Azərbaycanın daha 3 boksçusu Avropa çempionatında yarımfinala yüksəlib
Bakı, 23 oktyabr, AZƏRTAC
Azərbaycan millisinin daha 3 boksçusu Monteneqronun Budva şəhərində keçirilən U-15 Avropa çempionatında qələbə qazanıb.
Boks Federasiyasından AZƏRTAC-a bildirilib ki, turnirin beşinci günündə Elcan Musazadə (50 kiloqram) 1/4 finalda Tobais Viçeniklə (Çexiya) qarşılaşıb. Təmsilçimiz ardıcıl üçüncü görüşündən də qalib ayrılıb – 5:0 (30:27, 30:27, 30:27, 30:26, 30:27). O, yarımfinalda Şeyn Kitlə (İngiltərə) üz-üzə gələcək.
Yusif Ağakişiyev (75 kiloqram) də 1/4 final mərhələsindəki döyüşünü öz xeyrinə bitirib. Ona Giorge Bratunu (Rumıniya) məğlub etməyə cəmi 45 saniyə kifayət edib. Tam üstünlüklə qələbə qazanan boksçu yarımfinalda Oleksandr Tomiçlə (Ukrayna) qarşılaşacaq.
Mehran Rəsulov (80 kiloqram) isə 1/4 finalda Giorgi Quledanini (Gürcüstan) məğlub edib – 5:0 (30:27, 30:27, 30:27, 30:27, 30:27). O, növbəti görüşündə Valeri Todorovla (Bolqarıstan) gücünü yoxlayacaq.
Hər 3 milli üzvü yarımfinala yüksəlməklə özləri üçün azı bürünc medalı təmin edib. Onlardan öncə 2 oğlan və 2 qız boksçumuz da bu hüquqa yiyələnib.
Avropa çempionatında 1/4 final döyüşləri bu gün də davam edəcək.
Qeyd edək ki, 32 ölkədən 369 idmançının qatıldığı yarışa oktyabrın 25-də yekun vurulacaq. Qız idmançılarda oktyabrın 23-də, oğlanlarda ertəsi gün yarımfinal görüşləri baş tutacaq.
Bölmənin digər xəbərləri
