“Azexport” ABŞ şirkəti ilə əməkdaşlığa başlayıb
Bakı, 28 dekabr, AZƏRTAC
İqtisadi İslahatların Təhlili və Kommunikasiya Mərkəzinin operatoru olduğu “Azexport.az” portalı ABŞ-ın Nyu-York şəhərində yerləşən “Euphoria INC” şirkəti ilə əməkdaşlığa başlayıb.
Mərkəzdən AZƏRTAC-a bildirilib ki, portalın rəhbəri Ayxan Qədəşovun ABŞ-a səfəri çərçivəsində “Euphoria INC” şirkətinin prezidenti Lera Itz ilə görüşdə bununla bağlı razılıq əldə edilib. A.Qədəşov görüşdə portalın imkanları və nailiyyətləri barədə məlumat verib, portalda qeydiyyatda olan Azərbaycan məhsullarının onlayn nümayişini həyata keçirib, şirkətin məhsul anbarı ilə tanış olub.
“Azərbaycanın yerli istehsal məhsullarının Amerika bazarlarında öz yerini daha da möhkəmləndirməsi üçün bütün imkanlar mövcuddur. Müşahidələrim göstərir ki, məhsullarımız qablaşdırma və keyfiyyətinə görə bazarda olan məhsullarla rəqabət aparmaq imkanına malikdir. Hazırda mövcud geosiyasi vəziyyəti də nəzərə alsaq, Azərbaycan mallarının kiçik uyğunlaşdırmalar aparmaqla bazara daxil olması üçün geniş imkanlar mövcuddur. Görüş hər iki tərəf üçün çox məhsuldar keçdi və nəticə olaraq ilkin mərhələdə çay, qənnadı məhsulları, alkoqolsuz içkilər, meyvə şirələri, konservləşdirilmiş məhsullar və kosmetik vasitələrinin birgə əməkdaşlıq çərçivəsində ABŞ-a ixracına dair işlərin başlanmasına dair razılığa gəldik”, - deyə portal rəhbəri əlavə edib.
“Euphoria INC” şirkəti 15 ildən artıqdır ki, ABŞ-ın 10-dan artıq ştatında təmsil olunur. Şirkət dünyanın 15-dən artıq ölkəsindən qənnadı məhsulları, konservləşdirilmiş qidalar, meyvə şirələri, balıq məhsulları, çay və şəxsi gigiyena məhsullarının ABŞ-a idxalı ilə məşğuldur.
Bölmənin digər xəbərləri
