Azərbaycan və Böyük Britaniya arasında səhiyyə sahəsində əməkdaşlıq məsələləri müzakirə olunub
Bakı, 11 dekabr, AZƏRTAC
Səhiyyə Nazirliyində Böyük Britaniyanın Azərbaycan və Mərkəzi Asiya üzrə ticarət elçisi Lord Con Alderdaysın başçılıq etdiyi nümayəndə heyəti ilə görüş keçirilib.
Səhiyyə Nazirliyinin mətbuat xidmətindən AZƏRTAC-a verilən məlumata görə, görüşdə, həmçinin Böyük Britaniya və Şimali İrlandiya Birləşmiş Krallığının Azərbaycandakı fövqəladə və səlahiyyətli səfiri Fergus Auld və Böyük Britaniyanın Biznes və Ticarət Nazirliyinin ölkə üzrə direktoru Aleksandr Tirrel iştirak ediblər.
Səhiyyə naziri Teymur Musayev Azərbaycan-Böyük Britaniya münasibətlərinin dinamik inkişaf tendensiyasına malik olduğunu qeyd edib. O, Ümummilli Lider Heydər Əliyevin 1994-cü və 1998-ci illərdə Böyük Britaniyaya səfərlərinin ölkələrimiz arasında əməkdaşlığın daha ad inkişaf etməsində əsas rol oynadığını bildirib. Nazir ölkələrimiz arasında bir çox sahələri əhahə edən münasibətlərın mövcud olduğunu deyib.
Prezident İlham Əliyevin vətəndaşların sağlamlığının qorunmasına hər zaman xüsusi diqqət və qayğı göstərdiyini vurğulayan Teymur Musayev deyib: “Şəhid ailələri və müharibə veteranlarına diqqət və qayğı dövlət siyasətinin əsas prioritet istiqamətlərindəndir. Eyni zamanda, nazirliyin Sanator-Kurort Reabilitasiya Mərkəzində veteranlarımız üçün bir çox tibbi xidmətlər göstərilir”.
Nazir gələcəkdə elmi-tibbi və digər sahələrdə əməkdaşlığın daha da inkişaf etdiriləcəyinə ümidvar olduğunu söyləyib.
Lord Con Alderdays Britaniyanın Azərbaycanla münasibətlərinin inkişaf etdirilməsində maraqlı olduğunu bildirib. Onun sözlərinə görə, iki ölkə arasındakı münasibətlər təkcə ticarət və investisiyalarla məhdudlaşmır, eyni zamanda, uzunmüddətli tərəfdaşlıq və qarşılıqlı faydalı əməkdaşlıq prinsiplərinə əsaslanır.
Azərbaycan dövlətinin şəhid ailələri və müharibə veteranlarına göstərdiyi diqqət və qayğını yüksək qiymətləndirən Lord Con Alderdays Böyük Britaniyanın bu sahədə də müvafiq dəstək göstərməyə hazır olduğunu vurğulayıb.
Konstruktiv anlaşma şəraitində keçən görüş zamanı, həmçinin qarşılıqlı maraq doğuran digər məsələlər ətrafında fikir mübadiləsi aparılıb.
Bölmənin digər xəbərləri
