Azərbaycan Xalq Cümhuriyyəti dövlətçilik tariximizin şərəfli səhifəsidir
Bakı, 23 may, AZƏRTAC
Mayın 23-də Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası Azərbaycan Xalq Cümhuriyyətinin 100 illiyinə həsr olunan “Müsəlman Şərqində ilk demokratik respublika” adlı elmi-praktiki konfrans keçirib.
AZƏRTAC xəbər verir ki, tədbirdə çıxış edən Şuranın sədri, Milli Məclisin deputatı Azay Quliyev müsəlman Şərqinin ilk demokratik respublikası - Azərbaycan Xalq Cümhuriyyətinin dövlətçilik tariximizin şərəfli və parlaq səhifəsi olduğunu söyləyib. Azərbaycan Xalq Cümhuriyyətinin fəaliyyəti haqqında danışan A.Quliyev bildirib ki, insan hüquq və azadlıqlarının bərqərar olması, etnik və dini mənsubiyyətdən asılı olmayaraq bütün vətəndaşların bərabər hüquqlarının tanınması, bir çox Avropa ölkələrindən daha əvvəl qadınlara seçki hüququnun verilməsi, Azərbaycan dilinin dövlət dili elan edilməsi, nizami milli ordunun, dövlətin vacib strukturlarının qurulması - bütün bunlar Cümhuriyyətin yürütdüyü siyasəti xarakterizə edir.
Vurğulanıb ki, 1991-ci ildə ikinci dəfə müstəqillik qazanan Azərbaycanın müstəqilliyinin qorunub saxlanılmasında və möhkəmlənməsində ulu öndər Heydər Əliyevin xüsusi rolu olub. Prezident İlham Əliyev Ulu Öndərin siyasi kursunu uğurla davam etdirir. Dövlətimizin başçısının 2018-ci ili ölkəmizdə “Azərbaycan Xalq Cümhuriyyəti İli” elan etməsi dövlətçilik tariximizə verilən ən böyük qiymətdir.
Azərbaycan Milli Elmlər Akademiyasının A.A.Bakıxanov adına Tarix İnstitutunun direktoru, Milli Məclisin deputatı Yaqub Mahmudov müsəlman Şərqində ilk demokratik respublikanın məhz Azərbaycanda yaradılmasının əhəmiyyətini vurğulayıb. Qeyd olunub ki, tarixin ən çətin, ən mürəkkəb dövründə yaranan Azərbaycan Xalq Cümhuriyyəti demokratik ənənələrə malik idi. Cümhuriyyətin yaranması tarixi bir hadisə idi. Azərbaycan Xalq Cümhuriyyəti dünya tarixində öz demokratikliyi ilə seçilirdi.
Diqqətə çatdırılıb ki, sovet dövründə Azərbaycan Xalq Cümhuriyyətinin adı belə çəkilmirdi, indi isə həmin dövrün həqiqi tarixi dərindən öyrənilir və təqdim olunur. Ümummilli liderimiz Heydər Əliyev Azərbaycan Xalq Cümhuriyyətinin tarixinə, ölkəmizlə bağlı həqiqətlərin üzə çıxarılmasına və dünyaya çatdırılmasına hər zaman böyük diqqət yetirib. Azərbaycan xalqının bu möhtəşəm tarixinin dünyaya çatdırılmasında Ulu Öndərin böyük xidmətləri var. Onun tapşırığı ilə Tarix İnstitutu Cümhuriyyət tarixini əhatə edən çoxcildli kitablar nəşr etdirib. Bu gün bu ənənə Prezident İlham Əliyev tərəfindən yaşadılır. 2014-cü ildə Tarix İnstitutu 2004-2005-ci illərdə nəşr olunmuş iki cilddən ibarət Azərbaycan Xalq Cümhuriyyəti Ensiklopediyasını yenidən işləyərək çap etdirib.
Çıxışlardan sonra Azərbaycan Xalq Cümhuriyyətinin 100 illiyinə həsr olunmuş film nümayiş etdirilib.
Daha sonra tədbir müzakirələrlə davam edib.
Bölmənin digər xəbərləri
