AZƏRBAYCAN VOLEYBOLÇULARININ NÖVBƏTİ QƏLƏBƏSİ
Yanvarın 9-da Bakı İdman sarayında Avropanın “Top-komanda” kuboku uğrunda yarışda ikinci dövrənin ilk oyunu keçirilmişdir. Bakının “Azərreyl” komandası Belqorod (Rusiya) şəhərinin voleybolçularını qəbul etmişdir. Azərbaycan Milli Olimpiya Komitəsinin prezidenti, Milli Məclisin deputatı İlham Əliyev oyuna tamaşa etmişdir.
Gərgin idman mübarizəsi şəraitində keçən yarış Azərbaycan voleybolçularının qələbəsi ilə nəticələndi. Bu görüşü 3:2 hesabı ilə başa vuran komandamız yenə də altıncı qrupun lideridir.
Bakı idman sarayına toplaşan çoxsaylı tamaşaçılar güclü rəqibinə tam üstünlüklə qalib gələn “Azərreyl” komandası voleybolçularının bu uğurunu sürəkli alqışlarla, böyük ruh yüksəkliyi ilə qarşıladılar.
Milli Olimpiya Komitəsinin prezidenti, Milli Məclisin deputatı İlham Əliyev yarışdan sonra Azərbaycan televiziyasının müxbirinə müsahibə vermişdir:
MÜXBİR: Bütün məşqçilərin, idman həvəskarlarının, mütəxəssislərinin yekdil rəyinə görə Azərbaycanda idmanın dirçəldilməsində ilk növbədə Milli Olimpiya Komitəsinin prezidenti, Milli Məclisin deputatı İlham Əliyevin böyük xidmətləri vardır. İlham müəllim, bu qələbə münasibətilə sizi təbrik edirik. Oyun haqqında təəsüratınızı bilmək istərdik.
İLHAM ƏLİYEV: Sağ olun, mən də sizi, tamaşaçıları, idman həvəskarlarını təbrik edirəm. Oyun çox gərgin keçdi. Bunu hamımız gördük. Rusiya komandası həqiqətən çox güclüdür. Deyə bilərəm ki, Belqorodun “Universitet” komandasının üzvləri Rusiya milli yığma komandasının əsasını təşkil edirlər. Buna baxmayaraq, bizim voleybolçu qızlarımız növbəti dəfə də sübut etdilər ki, Azərbaycan idmanı güclüdür, bizim komandamız bütün başqa komandalardan üstündür, Azərbaycan idmanı çox yüksək zirvədədir.
Mən çox şadam, çox böyük həyəcan, sevinc içərisindəyəm. Bu iki saat ərzində bizim hamımız burada çox böyük sevinc hissi keçirdik. Bəzi hallarda, komandamız birinci oyunu uduzanda çox məyus olduq, amma yenə də inanırdıq ki, qızlarımız qələbə qazanacaqlar. Sizi bir də təbrik edirəm.
MÜXBİR: Qələbə çox çətinliklə başa gəldi. Tamaşaçılar arasında bəlkə də bu qələbəyə şübhə edənlər var idi. Həmin anlarda siz hansı hissləri keçirirdiniz?
İLHAM ƏLİYEV: Bilirsiniz, bu idmandır. Idmanda hər şey ola bilər. Bizim tamaşaçılarımız, idmançılarımızın bütün yarışlarda qələbə qazanmasına adət ediblər. Bu çox sevindirici haldır. Çünki, həqiqətən son illər ərzində Azərbaycan idmanı çox böyük nailiyyətlər əldə edibdir. Bizim hamımız belə fikirdəyik ki, daim qələbə qazanmalıyıq. Belə də olmalıdır. Amma idmanda hər şey olur.
Şəxsən mən inanırdım ki, qələbə bizimlə olacaqdır. Çünki buna bizim haqqımız daha çoxdur. Belə də oldu.
MÜXBİR: İlham müəllim, yəqin ki, bu qələbə ölkəmizdə voleybolun inkişafına yeni, güclü bir təkan verəcəkdir. Respublika birinciliyində bundan sonra daha çox komanda iştirak edəcəkdir. Yəqin ki, Milli Olimpiya Komitəsində də idmanın bu növünün gələcək inkişafına dair yeni tədbirlər görüləcəkdir. Ümumiyyətlə, bu sahədə planlarınızı, fikirlərinizi bilmək istərdik.
İLHAM ƏLİYEV: Bilirsiniz, son bir il ərzində Milli Olimpiya Komitəsi Azərbaycanda voleybolun inkişafına çox böyük qayğı göstərmişdir. Milli Olimpiya Komitəsi bu bir il ərzində Voleybol Federasiyasi ilə birlikdə demək olar ki, böyük işlər görmüşdür. MOK mütəmadi olaraq idmançılarımıza, federasiyaya, bizim komandalara yardımlar göstərir. Ona görə də biz inanırıq ki, voleybolçularımız dünya səviyyəsində çox yüksək yer tuta bilərlər. Bugünkü oyun da bunun əyani sübutudur. Çünki, bayaq dediyim kimi Belqorod şəhərinin “Universitet” komandası Rusiyanın bir nömrəli komandasıdır. Rusiyanın bu komandası həm də dünyanın beş güclü komandasından biridir. İnanıram ki, voleybolçularımız, olimpiya oyunlarında da, dünya cempionatında da iştirak edəcək və yeni-yeni qələbələr qazanacaqdır. Mən sizi də, tamaşaçıları da, idman sevərləri və bütün Azərbaycan xalqını da bu böyük qələbə münasibətilə bir daha təbrik edirəm.
MÜXBİR: İlham müəllim, çox sağ olun. Sizi bir daha təbrik edirik və sizə yeni qələbə sevincləri arzulayırıq.
İLHAM ƏLİYEV: Sağ olun.
Bölmənin digər xəbərləri
