AZƏRBAYCAN VƏ PAKİSTAN PREZİDENTLƏRİNİN GENİŞ TƏRKİBDƏ GÖRÜŞÜ
Azərbaycan Prezidenti İLHAM ƏLİYEV görüşü açaraq dedi:
-Hörmətli cənab Prezident!
Hörmətli qonaqlar!
Mən Sizi bir daha ürəkdən salamlayıram və “Azərbaycana xoş gəlmisiniz!” deyirəm. Bizim dəvətimizi qəbul edib ölkəmizə səfər etdiyinizə görə Sizə minnətdaram.
Ölkələrimiz arasında münasibətlər çox sürətlə inkişaf edir. Bu bizi çox sevindirir. 1996-cı ildə xalqımızın ümummilli lideri Heydər Əliyev Pakistana rəsmi səfər etmişdir. Həmin səfərdən sonra ölkələrimiz arasında münasibətlər bütün istiqamətlərdə inkişaf etməyə başlamışdır. Bu gün həm siyasi, həm də iqtisadi və mədəni sahələrdə ikitərəfli əlaqələr çox uğurla inkişaf edir. Pakistanla Azərbaycan beynəlxalq aləmdə daim bir-birini dəstəkləyir və bu dəstəyə görə Sizə öz minnətdarlığımı bildirirəm. Xüsusilə Ermənistan-Azərbaycan, Dağlıq Qarabağ münaqişəsində ölkəmizin ədalətli mövqeyini dəstəklədiyinizə görə Sizə minnətdaram.
İqtisadi sahədə əməkdaşlığımızın çox gözəl perspektivləri vardır və biz bunu Sizinlə müzakirə etdik. Hökumətlərarası birgə komissiya çox gözəl işləyir və ümidvaram ki, bu səfərdən sonra iqtisadi sahədə əlaqələrimiz daha da güclənəcəkdir.
Əlbəttə ki, humanitar sahədə əməkdaşlığımız da güclənməlidir. Bizim xalqlarımız bir-birinə böyük hörmət və rəğbətlə yanaşırlar. Əminəm ki, bu səfərdən sonra xalqlarımız arasında olan münasibətlər də durmadan inkişaf edəcəkdir.
Bir daha Sizi salamlayıram, xoş gəlmisiniz deyirəm. Əmin olduğumu bildirmək istəyirəm ki, bu səfərdən sonra Pakistan-Azərbaycan münasibətləri bütün sahələrdə sürətlə inkişaf edəcəkdir.
Səmimi qəbula görə Azərbaycan Prezidentinə təşəkkürünü bildirən Pakistan Prezidenti PƏRVİZ MÜŞƏRRƏF dedi:
- Hörmətli Prezident!
Mən də əvvəlcə “Xoş gördük!” demək istəyirəm. Biz Azərbaycana gəlişimizdən çox məmnun olduq.
Cənab Prezident, dəvətə görə Sizə minnətdarlığımı bildirmək istəyirəm. Çox sağ olun ki, məni və nümayəndə heyətini Azərbaycana dəvət etdiniz. Biz qardaş ölkədə olmağımızdan çox məmnunuq. Həqiqətən də, burada olmaq bizim üçün böyük başucalığıdır. Azərbaycana gəldiyimiz dəqiqədən burada olan qonaqpərvərliyi və səmimiliyi hiss edirik.
Cənab Prezident, Sizinlə təkbətək görüş zamanı məlum oldu ki, bizim ümumi maraqlarımız çoxdur. Bu maraqlar həm siyasi sahəyə aiddir və müzakirə etdiyimiz bütün məsələlər üzrə biz ümumi məxrəcə gəldik. Hesab edirəm ki, iqtisadi sahədə də bizim ümumi maraqlarımız böyükdür.
Siyasi məsələlər üzrə bizim maraqlarımız üst-üstə düşür. Cənab Prezident, Kəşmir məsələsində Pakistanın mövqeyini dəstəklədiyinizə görə Sizə öz minnətdarlığımı bildirirəm. Bəyan etmək istərdim ki, Pakistan hər zaman Azərbaycan xalqı ilə birlikdə olacaqdır, Dağlıq Qarabağ məsələsində Sizin xalqınızın haqlı tələbini və mövqeyini dəstəkləyəcəkdir.
Bir halda ki, bizim ölkələrimiz və xalqlarımız arasında oxşarlıq vardır və tarixi baxımdan eyni köklərə malikdir, mədəniyyətlərimiz çox oxşardır, xalqlarımız eyni dinə qulluq edirlər, hesab edirəm ki, bütün bunlara söykənərək, iqtisadi və ticarət əlaqələrini daha da genişləndirmək, bu sahədə imkanlar axtarıb tapmaq lazımdır.
Müdafiə sahəsində də bizim ümumi maraqlarımız çoxdur. Biz uzun zaman apardığımız araşdırmalardan sonra bu qənaətə gəlmişik və bu sahədə sizə işbirliyi təklif etmək istəyirik. Biz sizin Müdafiə Nazirliyinizin nümayəndə heyətini böyük məmnuniyyətlə Pakistanda qəbul edəcəyik. Onlar bizim ölkədə həm təlim keçə, həm də istehsal olunan hərbi avadanlıqla tanış ola bilərlər.
İqtisadi sahədə əməkdaşlıq üçün geniş imkanlar mövcuddur. Hər şeydən əvvəl, düşünürəm ki, neft və qaz sahəsində işbirliyi üçün böyük potensial vardır. Biz burada birgə müəssisələr aça bilərik və Pakistan neftçiləri sizin neftçilərin zəngin təcrübəsindən faydalana bilərlər. İqtisadiyyatın digər sahələrində də imkanlar olduqca genişdir. Bizim maliyyə, bank sahələrində zəngin təcrübəmiz vardır. Bu qurumları təmsil edən şəxslər mənim nümayəndə heyətimə daxildirlər. Eyni zamanda, bizim sığorta sahəsində də geniş təcrübəmiz vardır. Biz sizə toxuculuq sahəsində işbirliyi təklif edə bilərik. Bilirik ki, Azərbaycan pambıq istehsal edən ölkədir. Nəzərinizə çatdırmaq istəyirəm ki, Pakistanda bu sahədə özəl sektor olduqca yaxşı inkişaf etmişdir. İnformasiya texnologiyaları və telekommunikasiya sahəsində də böyük təcrübəmiz vardır və bu sahədə də sizə əməkdaşlıq təklif edirik.
Sonda diqqətinizə çatdırmaq istəyirəm ki, müasir dövrdə, XXI əsrdə heç bir dövlət informasiya sahəsində mübadilə olmadan inkişaf edə bilməz. Ona görə də biz sizə elm sahəsində də təcrübə mübadiləsi təklif etmək istəyirik və bu, bizim xalqlarımızın inkişafına xidmət edəcəkdir. Onu da əlavə edim ki, biz beş nəfərin Pakistana gələrək bank və maliyyə sahəsində təhsil almaları üçün şərait yaratmağa hazırıq. Eyni zamanda, informasiya və kommunikasiya sahəsində biz sizin tələbələrin Pakistanda təhsil alması üçün 10 yer ayırmağa hazırıq.
Müdafiə sahəsində də sizin mütəxəssislər Pakistana gələ bilər və orada təcrübə keçə bilərlər. Bununla da biz əməkdaşlığımızı daha da möhkəmləndirərik.
Çox sağ olun.
Bölmənin digər xəbərləri
