Azərbaycanın Beynəlxalq Astronavtika Konqresinə ev sahibliyi etməsi dövlətimizin nüfuzunun göstəricisidir – ŞƏRH
Bakı, 6 oktyabr, AZƏRTAC
Azərbaycanın növbəti qlobal tədbirə - Beynəlxalq Astronavtika Konqresinə ev sahibliyi etməsi dövlətimizin nüfuzunun göstəricisidir. Belə bir mötəbər konfransın, xüsusilə Azərbaycanın suverenliyinin tam bərpasından sonra reallaşması çox önəmli məqamdır. Adətən bu cür beynəlxalq tədbirlər dünyanın diqqət mərkəzində olmaqla yanaşı, orada səsləndirilən fikirlər, irəli sürülən konsepsiyalar iştirakçı dövlətlər tərəfindən maraqla qarşılanır. Konqresə 100-dən artıq ölkəni təmsil edən 5000-dən çox iştirakçının qatılması isə tədbirin əhəmiyyətini artırır.
Bu sözləri AZƏRTAC-a açıqlamasında politoloq Tural Əliyev söyləyib.
O qeyd edib ki, “Əsrin müqaviləsi”nin imzalanması ilə 1994-cü ildə neft strategiyasının əsasının qoyulması ilə təkcə regiona deyil, Avropanın enerji təhlükəsizliyinə də töhfə verildi. Bunun əksinə olaraq, hazırda bəzi Qərb siyasi dairələri bölgənin sabitlik məkanına çevrilməməsi üçün dəridən-qabıqdan çıxırlar. Azərbaycan isə Avropa İttifaqı (Aİ) dövlətləri ilə əlaqələrini genişləndirdiyi üçün bu prosesə mane olmaq istəyən qüvvələrin niyyətləri baş tutmur və uzunmüddətli perspektivdə də reallaşacağı ehtimal edilmir.
“Beynəlxalq Astronavtika Konqresinin əhəmiyyətini artıran digər məqamlardan biri də Azərbaycan Prezidentinin Konqresin açılışındakı çıxışında yer alan mühüm mesajlar idi. Dövlətimizin başçısı tədbir iştirakçılarına Azərbaycanın müstəqillik qazandıqdan sonra üzləşdiyi siyasi və iqtisadi çətinliklər barədə dolğun məlumatlar verdi. Ermənistanın destruktiv siyasəti nəticəsində Qarabağın 30 ilə yaxın bir müddətdə işğal altında qalması və dövlətimiz mübarizə konturlarını müəyyənləşdirib separatizmin kökünü kəsərək regionu cinayətkar xunta rejimindən xilas etməsi diqqətə çatdırılan vacib məqamlardan idi.
Prezident İlham Əliyev çıxışı zamanı, həmçinin Cənubi Qafqazda sülhün artıq təməl prinsiplərinin əsaslı şəkildə həyata keçirilməsinin tam zamanı çatdığını, Ermənistanın isə konstruktiv dialoqa başlamasının vacibliyini vurğuladı. Ümumiyyətlə, Azərbaycan Prezidentin çıxışlarında etibarlılıq, qarşıya qoyulan məram və məqsədlərə doğru inamla irəliləmək diqqət çəkən əsas xüsusiyyətlərdəndir. Bu keyfiyyətləri xarici dövlət başçıları, beynəlxalq beyin mərkəzləri də təsdiqləyirlər. Hətta nə qədər təəccüblü səslənsə də, Ermənistanda belə bəzi siyasətçilər bu fikirləri etiraf etmək məcburiyyət qalırlar”, - deyə politoloq əlavə edib.
T.Əliyev vurğulayıb ki, Ermənistanın istər əvvəlki siyasi hakimiyyəti, istərsə də hazırkı rəhbərliyi zamanında dövlətimizin başçısının bəyanatlarından, xəbərdarlıqlarından rasional nəticə çıxarsaydı, bu gün bu ölkə ağır siyasi və iqtisadi duruma düşməzdi.
Vətən müharibəsi bitdikdən sonra imzalanan üçtərəfli Bəyanatla üzərinə götürdüyü öhdəliyi yerinə yetirməyən - öz hərbi birləşmələrini Azərbaycan ərazilərindən çıxarmaq istəməyən Ermənistana Azərbaycan tərəfindən dəfələrlə xəbərdarlıqlar olundu. Rəsmi İrəvan isə bunun əksinə olaraq yeni havadarlar axtarışına çıxdı və öz siyasi taleyinin həll olunduğu regionu münaqişə zonasına çevirməyə yönələn addımlar atdı. Üç ilə yaxın müddətdə edilən xəbərdarlıqlara baxmayaraq, Ermənistan Qarabağdan qanunsuz silahlı birləşmələrinin çıxarılması istiqamətində heç bir addım atmadı, əksinə, terrorçuları maliyyələşdirdi. Bu da Azərbaycan Ordusunun lokal xarakterli antiterror tədbirləri həyata keçirməsini zəruri etdi. Xüsusi peşəkarlıqla aparılan antiterror tədbirləri zamanı mülki obyektlərə zərər vurulmadan xunta rejiminin varlığına son qoyuldu. Dünyada məşhur hərbi və siyasi ekspertlər Azərbaycanın zərgər dəqiqliyi ilə həyata keçirdiyi 24 saatlıq tədbirləri yüksək peşəkarlıq nümunəsi kimi dəyərləndirirlər.
Bölmənin digər xəbərləri
