AZƏRBAYCAN PREZİDENTİNİN TAPŞIRIĞI İLƏ LİVAN VƏ FƏLƏSTİN XALQLARINA HUMANİTAR YARDIM GÖSTƏRİLMİŞDİR

29.08.2006 [22:08]
Çap et
A⁺ A^-

Fövqəladə Hallar Nazirliyinin ictimaiyyətlə əlaqələr idarəsindən AZƏRTAC-a bildirmişlər ki, dövlətimizin başçısı İlham Əliyevin tapşırığına əsasən Azərbaycan hökuməti İsrail-Livan hərbi münaqişəsi nəticəsində çoxsaylı dağıntılara və insan tələfatına məruz qalan Livan və Fələstin xalqlarına humanitar yardım göstərmişdir. Ayrılan vəsait hesabına Fövqəladə Hallar Nazirliyinin xətti ilə alınan 80 ton ərzaqla dolu 4 yük maşını-ikisi Livana, ikisi isə Fələstin Muxtariyyətinə yardım şəklində Türkiyənin Adana şəhərindən yola salınmışdır. Yüklərin alınmasına və göndərilməsinə Türkiyənin Acil Durum Yönətimi yaxından kömək göstərmişdir.

Avqustun 26-da üzərinə “Azərbaycan hökuməti və xalqının Livan xalqına humanitar yardımı” sözləri yazılmış yüklərin yola salınması mərasimində əyalət valisinin köməkçisi Abdulla Dölek bu xeyirxah addımı Azərbaycanın son dərəcə ağır durumda olan insanlara mənəvi və maddi dəstəyi kimi qiymətləndirmiş, ən xoş arzularını dilə gətirmişdir.

Azərbaycanın Ankaradakı səfirliyinin konsulu İlham Nəzərli, Fövqəladə Hallar Nazirliyinin Maliyyə-İqtisadiyyat Baş İdarəsinin rəisi Nağı Nağıyev mərasim iştirakçılarına bildirmişlər ki, bəşəri duyğuları özündə ehtiva edən Azərbaycan dövləti yardıma ehtiyacı olanlara hər zaman qardaşlıq köməyi göstərir.

AZƏRBAYCAN PREZİDENTİNİN TAPŞIRIĞI İLƏ LİVAN VƏ FƏLƏSTİN XALQLARINA HUMANİTAR YARDIM GÖSTƏRİLMİŞDİR

MÜƏLLİFLƏ ƏLAQƏ