AZƏRBAYCAN RESPUBLİKASININ PREZİDENTİ İLHAM ƏLİYEVİN RUSİYAYA RƏSMİ SƏFƏRİ
GENİŞ HEYƏTDƏ RUSİYA-AZƏRBAYCAN DANIŞIQLARI
Danışıqlar başlanmazdan əvvəl Prezident Vladimir Putin Rusiya Federasiyasının rəsmi dövlət şəxslərini Prezident İlham Əliyevə təqdim etdi. Prezident İlham Əliyev isə Azərbaycanın rəsmi nümayəndə heyətinin üzvlərini Prezident Vladimir Putinə təqdim etdi.
Sonra danışıqlar başlandı. Rusiya Federasiyasının Prezidenti VLADİMİR PUTİN dövlətimizin başçısına müraciətlə dedi:
-Gün aydın, hörmətli cənab Prezident. İcazə verin, Sizi, nümayəndə heyətinin bütün üzvlərini burada bir daha salamlayım. Biz növbəti görüşümüzə çox şadıq. Bir daha vurğulayıram ki, Rusiya ilə Azərbaycan arasında qarşılıqlı fəaliyyətin səviyyəsi son illər özünün inkişafının ən yüksək nöqtəsinə çatmışdır. Biz bunu alqışlayırıq.
Ümid edirik ki, postsovet məkanında, regionda qarşılaşdığımız bütün çətinliklərə baxmayaraq, onları birgə səylərimizlə aradan qaldıra biləcəyik və onlar ikitərəfli münasibətlərin inkişafına əngəl törədən amil olmayacaqdır. Üstəlik, Rusiya və Azərbaycan xalqları arasında dostluq, qarşılıqlı fəaliyyət ənənələri çox möhkəmdir. Atanız, Azərbaycan Prezidenti, ölkəmizdə çox böyük hörmətə malik olan Heydər Əlirza oğlu Əliyev tərəfindən bu sahədə son illər çox iş görülmüşdür. Biz hamımız onu hələ sovet dövründən tanıyırıq. O, Sovet İttifaqı, beynəlxalq miqyaslı siyasətçi idi.
Siz bilirsiniz ki, bir müddət əvvəl biz qərar çıxararaq, onu Rusiya Federasiyasının ali mükafatına təqdim etdik. Biz Heydər Əliyevi “Müqəddəs apostol Andrey Pervozvannı” ordeni ilə təltif etdik. İşimizi başa çatdırdıqdan sonra mən Rusiya rəhbərliyinin tapşırığını yerinə yetirəcək və bu ordeni yadigar olaraq Sizin ailənizə verəcəyəm.
Əminəm ki, səfərin gedişində Moskvada görəcəyiniz iş faydalı olacaq və belə hallarda deyildiyi kimi, ikitərəfli əlaqələrimizin daha da inkişaf etməsinə, şübhəsiz, təkan verəcəkdir.
Sonra Azərbaycan Respublikasının Prezidenti İLHAM ƏLİYEV çıxış edərək dedi:
- Çox sağ olun, hörmətli cənab Prezident.
Məni Rusiyaya rəsmi səfərə dəvət etdiyinizə görə bir daha Sizə öz minnətdarlığımı bildirmək istərdim. İkitərəfli münasibətlərimizin necə inkişaf etməsindən, möhkəmlənməsindən və hər iki ölkənin həyat fəaliyyətinin, əslində, bütün sahələrini əhatə etməsindən çox şadam.
Sizin səyləriniz və Prezident Heydər Əliyevin səyləri sayəsində əlaqələrimizin inkişafının çox möhkəm təməli qoyulmuşdur. İndi ən yüksək səviyyədə siyasi dialoq və məsləhətləşmələr aparılır. Biz regional xarakterli və dünya siyasətinə dair məsələlər barəsində məsləhətləşirik və təbiidir ki, ölkələrimiz arasında ikitərəfli münasibətlər danışıqlarımızda öncül yer tutur. Biz siyasi dialoq, iqtisadi əməkdaşlıq çərçivəsində əldə edilmiş uğurlara yalnız sevinə bilərik. Əmtəə dövriyyəsinin hər il artması bizim uğurlu iqtisadi əlaqələrimizin ən əyani göstəricisidir.
Biz humanitar sahədə də uğurla əməkdaşlıq edirik. Azərbaycanda rus mədəniyyətinə, rus dilinə necə qayğı ilə yanaşıldığını bilirsiniz. Ölkəmizdə təhsil rus dilində aparılan 400-dən artıq məktəb vardır və Sovet İttifaqının dağılmasından sonrakı dövrdə onların heç biri bağlanmamışdır. Bütün bunlar çox vacib məqamlardır və xalqlarımızı bir-birinə daha da yaxınlaşdırır.
Biz istəyirik ki, Rusiya və Azərbaycan bundan sonra da dinamik inkişaf etsin, öz fəaliyyətlərini əlaqələndirsinlər. Bu isə öz növbəsində ölkələrimizi, xalqlarımızı bir-birinə daha da yaxınlaşdıracaqdır.
Cənab Prezident, Prezident Heydər Əliyevin təltif edildiyi mükafata görə Sizə çox minnətdaram. Bu, Rusiyanın ali mükafatıdır. Bizim hamımız ümid edirdik ki, bu mükafatı o, Sizin əlinizdən şəxsən ala biləcəkdir, lakin taleyin hökmü başqa cür oldu. Biz bu mükafatı qayğı ilə qoruyub saxlayacağıq və o, hər bir azərbaycanlının qəlbində özünə yer tapacaqdır. Zənn edirəm ki, bu, bizi, ölkələrimizi, xalqlarımızı bir-birinə daha da yaxınlaşdıracaq və gələcəkdə uğurla inkişaf etməyimiz üçün daha əlverişli zəmin yaradacaqdır.
Dostluq və qarşılıqlı anlaşma ruhunda keçən danışıqlarda ölkələrimiz arasında iqtisadi əməkdaşlığın inkişafı, o cümlədən ticarət əlaqələrinin genişləndirilməsi, yanacaq-energetika kompleksi sahəsində işbirliyi və digər məsələlər diqqət mərkəzində oldu. Moskvada imzalanacaq sənədlərin Azərbaycan-Rusiya münasibətlərinin inkişafına yeni təkan verəcəyi vurğulandı.
Bölmənin digər xəbərləri
