SİYASƏT
Azərbaycanlı deputat Avropa Şurası Nazirlər Komitəsinin səlahiyyətlərinin artırılmasını təklif edib
Strasburq, 13 oktyabr, AZƏRTAC,
“Avropa Şurasında 23 il müddətində müşahidələrim sayəsində böhranların necə yaranmasının canlı şahidiyəm. İkili standartlar, sifarişli çıxışlar, idarə edilən deputatlar və siyasətçilər Avropa Şurasında və digər beynəlxalq təşkilatlarda kök salıb dərinləşdikcə böhranlar yarandı və onlar tədricən adiləşməyə başladı. Azərbaycan bu təşkilata üzv qəbul ediləndə digər üzv dövlət və ona havadarlıq edən dövlətlər və qüvvələr tərəfindən ərazisinin 20 faizi işğal olunmuşdu və 1 milyon azərbaycanlı qaçqın və məcburi köçkünə çevrilmişdi. Bu təşkilatda olduğumuz 20 il ərzində münaqişənin həllinə kömək edəcək heç bir hərəkət görmədik. Yalnız ümumi danışıqlar, kağız üzərində qalan quru bəyanatlar oldu. Eyni yanaşmanı ATƏT-də də gördük, Avropa Parlamentində də qatı qərəzli və qeyri-obyektiv münasibətlərlə üzləşdik”.
AZƏRTAC xəbər verir ki, bu fikirləri AŞPA-nın payız sessiyasında “Münaqişələrin qarşısının alınmasında, beynəlxalq institutların etimadının bərpasında və dünyada sülhün təşviqində Avropa Şurasının rolu” məruzəsinin müzakirəsi zamanı Azərbaycan nümayəndə heyətinin üzvü Rafael Hüseynov deyib.
O bildirib ki, heç bir beynəlxalq təşkilat kömək etməyib və 2020-ci ildə Azərbaycan problemini özü həll edib, torpaqlarını öz gücü ilə işğaldan azad edib:
“Bunu Avropa Şurasına, eləcə də digər beynəlxalq təşkilatlara illərlə ümid bəsləyən xalqımız, eləcə də beynəlxalq ictimaiyyət də gördü. Bu, bir daha hər kəsin, ilk növbədə öz gücünə ümid bəsləməli olduğunu təsdiqlədi.
Avropa Şurası bu məruzədə qarşıya qoyduğu məqamları yerinə yetirmək niyyətindədirsə, gərək özü dəyişsin, yanaşmalarını yeni, daha mütərəqqi metodlarla əvəz etsin. Dəyişmədən bu məruzədə qarşıya qoyulan vəzifələrin həllinə çatmaq xülyadır. Bu halda münaqişələrin qarşısını almaq naminə çağırışlar konkret hərəkətlərə çevrilməyərək yeni ümidsizliklər doğuracaq, təşkilata olan az-çox etimad tamamilə itəcək.
Nizamnamədə əsaslı dəyişikliklər edilərək, Avropa Şurası Nazirlər Komitəsinin səlahiyyətləri artırılmalı, onun üzv ölkələrə ciddi təsir və zəruri hallarda təzyiq mexanizmləri düşünülməlidir. Nazirlər Komitəsi Parlament Assambleyası üçün BMT-nin Təhlükəsizlik Şurası kimi eyni səlahiyyətlərə malik olmalıdır.
İkili standartlar, tərəfkeşlik, idarə olunma təzahürləri ilə bağlı müraciətlər olduqda Assambleyada mütəmadi olaraq araşdırmalar aparılmalı, belə hərəkətlərə yol verənlərin təxirə salmadan təşkilatdan kənarlaşdırılması məsələsi qaldırılmalıdır”.
Azərbaycanlı deputat bildirib ki, “Münaqişələrin qarşısının alınmasında, beynəlxalq institutların etimadının bərpasında və dünyada sülhün təşviqində Avropa Şurasının rolu” məruzəsi vaxtında və hər kəsin təqdir etdiyi məruzədir:
“İnsanlar münaqişə istəmir, mövcud münaqişələrə son qoyulmasını istəyirlər. Münaqişələrin tez aradan qaldırılması üçün təcili tədbirlər görülməlidir. Əsas missiyası demokratik dəyərləri möhkəmləndirmək, insan haqlarını qorumaq, sülhə və sabitliyə nail olmağa çalışan beynəlxalq təşkilatların nüfuzu yüksəlməlidir ki, fəaliyyətləri səmərəli olsun. Beynəlxalq qurumların gücü və etibarı yüksək olduqca, onlar münaqişənin həllinə bir o qədər çox töhfə verə bilərlər”.
Şəhla Ağalarova
AZƏRTAC-ın xüsusi müxbiri
Strasburq