AZƏRBAYCAN RESPUBLİKASI BAŞ PROKURORLUĞU, MİLLİ TƏHLÜKƏSİZLİK VƏ DAXİLİ İŞLƏR NAZİRLİKLƏRİNİN XÜSUSİ MƏLUMATI
Belə ki, aparılmış axtarışlar nəticəsində Fərhad Əliyevin İqtisadi İnkişaf Nazirliyinin inzibati binasındakı iş otağından 50 min 500 ABŞ dolları, 6 min avro və 860 Böyük Britaniya funt sterlinqi, “Qızıl Şərq” hərbi şəhərciyində yerləşən mənzilindən 30 min avro, 6 min 500 ABŞ dolları, bağ evlərindən 34 ədəd qiymətli rəsm əsəri, 500 ədəd dövlət özəlləşdirmə payı, qardaşı Rafiq Əliyevə məxsus “Azpetrol” şirkətinin ofisindən 565 min ABŞ dolları və kassaya mədaxil edilməmiş 5 milyard 609 milyon manat aşkar edilərək götürülmüşdür. Axtarış aparılan ünvanlarda həmçinin külli miqdarda qızıl-zinət əşyaları, 7 ədəd müxtəlif markalı tapança və ov silahları, digər qiymətli əşyalar, çoxsaylı əmlaklara mülkiyyət hüququnu təsdiq edən sənədlər də aşkar olunmuşdur. Fərhad Əliyevə faktiki məxsus olan çoxlu kommersiya obyektlərində korrupsiya və digər qanun pozuntuları ilə bağlı araşdırmalar davam etdirilir.
Cinayət işi üzrə həyata keçirilən istintaq-əməliyyat tədbirləri nəticəsində Rəsul Quliyevin Azərbaycanda hakimiyyətin zorla ələ keçirilməsi məqsədi daşıyan cinayətkar planının həyata keçirilməsi, onun tərkib hissələri kimi əhalinin kütləvi şəkildə beynəlxalq hava limanına toplanması, asayişi mühafizə qüvvələrinə müqavimət göstərməklə iğtişaşlar törətməli olan silahlı təxribat qruplarının formalaşdırılması üçün zəruri olan maliyyə vəsaitləri ilə təmin edən şəxslərdən birinin sabiq səhiyyə naziri Əli İnsanov olduğu müəyyən edilmişdir.
İstintaq araşdırmaları göstərir ki, Fikrət Yusifov mütəmadi əlaqə saxladığı Rəsul Quliyevin tapşırığı ilə müxtəlif vaxtlarda Əli İnsanovla görüşmüş, ölkədə hakimiyyətin zorla ələ keçirilməsi məqsədi ilə planlaşdırılmış işlərdə fəal iştirak etməsi, eləcə də lazım olan məbləğdə maliyyə vəsaiti ayırması barədə göstərişlərini ona çatdırmışdır.
Fikrət Yusifov 2005-ci ilin avqust ayında Əli İnsanovla əlaqə saxlayaraq, Novxanı-Sumqayıt yolunun kənarındakı “Flaqman” restoranında görüşmüşdür. Söhbət zamanı Əli İnsanov dövlət mənafeləri əleyhinə yönəlmiş planları dəstəkləyərək, hərtərəfli kömək edəcəyi barədə söz vermiş və Rəsul Quliyevi buna əmin etməyi Fikrət Yusifovdan xahiş etmişdir.
Fikrət Yusifov 2005-ci il avqust ayının sonlarında Sankt-Peterburq şəhərində olarkən Rəsul Quliyevlə telefon əlaqəsi yaradaraq, hakimiyyətin zorla ələ keçirilməsinə Əli İnsanovun tərəddüd etmədən istənilən maliyyə yardımını göstərməyə hazır olduğunu bildirmiş və Rəsul Quliyev isə öz növbəsində Əli İnsanovdan 100 min ABŞ dolları almaq barədə tapşırıq vermişdir. Sentyabr ayının axırlarında Bakıya qayıdan Fikrət Yusifov Əli İnsanovla yenidən görüşmüş və sabiq səhiyyə naziri bu işdə heç bir problemin olmayacağını, lazım gəldikdə həmin məbləği dərhal çatdıracağını vəd etmişdir.
Ertəsi gün, Əli İnsanov Fikrət Yusifova sonuncunun qohumu, Səhiyyə Nazirliyinin işlər idarəsinin müdiri Arzu Ələkbərova vasitəsilə 100 min ABŞ dolları göndərmişdir.
Fikrət Yusifov ifadəsində həmçinin göstərmişdir ki, Rəsul Quliyevin tapşırığına müvafiq olaraq, 2005-ci ilin oktyabr ayının 10-da Sankt-Peterburqdan Bakı şəhərinə qayıtdıqdan sonra Arzu Ələkbərova vasitəsilə Əli İnsanova onunla görüşmək istədiyini çatdırmış, o isə, görüşün məqsədini başa düşdüyünə görə, lazım olan məbləğin məktubla bildirilməsini təklif etmişdir. Fikrət Yusifov eyni məbləğdə pul ayrılmasının vacibliyini Əli İnsanovun nəzərinə çatdırmış və oktyabr ayının 14-də Əli İnsanov Arzu Ələkbərova vasitəsilə Fikrət Yusifova yenə də 100 min ABŞ dolları göndərmişdir.
Fikrət Yusifov həmin gün Rəsul Quliyevin telefonla verdiyi tapşırığa müvafiq olaraq, pulun 50 min ABŞ dollarını təyinatı üzrə göndərmiş, qalan 50 min ABŞ dollarını isə növbəti tapşırıq verilənə kimi özündə saxlamışdır. 2005-ci il 16 oktyabr tarixdə Fikrət Yusifovun mənzilində aparılan axtarış zamanı 100 min avro ilə bərabər aşkar edilmiş 60 min ABŞ dollarının 50 mini məhz Əli İnsanov tərəfindən verilən pul olmuşdur.
İstintaq zamanı ifadə verən Səhiyyə Nazirliyinin işlər idarəsinin müdiri Arzu Ələkbərova Fikrət Yusifovun yuxarıda göstərdiklərini tam təsdiq etmişdir.
2005-ci il 20 oktyabr tarixdə Əli İnsanov cinayət işi üzrə şübhəli şəxs qismində tutulmuşdur.
Eyni zamanda, həyata keçirilmiş istintaq-əməliyyat tədbirləri nəticəsində Əli İnsanovun rəhbərlik etdiyi Səhiyyə Nazirliyi sistemində tamah və ya sair şəxsi maraqlar üzündən vəzifədən sui-istifadə edilməsi, dövlət əmlakının mənimsənilməsi və israf olunması, lisenziyaların verilməsi zamanı külli miqdarda rüşvət alınması hallarını təsdiqləyən faktlar müəyyən edilmişdir. Bu əməllərin törədilməsi ilə əlaqədar Səhiyyə Nazirliyinin Əczaçılıq və tibbi texnika şöbəsinin rəisi Akif Məhərrəmov da tutulmuşdur.
İstintaq gedişatında aparılan axtarışlar zamanı Əli İnsanovun Cəfər Xəndan küçəsi 50 nömrəli ünvanda yerləşən şəxsi evindən, habelə bağ evlərindən 1 milyon 289 min ABŞ dolları, 884 min avro, 25 kiloqram müxtəlif qızıl-brilyant əşyalar və kərpic formasında tökmə qızıl külçələr, çoxsaylı əmlaklara mülkiyyət hüququnu təsdiq edən sənədlər, 17 ədəd qiymətli rəsm əsəri, antik olması ehtimal edilən zinət əşyaları, Səhiyyə Nazirliyinin inzibati binasında yerləşən iş otağından 20 min ABŞ dolları və müxtəlif qiymətli əşyalar, Akif Məhərrəmovun mənzilindən 1 milyon 217 min ABŞ dolları, xidməti iş otağından isə 8 min 900 ABŞ dolları aşkar edilərək götürülmüşdür. Hazırda Səhiyyə Nazirliyi sistemində korrupsiya halları ilə bağlı müvafiq araşdırmalar aparılır.
Törədilmiş cinayət əməllərinin bütün xüsusatlarının tam, hərtərəfli və obyektiv araşdırılması istiqamətində zəruri tədbirlər davam etdirilir.
21 oktyabr 2005
Bölmənin digər xəbərləri
