AZƏRBAYCAN VƏ RUSİYA DİASPORLARI İKİTƏRƏFLİ ƏMƏKDAŞLIĞIN İNKİŞAFINDA MÜHÜM AMİLDİR
İnstitutun Rusiya Federasiyası XİN yanında Beynəlxalq Elmi və Mədəni Əməkdaşlıq Mərkəzi, Azərbaycan Respublikası Xarici Ölkələrdə Yaşayan Azərbaycanlılarla İş üzrə Dövlət Komitəsi ilə birgə təşkil etdiyi tədbirdə hər iki ölkənin dövlət orqanlarının, o cümlədən Rusiyanın ölkəmizdəki səfirliyinin, qeyri-hökumət təşkilatlarının nümayəndələri, deputatlar, alim və mütəxəssislər iştirak etmişlər.
İnstitutun direktoru, siyasi elmlər doktoru Rövşən Mustafayev tədbiri açaraq bildirmişdir ki, harada yaşamasından asılı olmayaraq, hər bir azərbaycanlının taleyi bizim üçün çox vacibdir. Biz öz ölkəmizdə tolerantlıq, dini dözümlülük ideyalarına əsaslanan cəmiyyət-vətəndaş cəmiyyəti qururuq. Məhz bu səbəbdən başqalarından öz soydaşlarımıza da belə münasibət bəsləməyi tələb etməyə haqqımız vardır.
Tədbirdə beynəlxalq əlaqələrdə müasir diasporun rolu, Rusiya və Azərbaycanın diaspor siyasəti, tendensiyaları, xüsusiyyətləri və əldə olunan təcrübə, Rusiya-Azərbaycan əlaqələrinin inkişafında diasporun imkanlarından istifadənin forma və modelləri ətraflı müzakirə edilmiş, səmərəli fikir mübadiləsi aparılmışdır.
Rusiya nümayəndə heyətinin başçısı, RF XİN yanında Beynəlxalq Elmi və Mədəni Əməkdaşlıq Mərkəzinin MDB və Baltik Ölkələrindəki Soydaşlarla İş üzrə İdarənin rəisi, siyasi elmlər doktoru Tatyana Poloskova, Azərbaycan Prezidenti İcra Aparatının məsul işçisi Fuad Axundov, Milli Məclisin deputatları Arif Rəhimzadə, Rövşən Rzayev, Ümumrusiya Azərbaycanlıları Konqresinin icraçı direktoru Eldar Quliyev, Xarici Ölkələrdə Yaşayan Azərbaycanlılarla İş üzrə Dövlət Komitəsinin şöbə müdiri Nazim Qaraxanov, Edinburq (Böyük Britaniya) Universitetinin professoru Qulamrza Təbrizi, Azərbaycan “Kitab” Cəmiyyətinin sədri Zərifə Salahova, “Naslediye Yevrazii” Fondunun prezidenti Yelena Yatsenko və başqaları çıxış edərək müzakirə olunan məsələyə münasibətlərini bildirmiş, dövlətlərarası əlaqələrin möhkəmləndirilməsində diasporun əhəmiyyətini vurğulamış, təkliflərini bildirmişlər.
Dəyirmi masada qətnamə qəbul olunmuşdur. Qətnamədə hər iki ölkənin çoxsaylı diasporuna dövlətlərarası və ictimai dialoqun inkişafında, etnosiyasət, miqrasiyanın nizamlanması, etnomədəni özünəməxsusluq məsələlərinə dair qərarların qəbulunda fəal iştirak tövsiyə olunur, millətlərarası ədavət yayanlara qarşı Rusiya və Azərbaycan ictimai təşkilatlarının, birliklərinin əlaqələndirmə sisteminin, o cümlədən diaspor siyasətinin aktual məsələlərinə dair danışıqlar aparmaq üçün daimi ekspert qrupunun yaradılması nəzərdə tutulur.
Dəyirmi masanın sonunda mətbuat konfransı keçirilmişdir.
Bölmənin digər xəbərləri
