SİYASƏT
AZƏRTAC-ın xüsusi müxbiri “Rossiya” telekanalının müxbirinin müəllif verilişində birbaşa efirdə çıxış edib
Bakı, 30 sentyabr, AZƏRTAC
AZƏRTAC-ın AFR-dəki xüsusi müxbiri Vüqar Seyidov sentyabrın 29-da Ümumrusiya Dövlət Teleradio Şirkətinin “Rossiya” telekanalının Türkiyədəki müxbirinin müəllif verilişində birbaşa efirdə çıxış edib
(bax: https://www.facebook.com/aytaj.jarchiyeva/videos/10158655835233620).
AZƏRTAC xəbər verir ki, proqramın qonağı aparıcı Aytac Carçıyevanın suallarına cavab verərək həmin görüşdən bir neçə dəqiqə əvvəl Azərbaycan Prezidenti İlham Əliyevin “Rossiya-1” telekanalının efirindəki çıxışını xatırladıb və Azərbaycan dövlətinin başçısının bəzi tezislərinə istinad edib. O qeyd edib ki, Azərbaycan Prezidentinin də vurğuladığı kimi, indiki şəraitdə hər hansı danışıqlara lüzum qalmayıb. Danışıqlar pozulub, özü də erməni tərəfin təqsiri üzündən pozulub. Ekspert deyib: “Azərbaycan üçün heç bir seçim qalmayıb, hərçənd indi münaqişə zonasında baş verənlərin qarşısını almaq üçün Ermənistana təxminən 30 il imkan verilmişdi”. Müharibədən qaçınmağın “resepti” çox sadə idi - işğalı dayandırmaq lazım idi.
AZƏRTAC-ın xüsusi müxbiri bu günlərdə müəyyən dairələrin yaydığı belə bir mifi təkzib edib ki, guya “müharibəni başlayan Prezident Ərdoğan olub”. O, belə şayiələri bu günlərdə Qarabağda baş verən hadisələrin, məsələn, Şərqi Aralıq dənizi zonasında geosiyasi gündəliklə əlaqələndirilməsi cəhdləri ilə izah edib. Türkiyə orada özünün beynəlxalq hüquq çərçivələrini aşmayan legitim milli maraqlarını müdafiə edir, bu isə çoxlarının xoşuna gəlmir. Buna görə də onlar öz təbliğatında əlavə xal qazanmaq üçün Qarabağda yeni hərbi toqquşmaların başlanmasında guya Türkiyənin əli olması barədə mif yayırlar.
Seyidov deyib: “Prezident Əliyevin öz çıxışında vurğuladığı kimi, əslində Türkiyə Qarabağda yalnız sabitləşdirici rol oynayır”. Ekspert qeyd edib ki, bu müharibə təxminən 30 il ərzində müharibədən qaçınmaq üçün çox şans verilmiş ölkəyə lazımdır, lakin həmin ölkə bu şansdan istifadə etməyib və nəticədə münaqişənin qaynar fazaya keçməsi labüd olub.
AZƏRTAC-ın xüsusi müxbiri hesab edir ki, Türkiyənin köməyi hələlik yalnız mənəvi dəstəklə məhdudlaşır. Seyidov xatırladıb ki, Prezident Əliyev də bu verilişdən bir neçə dəqiqə əvvəl öz çıxışında bu məqamı qeyd edib.
Verilişin aparıcısının sonda verdiyi “Bütün bunlar nə vaxta qədər davam edəcək?” sualına “Azərbaycan sərhədçiləri Ermənistan-Azərbaycan dövlət sərhədi boyunca öz yerlərinə qayıdana qədər”, - deyə cavab verən ekspert daha sonra əlavə edib ki, o, münaqişənin indiki qaynar fazasının məhz bu cür başa çatması və 30 illik tarixin son səhifəsinin belə olması üçün Ulu Tanrıya dua edir”.