Azərbaycan və Moldova pandemiya haqqında fikir mübadiləsi aparıblar
Kişineu, 16 aprel, AZƏRTAC
Moldova Respublikasının Prezidenti İqor Dodon Azərbaycan Respublikasının bu ölkədəki səfiri Qudsi Osmanovla işçi görüş keçirib.
AZƏRTAC xəbər verir ki, görüşdə Moldova-Azərbaycan ikitərəfli münasibətlərinin inkişafına aid bir sıra məsələlər müzakirə edilib, bütün dünyanı bürümüş COVID-19 pandemiyası haqqında fikir mübadiləsi aparılıb. Moldova rəhbərliyinin gördüyü işləri diqqətlə izlədiyini vurğulayan səfir COVID-19 virusuna qarşı mübarizədə ölkənin hökuməti tərəfindən həyata keçirilən tədbirləri yüksək qiymətləndirib. Ölkəmizin diplomatik missiyasının rəhbəri bununla əlaqədar bildirib ki, bu çətin vaxtda Azərbaycan diasporu moldova xalqının yanındadır və Moldova Respublikasının Prezidenti tərəfindən başlanmış sosial layihələrin reallaşdırılmasında Moldova hökumətini dəstəkləməyə hazırdır.
İqor Dodon Azərbaycan tərəfini səmimiyyətinə və həmrəylinə görə təşəkkürünü bildirib. Dövlət başçısı vurğulayıb ki, bütün bəşəriyyətin qarşılaşdığı bu böhranın öhdəsindən yalnız birgə səylərlə gəlmək olar.
Emil Hüseynli
AZƏRTAC-ın xüsusi müxbiri
Kişineu
Bölmənin digər xəbərləri
