İDMAN
AZƏRBAYCANDA GİMNASTİKA ÜZRƏ İKİ ÇEMPİONAT KEÇİRİLƏCƏK
Noyabrın 27-29-da Olimpiya ehtiyat qüvvələrinin idman litseyində idman gimnastikası üzrə Azərbaycan çempionatı keçiriləcəkdir. Gimnastika Federasiyasının baş katibi Çingiz Şamilov AZƏRTAC-ın müxbirinə bildirmişdir ki, turnirdə təxminən 70 idmançı - idman ustaları, ustalığa namizədlər və birinci dərəcəli idmançılar iştirak edəcəklər. Çempionatdan əsas məqsəd milli yığma komandamızın ehtiyat qüvvələrini və məşqçilərin işini nəzərdən keçirməkdir. Yarışların qalibləri çoxnövçülükdə qazanılan nəticələrin yekunlarına görə müəyyən ediləcəkdir.
Noyabrın 28-29-da isə idman gimnastikası məktəbində tramplin-tamblinq üzrə Azərbaycan çempionatı keçiriləcəkdir. Çempionatda Dəvəçi rayonunun, Nizami rayonu idman məktəbinin və idman gimnastikası məktəbinin nümayəndələri iştirak edəcəklər. Avro-2004 yarışlarında iştirak edəcək yığma komandamızın tərkibi bu çempionatın nəticələrinə əsasən müəyyənləşdiriləcəkdir.