BAKI MƏİŞƏT KONDİSİONERLƏRİ ZAVODUNUN 30 YAŞI TAMAM OLUR
AZƏRTAC-ın müxbiri Səhmdar Cəmiyyətin idarə heyətinin sədri, texnika elmləri namizədi Vaqif Heydərova bu sualla müraciət etmişdir. O demişdir:
-Bilirsiniz ki, bu zavod 70-ci illərdə ulu öndərimiz Heydər Əliyevin şəxsi təşəbbüsü və rəhbərliyi ilə inşa edilərək işə salınmışdır. Hər il burada layihə gücündən çox, yəni 430 min kondisioner istehsal edilmişdir. Zavodun məhsulları dünyanın 60-dan çox ölkəsinə göndərilmişdir.
Təəssüf ki, SSRİ dağıldıqdan sonra müəssisənin əvvəlki iqtisadi əlaqələri pozulmuş, satış bazarı itirilmiş, istehsal həcmi getdikcə azalmış, zavod dayanmaq həddinə gəlib çatmışdır.
İndi biz səhmlərinin 95 faizi dövlətə məxsus olan ASC-də istehsal proseslərini bərpa etməyə, müəssisənin əvvəlki şöhrətini özünə qaytarmağa çalışırıq. Bu məqsədlə İsrailin Şirkətlər Qrupu ilə danışıqlar aparırıq. Həmin qrupla birlikdə yeni çeşiddə kondisionerlər istehsalını mənimsəmək üçün birgə biznes plan hazırlamışıq. Ümid edirik ki, respublika rəhbərliyinin diqqət və qayğısı sayəsində yaxın gələcəkdə müəssisəyə sərmayə qoyulacaq, bütün istehsal sahələrində müasir texnika və avadanlıq quraşdırılacaq, qabaqcıl texnologiya tətbiq ediləcək, dünya standartlarına uyğun kondisionerlər, elektrotexnika, müxtəlif məişət cihazları və onların ehtiyat hissələri buraxılacaqdır. Yaxın gələcəkdə müəssisənin sex və istehsal sahələrində minlərlə yeni iş yeri açmaq imkanı yaranacaqdır.
