Azərbaycanın pandemiyaya qarşı hərtərəfli mübarizəsi ölkədə onun fəsadlarını minimuma endirib
Bakı, 1 aprel, AZƏRTAC
Bir il əvvəl yayılma arealına görə pandemiya elan edilən koronavirus hələ də yayılmaqda davam edir. Bu müddət ərzində dünya ölkələrində tətbiq edilən sərt karantin rejimləri sayəsində COVID-19-un yayılmasında müəyyən azalmalar olsa da, yumşalmalar zamanı virus yenidən alovlanmağa başladı. Hazırda dünya üzrə vəziyyət ürəkaçan deyil və gündəlik yüz minlərlə insan koronavirusa yoluxur. Ötən ilin payızı dünyada COVID-19 pandemiyasının ikinci dalğasının başlaması və yoluxma sayının sürətli artımı ilə yadda qaldı. Lakin ilin sonlarına yaxın vaksinlərlə bağlı əldə olunan uğurlar insanlığın pandemiyanı məğlub edəcəyinə ümidləri artırdı. Bir sıra ölkələrdə peyvəndlər sınaqdan keçirildi.
Azərbaycan Prezidenti İlham Əliyev hər zaman çıxışlarında vurğulayır ki, pandemiyadan çıxış yolu yalnız qlobal həmrəylikdən, dünya dövlətlərinin ümumi səylərini birləşdirməsindən asılıdır. Bu zamana qədər dövlətimizin başçısının rəhbərliyi ilə koronavirusa qarşı mübarizə çərçivəsində çox mühüm, ardıcıl və məqsədyönlü addımlar atılıb. Eyni zamanda, ölkəmiz COVID-19-a qarşı mübarizədə qlobal həmrəyliyin nümunəsi kimi Ümumdünya Səhiyyə Təşkilatına 10 milyon dollar məbləğində könüllü ianə verib və bu vəsaitin 5 milyonu Qoşulmama Hərəkatına üzv olan kasıb ölkələrə ayrılıb. Dövlət rəhbərimizin BMT Baş Assambleyasının Xüsusi Sessiyasının çağırılması təşəbbüsünün dünyanın 130-dan çox ölkəsi tərəfindən dəstəklənməsi də bunun bariz nümunəsidir.
AZƏRTAC xəbər verir ki, bu fikirləri Milli Məclisin deputatı Anar Məmmədov bildirib.
Deputat diqqətə çatdırıb ki, ötən il dekabrın 3-4-də keçirilən BMT Baş Assambleyasının COVID-19 pandemiyasına həsr olunan Xüsusi Sessiyasında Prezident İlham Əliyev Qoşulmama Hərəkatının sədri kimi çıxış edərək, bütün ölkələri həmrəyliyə çağırdı, birtərəfli addımlar atılmamasının, peyvəndin bütün ölkələrin xalqları üçün əlçatan olmasının vacibliyini önə çəkdi. Azərbaycan Prezidentinin təşəbbüsü ilə bəşəri problemin aradan qaldırılması istiqamətində daha bir uğura isə bu yaxınlarda imza atıldı. Martın 23-də BMT-nin İnsan Hüquqları Şurasının 46-cı sessiyası çərçivəsində Qoşulmama Hərəkatının sədri qismində Azərbaycanın təşəbbüsü ilə “COVID-19 əleyhinə peyvəndlərə bərabər, məqbul qiymətə, vaxtında və universal əlçatanlığın təmin edilməsi” adlı qətnamə qəbul edildi.
Azərbaycanın koronavirusun meydana çıxdığı ilk zamanlardan etibarən ona qarşı operativ şəkildə qabaqlayıcı tədbirlər həyata keçirən ölkələrdən olduğunu deyən Anar Məmmədov bildirib: “Pandemiya dövründə Azərbaycan dövləti koronavirus pandemiyasının təsirlərinin azaldılması, insanların sağlamlığının qorunması, eyni zamanda, yeni xəstəxanaların inşası istiqamətində ardıcıl fəaliyyətini davam etdirib. Ölkəmizdə 10-dan çox modul tipli xəstəxana inşa edilib ki, bu da xəstəliklə bağlı bütün məsələlərin həllinə tam imkan verirdi. Eyni zamanda, pandemiyaya qədər Azərbaycanda 8 laboratoriya var idi və gündə cəmi 1000 test keçirilə bilərdisə, bu gün laboratoriyaların sayı 42-dir və 20 min test həyata keçirilə bilər. Təsadüfi deyil ki, bu günə qədər 2,8 milyondan çox test keçirilib. Bütövlükdə pandemiya dövründə insanların sağlamlığının qorunması üçün dövlət tərəfindən atılan addımlar onun necə prinsipial mövqe tutduğunu isbatlayır. Cənubi Qafqazda ilk olaraq vaksinasiya işlərinə start verən ölkə də Azərbaycan olub. Sirr deyil ki, dövlət pandemiyanın ilk günlərindən işləri düzgün təşkil etmiş və bütün lazımi addımları atmaqla beynəlxalq təşkilatlarla təmaslar qurmuşdu”.
Deputat vurğulayıb ki, Azərbaycanın pandemiyaya qarşı hərtərəfli mübarizəsi və vaxtında gördüyü işlər onun fəsadlarının minimum səviyyədə olmasına zəmin yaradıb. Lakin əfsuslar olsun ki, koronavirus yox olmayıb və yeni mutasiyaları ilə insanların sağlığını təhlükə altında saxlayır. Belə olan təqdirdə, bu virusla mübarizədə hökumət tərəfindən həyata keçirilən tədbirlərin daha effektiv olması vətəndaşların ehtiyatlı olmasından, pandemiya qaydalarına məsuliyyətlə əməl etməsindən birbaşa asılıdır.
Bölmənin digər xəbərləri
