Azərbaycanın müdafiə sənayesi kompleksinin müəllifi Prezident İlham Əliyevdir - Hərbi şərhçi
Bu gün biz Qalib xalqıq, qələbənin müəllifi isə məhz Prezident İlham Əliyev və onun qəhrəman Ordusudur
Bakı, 16 oktyabr, AZƏRTAC
Azərbaycanın müdafiə potensialının gücləndirilməsi istiqamətində 1993-cü ildən başlanan planlı və inkişafa yönəlmiş addımlar 2003-cü ildən Azərbaycan Prezidenti İlham Əliyevin hakimiyyətə gəlməsindən sonra daha geniş və sistemli şəkil aldı. İlham Əliyev yaxşı anlayırdı ki, hərbi qüdrəti stimullaşdıran amillərdən biri də iqtisadi potensial, yəni maliyyə vəsaitləridir. Bu səbəbdən də 2003-2008-ci illərdə Azərbaycanın müdafiə xərcləri təxminən üç dəfəyədək artırıldı. Paralel olaraq ordu və silahlı qüvvələrin digər qoşun növlərində uğurlu kadr və struktur islahatları həyata keçirildi. Cəbhəboyu ordu birləşmələrinin komandir heyəti arasında islahatlar, peşəkar ordu formalaşdırılması istiqamətində sərt addımlar atıldı. Müdafiə Nazirliyinin Xüsusi Təyinatlı Qüvvələri birbaşa Prezident İlham Əliyevin nəzarətində özünün yeni inkişaf dövrünə qədər qoydu və bu doğru addım Vətən müharibəsində yerüstü əməliyyatlarda Azərbaycan Ordusuna şanlı Qələbə qazandırdı.
Bunu AZƏRTAC-a açıqlamasında Xəzər Müdafiə Tədqiqatları Mərkəzinin rəhbəri, hərbi şərhçi Ramil Məmmədli bildirib.
O qeyd edib ki, müasir müharibələrdə şəxsi heyətin yüksək peşəkarlığı və döyüş bacarığı öz əhəmiyyətini saxlasa da vacib amillərdən biri də ordunun silah-texnika parkının imkanları ilə bağlıdır. Qarşıya çıxan suallardan biri də bu mənada Azərbaycanın silah-texnika parkının yenilənməsi istiqamətində əməkdaşlıq edəcəyi ölkələrlə bağlı idi. Dövlətimizin başçısı İlham Əliyevin düzgün beynəlxalq siyasi gedişləri Azərbaycan üçün hərbi-strateji tərəfdaşların yaranmasına gətirib çıxardı. Bu sırada əsas yerləri Türkiyə, Rusiya, İsrail və Pakistan tutdu. Qısa müddətdə Azərbaycan həmin ölkələrlə strateji silah və texnologiyaların satınalınması, o cümlədən birgə layihələrə start verdi. Bununla da Azərbaycan Ordusunun raket-artilleriya, zirehli texnika, pilotsuz uçuş aparatları (PUA), döyüş-aviasiya vasitələri, zenit-raket kompleksləri əsaslı olaraq yeniləndi. Hətta, Azərbaycan keçmiş SSRİ və bölgə ölkələri arasında ayrıca kəşfiyyat-müşahidə və döyüş PUA-ları bölməsini yaradan ilk ölkə oldu. Biz bu strateji qərarın vacibliyinin 2020-ci ildə Vətən müharibəsində və ötən üç il ərzində həyata keçirilən antiterror tədbirlərində şahidi olduq. 2023-cü il sentyabrın 19-da həyata keçirilən lokal antiterror tədbirinin 23 saat çəkməsi də məhz bu amillərlə bağlı idi. Lokal adlandırdığımız bu antiterror tədbirlərinin əslində kifayət qədər geniş ərazidə, özü də dağlıq relyefdə həyata keçirildiyini unutmayaq. Bu antiterror tədbirlərində Azərbaycan hərbçisi şəxsi döyüş bacarığı ilə yanaşı, Ordumuz silah-texnika imkanlarını bir daha nümayiş etdirdi. Düşmən postunu bir neçə yüz kilometr məsafədən, yüksək dəqiqliklə məhv edilməsi bu dediklərimə sübut ola bilər.
“Bu gün Azərbaycanın müdafiə sənayesi kompleksinin də müəllifi kimi Prezident İlham Əliyevin adını çəkə bilərik. Prezident, Ali Baş Komandan İlham Əliyevin 2005-ci il 16 dekabr tarixli Sərəncamı əsasında Azərbaycan Respublikası Silahlı Qüvvələrinin hərbi-texniki bazasının və təchizatının daim yüksək səviyyədə saxlanılması məqsədilə yaradılan Müdafiə Sənayesi Nazirliyinin (MSN) tabeliyindəki birlik və müəssisələr tərəfindən hazırda 1000-dən çox adda hərbi təyinatlı məhsullar istehsal edilir, Azərbaycan ordusu həmin məhsullarla təchiz olunur.
Prezident İlham Əliyev tərəfindən bünövrəsi qoyulan müasir müdafiə sənayesi kompleksi silah-sursat tələbatımızın təminatçısı missiyasını üzərinə götürdü. Qısa müddətdə bu qurumun istehsalat müəssisələri formalaşdırıldı, Sovet dövründən qalan istehsal xətləri yeniləndi, xarici təcrübələrdən bəhrələnməklə ordumuzun silah-sursat tələbatının təmin olunması istiqamətində fundamental işlər görüldü”,-deyə hərbi şərhçi qeyd edib.
Mərkəzinin rəhbəri xatırladıb ki, Azərbaycan silah və sursatının kütləvi şəkildə istifadəsi isə Vətən müharibəsi zamanı oldu. 2020-ci il sentyabrın 27-də başlayan və Azərbaycan Ordusunun qələbəsi ilə yekunlaşan İkinci Qarabağ müharibəsində yüksək texnologiyalı silah sistemlərinin uğurlu tətbiqi hərbi əməliyyatların taleyinin qısa müddətdə həllinə imkan verdi. Əməliyyatlarda Azərbaycanın hərbi sənayesinin istehsalı olan bir sıra silah və texnikalar da fəal şəkildə istifadə olundu.
Azərbaycanın Müdafiə Sənayesi Nazirliyinin ötən müddətdə istehsalı mənimsənilmiş məmulatlardan “Matador” və “Marauder” zirehli döyüş maşınları, BTR-70 (təkmilləşdirilir) və BRDM-2 (təkmilləşdirilir) transportyorlarını, “Mübariz”, “İstiqlal”, “Yalquzaq” və sair snayper tüfənglərini, AK-74M, AZ-7, 62 və NATO standartlarına uyğun avtomatlarını, HP-7,62x54 pulemyotlarını, müxtəlif növ tapançaları, minaatanları, qumbaraatanları və onların atəş yığımlarını, optik cihazları, aviasiya bombalarını, “Orbiter-2M”, “Orbiter-2B”, “Orbiter-3B” və mini “Orbiter-4”, “Aerostar-BP” taktiki və “Zərbə” tipli kamikadze pilotsuz uçuş aparatlarını misal göstərmək olar.
Ramil Məmmədlinin sözlərinə görə, Prezident İlham Əliyevin Müdafiə Sənayesi Nazirliyinin tabeliyində “Azərsilah” Müdafiə Sənayesi Holdinqi” Qapalı Səhmdar Cəmiyyətinin yaradılması barədə bu il sentyabrın 7-də imzaladığı Fərman mühüm əhəmiyyətə malikdir. Fərmana əsasən, QSC silah istehsalının, ixracının, satışının təşkilini həyata keçirəcək, tabeliyində olan hüquqi şəxslərin vahid prinsiplər əsasında idarə edilməsi, fəaliyyətinin təkmilləşdirilməsi, onların maliyyə sabitliyinin və dayanıqlılığının yaxşılaşdırılması sahəsində işləri yerinə yetirəcək. Fərman həm öz Ordumuzun təminatı, həm də dünyaya silah ixracı baxımından çox vacib addımdır. Azərbaycanın istehsal etdiyi silahların dünyanın bir neçə ölkəsində istifadə olunması çox qürurverici olacaq.
“Hazırda Azərbaycan xalqı qızıl dövrünü yaşayır. Bu gün Qalib xalqıq. Qələbənin müəllifi isə məhz Prezident İlham Əliyev və onun qəhrəman Ordusu - sərkərdələri, düşmənə qarşı savaşan görünməz döyüşçülərimizdir.
Sentyabrın 19-20-də Azərbaycan Ordusu təxminən bir sutka ərzində düşməni məhv etdi, onu təslim olmaq məcburiyyətində qoydu. Bu iradə, güc və inam bizi indi Ağdərəyə, Əsgərana, Xocalıya və Xankəndinə çatdırdı. Ali Baş Komandan İlham Əliyevə təşəkkür edirik”, - deyə hərbi şərhçi əlavə edib.
Bölmənin digər xəbərləri
