Azərbaycanın İtaliyadakı səfiri erməni deputatın cavabını verib
Roma, 3 oktyabr, AZƏRTAC
Azərbaycanın İtaliyadakı səfiri Məmməd Əhmədzadə bu ölkənin “Radio Sparlamento” radiosunun “RİSİKO” verilişinin Ermənistan-Azərbaycan münaqişəsinin səbəblərinə həsr olunmuş 30 sentyabr tarixli buraxılışında iştirak edib. Verilişdə, habelə italyan jurnalistlər Antonio Albanese və Graziella Giangiulio, eləcə də Ermənistan parlamentində İtaliya ilə dostluq qrupunun sədri Maria Karapetyan da iştirak edib.
Erməni deputatın Ermənistan-Azərbaycan Dağlıq Qarabağ münaqişəsi və hazırda baş verən hərbi əməliyyatlara dair cəfəng fikirlərinə cavab olaraq, Azərbaycan diplomatı münaqişənin tarixi, Ermənistanın Azərbaycana qarşı təcavüzü, beynəlxalq təşkilatlar tərəfindən qəbul edilmiş və Azərbaycanın haqlı mövqeyini dəstəkləyən sənədlər, münaqişənin sülh yolu ilə həlli istiqamətində ölkəmizin hər zaman göstərdiyi konstruktiv yanaşma, lakin Ermənistan tərəfindən danışıqların uzadılması və status-kvonun saxlanılması cəhdləri, xüsusilə də son aylarda Ermənistanın davamlı təxribatçı addımları barədə ətraflı məlumat verib.
Diplomat 27 sentyabr tarixində Ermənistan silahlı qüvvələrinin Azərbaycana qarşı yeni hərbi təcavüz cəhdləri və bunun qarşısını almaq istiqamətində Azərbaycan Silahlı Qüvvələrinin gördüyü cavab tədbirləri barədə danışıb, hərb meydanında məğlub olmaqda olan erməni tərəfinin yeni təxribatlara əl atdığını və ölkəmizə qarşı yeni dezinformasiya kampaniyasına başladığını deyib və erməni tərəfinin yaydığı yalanları müvafiq arqumentlərlə ifşa edib.
Səfir, eləcə də jurnalistlərin hərbi əməliyyatlar, münaqişənin həlli və aidiyyəti mövzuda digər suallarını cavablandırıb.
Radio verilişini aşağıdakı keçiddən dinləmək mümkündür:
Elgün Niftəli
AZƏRTAC-ın xüsusi müxbiri
Roma
Bölmənin digər xəbərləri
