AZƏRBAYCAN SAMBOÇULARI RUSİYA PREZİDENTİNİN KUBOKU UĞRUNDA TURNİRDƏ İŞTİRAK EDƏCƏKLƏR
AZƏRTAC-ın xüsusi müxbiri xəbər verir ki, Azərbaycan samboçuları fevralın 15-16-da Moskvada keçiriləcək Rusiya Prezidentinin kuboku uğrunda turnirdə iştirak edəcəklər. Yarışlara 19 ölkədən 100 samboçu qatılacaq. İştirakçılar arasında dəfələrlə dünya, Avropa, Asiya çempionları, o cümlədən dəfələrlə dünya çempionu olmuş Fyodor Yemelyanov da vardır.
Ümumrusiya və Avropa Sambo Federasiyasının prezidenti Sergey Yeliseyev AZƏRTAC-ın müxbirinə bildirmişdir ki, Azərbaycan komandasının tərkibi artıq müəyyən edilmişdir və fevralın 13-də idmançıların adları elan olunacaqdır.
S.Yeliseyev idmançılarımızı yüksək qiymətləndirərək demişdir ki, “Dəfələrlə dünya və Avropa çempionu Ceyhun Məmmədovun başçılıq etdiyi Azərbaycan Sambo Federasiyası çox güclüdür. Bu gün Azərbaycan idman aləmində layiqli yerini tutur. Düşünürəm ki, bizim də həmişə çox sevdiyimiz ölkənizin 2016-cı ilin Olimpiya oyunlarının sahibi olmaq üçün yaxşı şansı var”.
Bölmənin digər xəbərləri
