AZƏRBAYCAN TƏHSİLİ SÜRƏTLİ İNKİŞAF YOLUNDADIR
Bakı, 14 sentyabr (AZƏRTAC). Ölkəmizin hər yerində məktəblər yenidən öz qapılarını şagirdlərin üzünə açır. Sevindirici haldır ki, minlərlə Azərbaycan məktəblisi builki “Bilik günü”nü yeni təhsil ocaqlarında qarşılayacaqdır. Son bir ildə respublikada 179 yeni məktəb binası tikilmiş, 118-i isə əsaslı təmir edilmişdir. Bu, heç şübhəsiz, ölkəmizdə təhsilə göstərilən dövlət qayğısının bariz nümunəsidir.
Ümumiyyətlə, son illər təhsil sahəsində aparılan islahatlar artıq öz bəhrəsini verir. İndi azərbaycanlı gənclərin sorağı dünyanın ən nüfuzlu təhsil ocaqlarından gəlir. Bu günlərdə təsdiq edilmiş “Təhsil haqqında” Qanun isə görülən işlərin bir növ məntiqi yekunu, gələcəyə ünvanlanmış perspektiv inkişaf proqramıdır.
Təhsili millətin gələcəyi adlandıran ümummilli liderimiz Heydər Əliyevin ikinci dəfə hakimiyyətə gəlişindən sonra, bir çox sahələrdə olduğu kimi, milli təhsil sisteminin bərpası və günün tələblərinə uyğun inkişaf etdirilməsi üçün əlverişli şərait yarandı. Məhz ulu öndərin təhsilin gələcəyi istiqamətində atdığı addımlar indi öz bəhrəsini verir. Təhsil sahəsinin beynəlxalq standartlar səviyyəsində qurulması bu gün də dövlət siyasətinin prioritet istiqamətlərindən biridir.
Azərbaycanın təhsil sistemində başlanan islahatın uğurlu nəticələri artıq yeni əsrin ilk illərində özünü büruzə verməkdədir. Prezident İlham Əliyev təhsilin inkişafına böyük önəm verərək demişdir: “Təhsil Azərbaycanın davamlı inkişaf strategiyasının ən öncül istiqamətlərindən biridir”. Dövlətimizin başçısı təhsilin davamlı inkişafını daim diqqət mərkəzində saxlamış, bu sahədə islahatların dərinləşməsi üçün sərəncamlar imzalamışdır. Təkcə ötən beş ildə təhsillə bağlı 16 Dövlət proqramı qəbul olunmuşdur.
Ümumtəhsil ocaqlarının müasirləşdirilməsi və yeniləşməsində Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın misilsiz xidmətləri vardır. Məhz onun diqqət və qayğısı bu sahənin inkişafına böyük təkan vermişdir. Mehriban xanım Əliyevanın təşəbbüsü ilə reallaşan “Yeniləşən Azərbaycana yeni məktəb” proqramı çərçivəsində indiyədək 280-dən artıq məktəb binası tikilmiş, yüzlərlə məktəb yenidən bərpa olunaraq, ən müasir avadanlıq və kompyuterlərlə təchiz edilmişdir.
Fondun prezidenti Mehriban xanım Əliyevanın təşəbbüsü ilə hər yeni dərs ilinin əvvəlində birinci sinif şagirdlərinə çanta və dərs ləvazimatının paylanması artıq ənənəyə çevrilmişdir. 2004-cü ildən başlayaraq, Fond hər il qaçqın və məcburi köçkün ailələrindən olan uşaqları, eləcə də Gürcüstanda yaşayan soydaşlarımızı yeni tədris ilində dərs vəsaiti ilə sevindirir. Rusiya Federasiyası, Hollandiya, Türkiyə və Rumıniyada yaşayan məktəbli soydaşlarımız da belə hədiyyələr alırlar. Heydər Əliyev Fondu elm və təhsil sahəsinə qrantların ayrılmasına, xüsusi istedadlı şagirdlərə, tələbələrə və alimlərə təqaüdlərin verilməsinə də diqqət yetirir.
Prezident İlham Əliyevin diqqəti, qayğısı və yaxından dəstəyi ilə 2003-2008-ci illərdə bütövlükdə Azərbaycanda, o cümlədən təhsil sistemində ciddi islahatlar həyata keçirilmişdir. Ulu öndər Heydər Əliyev tərəfindən əsası qoyulan siyasi və iqtisadi yüksəliş öz bəhrələrini məhz bu illərdə verdi, əhalinin rifah halı yüksəldi. Qara qızıldan, maddi dəyərlərdən əldə edilən gəlir ölkədə insan kapitalının inkişafına yönəldildi.
Təhsildə qazanılmış uğurlarla yanaşı, onun hüquqi bazasının yaradılması sahəsində çətinliklər də var idi. Ötən illər ərzində xeyli hüquqi və normativ sənədlər qəbul olunsa da, “Təhsil haqqında” yeni qanun hələ də qəbul edilməmişdi. Ölkədə təhsilin inkişafının hüquqi tənzimlənməsində problemlər yaranırdı. Bu qanunun ərsəyə gəlməsi üçün artıq tarixi zərurət yaranmışdı. Nəhayət, 2009-cu il iyunun 19-da Milli Məclisdə “Təhsil haqqında” qanun qəbul edildi. Sentyabrın 5-də isə Prezident İlham Əliyev “Təhsil haqqında” Azərbaycan Respublikası Qanununun tətbiq edilməsi barədə” Fərman imzaladı. Beləliklə, uzun illər ictimaiyyətin, təhsil işçilərinin gözlədiyi sənəd qüvvəyə mindi. Bu qanun ölkənin inkişaf etməkdə olan təhsilinin tərəqqisi üçün yeni hüquqi baza yaratmış oldu. Orada milli təhsilimizin inkişaf meyilləri tamamilə nəzərə alınmışdır. Qanunda deyilir ki, Azərbaycan Respublikasında təhsil dünyəvi və fasiləsiz xarakter daşımaqla, vətəndaşın, cəmiyyətin və dövlətin maraqlarını əks etdirən strateji əhəmiyyətli prioritet fəaliyyət sahəsidir.
Qanunda təhsil sahəsində dövlət siyasətinin əsas prinsipləri - humanistlik, demokratiklik, bərabərlik, millilik və dünyəvilik, keyfiyyətlilik, səmərəlilik, fasiləsizlik, varislik, liberallaşma və inteqrasiya öz əksini tapmışdır.
Ali sənəddə təhsilin əsas məqsədləri açıqlanmışdır. Bunlardan ən başlıcası, Azərbaycan dövləti qarşısında öz məsuliyyətini dərk edən, xalqın milli ənənələrinə və demokratiya prinsiplərinə, insan haqları və azadlıqlarına hörmət edən, vətənpərvərlik və azərbaycançılıq ideyalarına sadiq olan, müstəqil və yaradıcı düşünən vətəndaş və şəxsiyyət yetişdirməkdir.
Heç şübhəsiz, bu qanun ölkəmizdə həyata keçirilən təhsil islahatının daha da sürətlənməsinə imkan yaradacaq, milli təhsilimizin sonrakı davamlı inkişafını təmin edəcək, Azərbaycanın gələcək uğurlarının artırılmasına, dövlətimizin qüdrətlənməsinə, dünya mədəniyyəti xəzinəsinə yeni-yeni töhfələr verməsinə xidmət edəcəkdir.
Bölmənin digər xəbərləri
