Azərbaycanın müasir tarixinin bütöv bir mərhələsi Ulu Öndərin adı ilə bağlıdır
Qax, 12 iyul, Mustafa Dadaşov, AZƏRTAC
Azərbaycanın dövlətçilik ənənələrinin bərpası, müstəqil dövlət quruculuğuna aparan yol, ölkəmizin iqtisadi qüdrətinin artması məhz 1969-cu il iyulun 14-dən - Ümummilli Lider Heydər Əliyevin ilk dəfə siyasi hakimiyyətə gəlməsindən sonra başlayıb. Ulu Öndərin hakimiyyətdə olduğu illər Azərbaycanın quruculuq salnaməsinin ən parlaq səhifəsini təşkil edir.
AZƏRTAC-ın bölgə müxbiri xəbər verir ki, bu fikirlər Ümummilli Lider Heydər Əliyevin Azərbaycanda hakimiyyətə gəlməsinin ildönümü münasibətilə iyulun 12-də Qax şəhərində keçirilən toplantıda səsləndirilib.
Rayon rəhbərliyi və ictimaiyyət nümayəndələri əvvəlcə Ulu Öndərin abidəsi önünə gül dəstələri düzüb, xatirəsini ehtiramla yad ediblər.
Heydər Əliyev Mərkəzində keçirilən tədbirin əvvəlində Dövlət Himni səsləndirilib, Ümummilli Liderin və şəhidlərin xatirəsi bir dəqiqəlik sükutla anılıb.
Tədbirdə çıxış edən rayon icra hakimiyyətinin başçısı Musa Şəkiliyev bildirib ki, ötən əsrin 70-ci illərindən etibarən Azərbaycanın siyasi həyatı və bütövlükdə cəmiyyətimiz Ulu Öndərin böyük səyləri nəticəsində özünün yeni inkişaf mərhələsinə qədəm qoyub. Azərbaycanın müasir tarixinin bütöv bir mərhələsi, eləcə də müstəqil dövlətimizin inkişafı məhz Ümummilli Liderin adı və fəaliyyəti ilə bağlıdır. Əlli beş il əvvəl respublika rəhbərliyinə yüksələn Heydər Əliyev özünün dərin zəkası, liderlik xarizması, milli ideallara, adət-ənənələrə möhkəm bağlılığı, zəngin idarəçilik keyfiyyətləri ilə ölkəmizin gələcək inkişafı üçün möhkəm zəmin yaradıb.
Vurğulanıb ki, Azərbaycanın XX əsrdəki inkişafının əsası 1969-cu ilin 14 iyulunda qoyulub. Həmin tarixdə siyasi hakimiyyətə gələn dahi şəxsiyyət Heydər Əliyev, sözün həqiqi mənasında, böyük bir xalqın həyatında möhtəşəm dəyişikliyə nail olub, milli, müstəqil dövlətin qurulması üçün zəruri olan bütün işləri görüb.
Tədbirdə rayon icra hakimiyyəti başçısının müavini, İctimai-siyasi və humanitar məsələlər şöbəsinin müdiri Vəfa Heydərovanın “14 iyul 1969-cu il - Müstəqil və qüdrətli Azərbaycanın təməlinin qoyulduğu gün” mövzusunda məruzəsi dinlənilib. Məruzədə Ümummilli Liderin zəngin həyat yolu və çoxşaxəli fəaliyyətindən geniş bəhs olunub.
Diqqətə çatdırılıb ki, dahi rəhbərin hakimiyyətdə olduğu illərdə respublikamızın hər yerində, o cümlədən Qax rayonunda böyük quruculuq işləri görülüb, rayon iqtisadiyyatı sürətlə inkişaf edib, yeni istehsal müəssisələri fəaliyyətə başlayıb. Həmin illərdə rayonda onlarla sosial təyinatlı obyekt, o cümlədən təhsil, səhiyyə və mədəniyyət ocaqları tikilib istifadəyə verilib, yeni yollar çəkilib, körpülər salınıb.
Tədbirdə YAP Qax rayon təşkilatının sədri Natiq Allahverdiyev, rayon Təhsil sektorunun müdiri Babək Heydərov, “Aztelekom” MMC-nin Şimal-qərb regional filialının rayon şöbəsinin müdiri Səxavət Rəşidli və rayon Heydər Əliyev Mərkəzinin direktoru vəzifəsini icra edən Arzu Dunusova çıxış ediblər.
Sonda Ulu Öndərə həsr olunan film nümayiş etdirilib.
Bölmənin digər xəbərləri
