Azərbaycan Xalça Muzeyində “Zamanın ilmələri” layihəsi təqdim edilib
Bakı, 26 may, Mikayıl Məmmədov, AZƏRTAC
Azərbaycan Milli Xalça Muzeyində “Zamanın ilmələri” adlı layihənin təqdimatı olub.
AZƏRTAC xəbər verir ki, tədbir Mədəniyyət Nazirliyi, Azərbaycan Milli Xalça Muzeyi və HüsnART Müstəqil Bədii Birliyinin təşkilatçılığı ilə reallaşıb. Layihə 1 İyun – Uşaqların Beynəlxalq Müdafiəsi Gününə həsr olunub.
Tədbir çərçivəsində Xalq rəssamı, görkəmli qrafika ustası, professor Arif Hüseynovun fərdi sərgisi açılıb. Ekspozisiyada 2024–2025-ci illərdə yaradılmış və xalçanın yaranma mərhələlərini ardıcıllıqla əks etdirən əsərlər nümayiş etdirilib. Qarışıq texnikada kətan üzərində işlənmiş 20-dən artıq qrafik əsər müəllifin xalçaçılığa, milli adət-ənənələrə olan sevgisini əks etdirir və maraqlı süjet xəttində birləşir.
Tədbirin açılışında Azərbaycan Milli Xalça Muzeyinin direktoru Əminə Məlikova çıxış edərək sərginin təşkili barədə danışıb və onun maarifləndirici xarakter daşıdığını vurğulayıb. Ardınca süni intellekt vasitəsilə hazırlanmış qısa videoçarx təqdim olunub.
Milli Məclisin deputatı, parlamentin Mədəniyyət komitəsinin sədr müavini Günay Əfəndiyeva çıxışında Arif Hüseynovun yaradıcılığının çoxşaxəliliyini qeyd edib, layihə münasibətilə təbriklərini çatdıraraq uğurlar arzulayıb.
Azərbaycan Rəssamlar İttifaqı sədr müavini, Xalq rəssamı, professor Ağəli İbrahimov bildirib ki, Arif Hüseynovun əsərləri zamanla xalqın kollektiv yaddaşının bir hissəsinə çevriləcək.
Tanınmış siyasətçi və dövlət xadimi Həsən Həsənov da çıxış edərək rəssamı sərgi münasibətilə təbrik edib və onun yaradıcılığında yenilik ruhunu daima duyduğunu vurğulayıb.
“Azad Azərbaycan” Teleradio şirkətinin Bədii Şurasının sədri Etibar Babayev və Xalq yazıçısı Natiq Rəsulzadə isə rəssamın hər bir sərgisində yüksək sənətkarlıq nümayiş etdirdiyini bildiriblər: “Hər sərgidə Arif bizi təəccübləndirir. Mövzular dəyişsə də, yaradıcılıq səviyyəsi daim yüksək olaraq qalır”.
Daha sonra çıxış edən xalq rəssamı Arif Hüseynov bu sərgini özünün ən vacib layihələrindən biri kimi dəyərləndirib: “Bu gün mənim ən yaxşı sərgimdir”.
Tədbir çərçivəsində mədəni proqram da təqdim olunub. 3 saylı Uşaq və Gənclər İnkişaf Mərkəzinin dərnək üzvləri “Zaman xətləri” layihəsinə xüsusi olaraq hazırlanmış rəqs kompozisiyası ilə çıxış ediblər. İlk dəfə təqdim olunan bu rəqs tamaşaçılar tərəfindən böyük maraqla qarşılanıb.
Qonaqlar sərgi ilə tanış olduqdan sonra əsərlərin süni intellekt vasitəsilə canlandırıldığı və süjet xəttinə uyğun videoçarx formasında təqdim edildiyi ekspozisiyanı izləyiblər.
Bundan əlavə, uşaqların xalçanın yaranma mərhələləri ilə tanışlığı və milli irsə marağının artırılması məqsədilə muzeyin Uşaq şöbəsi “Xalça necə yaranır?” adlı yeni ustad dərs təşkil edib. Dərs zamanı uşaqlar qoyunun qırxılması, yun daranması və ip əyrilməsi, həmçinin xalça toxunuşu proseslərinin şahidi və iştirakçısı olublar.
AZƏRTAC-a müsahibəsində Arif Hüseynov təəssüratlarını bölüşüb: “Bu gün xalçaçılıq prosesinə həsr olunmuş növbəti fərdi sərgim baş tutur. Bu, çox maraqlı və dərin məzmunlu prosesdir. İlk növbədə sərgi gənclər üçün nəzərdə tutulub, çünki vacibdir ki, onlar öz mədəniyyətlərini tanısın və qiymətləndirsinlər. Açılışın yüksək səviyyədə keçməsinə çox sevinirəm. Bir ay davam edəcək sərgiyə hər kəsi dəvət edirəm”.
Qeyd edək ki, sərgi və ustad dərsləri iyunun 26-dək davam edəcək.
Bölmənin digər xəbərləri
