AZƏRBAYCANLI ABİTURİYENTLƏR RUSİYA ALİ MƏKTƏBLƏRİNƏ İMTAHANLARI UĞURLA VERDİLƏR

05.07.2006 [13:47]
Çap et
A⁺ A^-

Bu il ölkəmizin 41 nümayəndəsi çətin müsabiqə seçimindən keçərək, Azərbaycan Təhsil Nazirliyinin xətti ilə Rusiyanın ali məktəblərinə qəbul imtahanlarını uğurla vermişdir. Bunu AZƏRTAC-ın xüsusi müxbirinə Azərbaycanın Rusiyadakı səfirliyinin müşavir-elçisi Baxış Zeynalov bildirmişdir. Onun sözlərinə görə, RF Təhsil və Elm Nazirliyinin Azərbaycana ayırdığı kvotaya əsasən abituriyentlərin bir hissəsi Rusiya ali məktəblərinə qəbul imtahanlarını Bakıda verdikdən sonra qəbul edilmiş, 13 nəfər isə RF ərazisində yaşayan Azərbaycan vətəndaşları üçün Ümumrusiya Azərbaycan Konqresinə ayrılmış kvota ilə Moskvada daxil olmuşdur.

B.Zeynalov demişdir ki, daha doqquz abituriyentimiz Rusiyanın ən nüfuzlu ali məktəblərindən birinin - RF XİN-in Moskva Beynəlxalq Münasibətlər İnstitutunun tələbəsi, üçü isə Diplomatiya Akademiyasının dinləyicisi olmuşdur. Qalanları Moskvanın ali texniki və humanitar məktəblərinə, habelə Rusiya regionlarında yerləşən digər ali məktəblərə qəbul edilmişlər.

B.Zeynalov demişdir ki, Azərbaycan tələbələrinin Rusiya ali məktəblərində təhsil alması üçün kvotalar iki ölkənin təhsil nazirlikləri arasında əməkdaşlıq haqqında 2002-ci ilin fevralında Bakıda imzalanmış protokola uyğun olaraq ayrılır. Bu, Rusiyadakı diasporumuzun nümayəndələrinə ciddi köməkdir. Moskvada keçirilən qəbul imtahanlarını Azərbaycan nümayəndələrinin təşkil etməsi sayəsində gənc həmvətənlərimiz yaxşı təhsil almaq və gələcəkdə öz xalqına fayda vermək imkanı əldə edirlər. Səfirlik Azərbaycan vətəndaşlarının Rusiyanın ən nüfuzlu ali məktəblərinə daxil olması məsələsinə diqqəti bundan sonra da artırılacaqdır.

AZƏRBAYCANLI ABİTURİYENTLƏR RUSİYA ALİ MƏKTƏBLƏRİNƏ İMTAHANLARI UĞURLA VERDİLƏR

MÜƏLLİFLƏ ƏLAQƏ

Bölmənin digər xəbərləri