AZƏRBAYCAN YUNESKO-NUN ALİ ORQANINA ÜZV SEÇİLMİŞDİR

17.10.2005 [11:42]
Çap et
A⁺ A^-

Azərbaycanın BMT-nin Təhsil, Elm və Mədəniyyət Məsələləri üzrə Təşkilatı (YUNESKO) yanındakı daimi nümayəndəliyinin rəhbəri səfir Eleonora Hüseynova AZƏRTAC-ın xüsusi müxbirinə bildirmişdir ki, qurumun oktyabrın 3-8-də keçirilmiş Baş Konfransının 33-cü sessiyasının ümumi iclaslarında siyasi məsələlərə həsr olunmuş müzakirələrdə üzv ölkələrin nümayəndə heyətlərinin rəhbərləri, o cümlədən 127 dövlətin naziri iştirak etmişdir. Müzakirələrə yekun vurmuş baş direktor çıxışında natiqlərin qaldırdıqları məsələlərə münasibətini bildirmiş, təşkilatın gələcək fəaliyyəti, aparılan islahatlar və digər mühüm məsələlər barədə danışmışdır. Azərbaycanın xarici işlər naziri Elmar Məmmədyarov və təhsil naziri Misir Mərdanov bu müzakirələrdə çıxış etmişlər.

Ümumi iclaslardan sonra oktyabrın 11-dən etibarən Baş Konfransın beş əsas istiqamətini əhatə edən komissiyalar öz işinə başlamışdır. Konfransda fəal iştirak edən ölkəmiz müxtəlif məsələlər üzrə birinci və kommunikasiya sahələrini əhatə edən beşinci komissiyalara, həmçinin qurumun Hüquq Komitəsinə üzv seçilmişdir.

Təşkilatın ali orqanı hesab edilən İcraiyyə Şurasına üzvlüklə bağlı oktyabrın 14-də keçirilmiş seçkilərdə, ikinci qrupdan namizədliyi irəli sürülmüş Azərbaycan səsvermənin nəticələrinə görə, növbəti dörd il müddətinə bu orqana üzv seçilmişdir.

Bu beynəlxalq təşkilata üzv olan 199 dövlət arasından ölkəmizin qurumun ali orqanı İcraiyyə Şurasına, habelə iki komissiyaya və Hüquq Komitəsinə üzv seçilməsi beynəlxalq aləmdə onun imicinin və nüfuzunun getdikcə artmasından və ona göstərilən etimaddan xəbər verir.

AZƏRBAYCAN YUNESKO-NUN ALİ ORQANINA ÜZV SEÇİLMİŞDİR

MÜƏLLİFLƏ ƏLAQƏ

Bölmənin digər xəbərləri