Azərbaycan və İran regionda sülh, sabitlik və təhlükəsizliyin təmin olunmasına töhfə verir
Bakı, 3 mart, AZƏRTAC
Azərbaycanın xarici işlər naziri Elmar Məmmədyarov ölkəmizdə səfərdə olan İranın xarici işlər nazirinin müavini İbrahim Rəhimpurun rəhbərlik etdiyi nümayəndə heyəti ilə görüşüb.
Xarici İşlər Nazirliyinin mətbuat xidmətindən AZƏRTAC-a bildiriblər ki, görüşdə ölkələrimizin rəhbərləri tərəfindən müəyyən olunan strateji xəttə uyğun olaraq, ikitərəfli əməkdaşlığın inkişafından məmnunluq ifadə edilib. Azərbaycan və İranın regionda sülh, sabitlik və təhlükəsizliyin təmin olunmasına töhfələri vurğulanıb.
Söhbət zamanı Ermənistan-Azərbaycan münaqişəsinin regional sülh və təhlükəsizlik üçün əsas təhdid olduğu qeyd edilib, münaqişənin həlli üçün ilk növbədə Ermənistan silahlı qüvvələrinin işğal altındakı Azərbaycan ərazilərindən çıxarılmalı olduğu diqqətə çatdırılıb. Üçtərəfli formatda Azərbaycan-İran-Türkiyə əməkdaşlığının regional inkişafa xidmət etdiyi vurğulanıb.
Görüşdə martın 4-5-də Xəzər dənizinin hüquqi statusuna dair konvensiyanın hazırlanması üzrə Xəzəryanı dövlətlərin Bakıda keçiriləcək iclasının əhəmiyyəti vurğulanıb.
İbrahim Rəhimpur Azərbaycanın xarici işlər nazirinin müavini Xələf Xələf ilə də görüşüb.
Görüşdə iki ölkə arasında siyasi, iqtisadi, ticarət, elm, mədəniyyət, nəqliyyat və enerji sahələrində əməkdaşlığa dair məsələlər müzakirə olunub.
Bölmənin digər xəbərləri
