. Şəhərlərarası yol işıqlandırılacaqdır. Mən bunu bilirəm, işıqlandırılan şəhərlərarası yollar ancaq nadir hallarda Avropanın ən böyük şəhərlərində var. Başqa şəhərlərarası yollarda işıq yoxdur. Burada isə olacaqdır.

Yəni bütün bunlar şəhər üçün, insanların yaxşı, rahat yaşaması üçündür. Binalar rənglənir, bərpa olunur, xiyabanlar, parklar salınır. Kanalizasiya, su təchizatı məsələləri həll edilir. Məktəblər tikilir, təmir olunur. Bu gün mən böyük Paralimpiya Mərkəzinin açılışında iştirak etdim. Ondan əlavə, böyük idman kompleksi tikilir. Yəni bütün bunlar onun üçündür ki, insanlar yaxşı yaşasınlar. Bura həm böyük, həm də müasir sənaye şəhəri olacaqdır. Yəni Azərbaycana lazım olan sənaye müəssisələrində insanlar işlə təmin edilsinlər və həm sosial məsələlərin həlli, insanların rahatlığı üçün, həm də gözəllik üçün şəhərin böyük imkanları olsun. Siz burada yaşayırsınız, məndən daha yaxşı bilirsiniz ki, son illər ərzində burada böyük işlər görülübdür.

SAKİN: Sizi Sumqayıt gəncləri adından salamlamaq, bu gün gənclərə, gənc ailələrə göstərilən dövlət qayğısına görə təşəkkürümü bildirmək istəyirəm. Elə bu Paralimpiya Kompleksinin tikintisi hər cəhətdən sağlam gənclərin yetişməsi üçün böyük imkan yaradır. Yəni gənclər pis vərdişlərdən uzaq olurlar. Həqiqətən də, biz bunun şahidiyik, həyatda öz gözlərimizlə görürük. Bütün bunlara görə Sizə çox sağ olun deyirik.

Pekində idmançılarımızın uğurlarını, Sizin onlara dəstək olmağınızı, Azərbaycan bayrağının qalxmağını görəndə, himnimizi eşidəndə sevincdən göz yaşlarımız axırdı. Doğrudan da qürur hissi keçiririk ki, belə bir dövlətin vətəndaşlarıyıq, belə bir Prezidentimiz var. Cənab Prezident, Sumqayıt gəncləri hər zaman Sizinlə olacaqdır. Mən bunu tam əminliklə deyirəm.

İLHAM ƏLİYEV: Çox sağ olun, təşəkkür edirəm. Bizim həm çox gözəl, vətənpərvər gənc nəslimiz yetişir, həm də veteranlarımız belə möhkəmdirlər.

SAKİN: Allah Azərbaycana kəc baxanı zəlil etsin, gözlərini kor etsin, Azərbaycan inkişafdadır.

SAKİN: İlham müəllim, bütün müəllimlər adından, bütün veteranlar adından Sizə öz təşəkkürümüzü bildiririk ki, Siz pensiyaçıların təqaüdünü 25 faiz artırdınız. Bu, gələcəkdə bizim güzəranımızın yaxşı olmasından xəbər verir. Təşəkkür edirik, çox sağ olun.

İLHAM ƏLİYEV: Sağ olun, bəli və bu siyasət bundan sonra da davam etdiriləcəkdir. Azərbaycanda ildə iki dəfə pensiyaların və minimum əməkhaqqının həddi qaldırılır və bundan sonra da biz bunu edəcəyik. Bizim iqtisadi islahatlarımız, iqtisadi imkanlarımız, ulu öndər Heydər Əliyev tərəfindən əsası qoyulmuş neft strategiyamız buna imkan yaradır. İndi Azərbaycan çox sabit ölkədir. Hər bir inkişaf üçün ən başlıca şərt sabitlikdir. Bu da var, Azərbaycan inkişaf edir, vətəndaşlar təhlükəsizlik, sülh, əmin-amanlıq şəraitində yaşayırlar.

SAKİN: Cənab Prezident və Mehriban xanım, bizim Sumqayıt şəhərinə xoş gəlmisiniz. Ümummilli liderimiz Heydər Əliyevə Allah rəhmət eləsin. Mən onunla çox görüşmüşəm, onunla şəklim də var. İkinci dəfədir ki, Sizinlə görüşürəm. Yenə də deyirəm, xoş gəlmisiniz, qədəmləriniz uğurlu olsun.

Rəhmətlik Heydər Əliyevin apardığı siyasəti Siz davam etdirirsiniz, onun qoyduğu yolla gedirsiniz. Bu beş ildə hər sahədə nə qədər inkişaf var, bunlar barədə çox danışmaq olar. Əfv Fərmanına, pensiyaların artırılmasına görə minnətdarıq Sizə. Çox sağ olun, canınız sağ, ömrünüz uzun olsun. Azərbaycanımız durduqca, Siz də var olun. Sağ olun, Mehriban xanım.

İLHAM ƏLİYEV: Sağ olun, təşəkkür edirəm.

X X X

Şəhər sakinləri Prezident İlham Əliyev və xanımı Mehriban Əliyeva ilə xatirə şəkli çəkdirdirlər.

X X X

Daha sonra Prezident İlham Əliyev Sumqayıtın 3-cü mikrorayonuna - Sülh və Bakı küçələrinin kəsişməsindəki əraziyə gəldi.

Dövlətimizin başçısının tapşırığına əsasən buradakı 12 mərtəbəli üç bina müasir üslubda üzlənmiş, park yenidən qurulmuş, fəvvarə tikilmişdir. Ətrafda abadlıq və yaşıllaşdırma işləri aparılmışdır.

Prezident İlham Əliyev və xanımı Mehriban Əliyeva burada da şəhər sakinləri ilə görüşüb söhbət etdilər.

SAKİN: Biz belə yerləri gəzəndə ulu öndərin nəfəsini, ruhunu hiss edirik. Sizə olduqca minnətdarıq.

İLHAM ƏLİYEV: Binalar da gör necə gözəlləşib.

SAKİN: Sizin köməyinizlə, Sizin sayənizdə. Hamısı Sizin rəhbərliyiniz altında olub, cənab Prezident. Allah Sizə kömək olsun, Sizi bizə çox görməsin. Ulu Tanrı Sizi qorusun.

İLHAM ƏLİYEV: Şadam ki, Sumqayıtda işlər yaxşı gedir. İş yerləri açılır, zavod, fabrik tikilir və tikiləcəkdir. Sumqayıt ən müasir şəhərə çevrilir. Əvvəllər şəhərə daxil olanda bura yaxşı görünmürdü.

VAQİF ƏLİYEV (Sumqayıt Şəhər İcra Hakimiyyətinin başçısı): Buranı tamamilə yenidən qurduq. Müasir oturacaqlar, dibçəklər qoyulmuşdur. Sumqayıtda parklara nə qədər oturacaq qoysan, dincəlməyə bir o qədər insan gəlir.

İLHAM ƏLİYEV: Şəhər böyüyür, əhali artır.

VAQİF ƏLİYEV: Oturacaqları nə qədər artırsaq da kifayət etmir.

SAKİN: Axşamlar dolu olur bura. Uşaqlar, böyüklər hamısı gəlir, istirahət edirlər.

İLHAM ƏLİYEV: İnsanların istirahəti üçün belə yerlər mütləq çox olmalıdır. Çünki insanlar axşam evdə oturmaqdansa, burada gəzməyə, dincəlməyə, istirahət etməyə gəlirlər.

SAKİN: Ən əsası odur ki, əmin-amanlıq olsun, Sizin sayənizdə biz buna nail olmuşuq.

İLHAM ƏLİYEV: Bəli, həmişə belə də olacaq. Növbəti beş il ərzində Sumqayıtın inkişafı üçün əlavə tədbirlər görüləcəkdir. Bura ən müasir şəhərə çevrilməlidir və çevrilir.

VAQİF ƏLİYEV: Sizin bayaq qeyd etdiyiniz 517 meqavat gücündə elektrik stansiyası Sumqayıtın sənayesinin inkişafına çox böyük təkan verəcəkdir.

İLHAM ƏLİYEV: Alüminium zavodu, ondan sonra böyük kabel zavodu tikilir. O, zavod deyil, əslində, sənaye kompleksidir.

X X X

Prezident İlham Əliyev Sumqayıtın müasirləşdirilməsi istiqamətində tədbirlərin davam etdiriləcəyini, ölkənin sosial-iqtisadi siyasətinin daha da gücləndiriləcəyini vurğuladı.

Sumqayıt sakinləri Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın fəaliyyətindən də razılıqlarını bildirdilər.

SAKİN: Siz Azərbaycan qadınını bütün dünya səviyyəsində təqdim edirsiniz. Biz sizinlə fəxr edirik. Allah sizi bizə çox görməsin. Doğrudan da, işləri Heydər Əliyevin adına layiq davam etdirirsiniz. Bütün sahələrdə problemlərimiz həll olunur. Sizə minnətdarlığımızı bildiririk.

MEHRİBAN ƏLİYEVA: Sağ olun.

Sakinlər Mehriban Əliyeva ilə xatirə şəkli çəkdirdilər.

X X X

Prezident İlham Əliyev Sumqayıtda reallaşdırılacaq digər tədbirlərlə bağlı tapşırıq və tövsiyələrini verdi.

######