Azərbaycanın biznes və investisiya imkanları Gürcüstanda yüksək qiymətləndirilib
Tbilisi, 5 mart, AZƏRTAC
Azərbaycanın biznes və investisiya imkanları barədə təqdimat Gürcüstanda maraqla qarşılanıb.
AZƏRTAC xəbər verir ki, Tbilisidə keçirilən Azərbaycan-Gürcüstan iş adamlarının biznes forumunda “Azərbaycanda biznes və investisiya mühiti” mövzusunda təqdimat olub.
Azərbaycanda İxracın və İnvestisiyaların Təşviqi Fondunun (AZPROMO) İnvestisiyaların təşviqi departamentinin direktoru Zöhrab Qədirov forumda çıxış edərək ölkəmizdə biznesin qurulması üçün mövcud qanunvericilik bazası, biznes və investisiya imkanları barədə məlumat verib. O, Azərbaycanın xarici ölkələrdə açdığı ticarət evləri, ölkədə yaradılan sənaye, texnoloji parklar və həmin parklarda təklif olunan vergi güzəştləri barədə danışıb.
Bildirilib ki, Azərbaycan və Gürcüstan birgə müəssisələr yarada, investisiyalar cəlb edə bilər, eyni zamanda, hər iki ölkəyə turistlərin cəlbi sahəsində fəal əməkdaşlıq edə bilər.
Avropa İttifaqı-Gürcüstan Biznes Şurasının baş katibi Zviad Çumburidze təqdim olunan layihə və imkanları yüksək qiymətləndirib, bu cür görüşlərin mütəmadi keçirilməsinin vacibliyini qeyd edib. Bildirib ki, belə təqdimatlar ikitərəfli əməkdaşlığı genişləndirmək üçün gürcüstanlı iş adamları qarşısında geniş imkanlar açır.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
