Bakı Musiqi Akademiyasının 100 illik yubileyi münasibətilə məktəb-studiya şagirdlərinin konserti olub
Bakı, 14 mart, AZƏRTAC
Neçə-neçə istedadlı nəsil yetişdirmiş, Azərbaycan musiqisinin beşiyi sayılan Üzeyir Hacıbəyli adına Bakı Musiqi Akademiyasının (BMA) 100 illik yubileyi çərçivəsində silsilə tədbirlərin təşkili davam edir. BMA-nın Orta ixtisas musiqi məktəb-studiyası da öz növbəsində möhtəşəm yubileylə bağlı bir sıra konfrans, müsabiqə, ustad dərsləri və konsert tədbirləri həyata keçirmişdir.
Bakı Musiqi Akademiyasının Orta ixtisas musiqi məktəb-studiyasının böyük elmi işçisi Şəfəq Hacıyeva AZƏRTAC-a bildirib ki, bu mötəbər tədbirlərdən biri Beynəlxalq Qadınlar Günü ərəfəsində Bakı şəhərində yerləşən Rus Mədəniyyət Mərkəzində baş tutub. Rus Evinin nümayəndəliyi və Bakı Musiqi Akademiyasının birgə təşkil etdiyi konsertdə bir-birindən maraqlı çıxışlar olub. Diqqətəlayiq məqam ondan ibarətdir ki, tələbələrlə yanaşı, məktəb-studiyanın saksofon ixtisası üzrə 6-cı sinif şagirdi İsa Kələntərov və bir çox beynəlxalq müsabiqələr laureatı olmuş vokal ifaçısı 10-cu sinif şagirdi Teymur Kazımov parlaq çıxışları ilə fərqləniblər. Eyni zamanda, məktəb-studiyanın məzunu, hazırda isə müəllim kimi fəaliyyət göstərən Beynəlxalq müsabiqələr laureatı Fəqan Həsənli də professional ifaçılıq qabiliyyətini nümayiş etdirib.
Silsilə tədbirlərin davamı olaraq Üzeyir Hacıbəyli adına Bakı Musiqi Akademiyasının kiçik zalında BMA-nın Orta ixtisas musiqi məktəb-studiyasının şagirdləri konsert proqramı ilə çıxış ediblər.
Konsertdə fortepiano, violin, fleyta, vokal ixtisasları üzrə rəngarəng musiqili proqram təqdim olunub. Müxtəlif yaş kateqoriyalarına aid şagirdlərin ifa etdikləri musiqi əsərləri həm Azərbaycan, həm də xarici bəstəkarların yaradıcılıqlarını əhatə edirdi. Sevindirici məqamlardan biri odur ki, kiçik yaşlı şagirdlər ilk dəfə böyük səhnəyə qədəm basdıqlarına baxmayaraq məharətlə çıxış ediblər.
Fortepiano sinfində təhsil alan şagirdlər - Səidə Əliyeva, Ayişə Əliyeva, Əminə Məmmədova, Məryəm Hüseynzadə, Məryəm Quluzadə, Sara Hacıyeva, Nihad Məmişov, Cəmilə Sadıxova, Mikayıl Qasımlı, Aylin Nəsirova, Rauf Bağırzadə, Əhməd Əfəndizadə, Nəzrin Abasbəyli Avropa klassik musiqisi ilə yanaşı müasir zəmanəmizin musiqi əsərlərinə də müraciət ediblər. Xüsusən də, Qlevart Styuartın “Reqtaym”ı, Oskar Petersonun “Caz ekzersayz” musiqi nömrəsi dinləyicilər tərəfindən maraqla qarşılanıb.
Violin alətində ifa edən şagirdlər Qurban Abdullalı, Emiliya Mirzəzadə, Rəna Zeynallı, Şəhla Qazıyeva, Elmir Hüseynov ecazkar alətin sehrinə qapılaraq müxtəlif musiqi əsərlərini canlandırıblar. Burada mazurka, vals, kiçik pyes, ballada və s. əsərlər səsləndirilib.
Konsertdə, həmçinin vokal ifaçıları da çıxış ediblər. Onlar məktəb-studiyanın vokal müəllimi Ofeliya Axundovanın şagirdləri Etibar Əsgərzadə və Emiliya Ağakişiyevadır. 5-ci sinif şagirdi Etibar Əsgərzadə “Qubanın ağ alması” Azərbaycan xalq mahnısını oxuyub. Onun həzin ifası dinləyicilər tərəfindən rəğbətlə qarşılanıb. Digər şagird Emiliya Ağakişiyeva isə italyan bəstəkarı Vincenzo di Chairanın məşhur “La spaqnola” əsərini məharətlə ifa edib.
10-cu sinif şagirdi Xatun Quliyeva alman bəstəkarı Kristof Qlyukun “Orfey və Evridika” operasından “Melodiya” musiqili nömrəsini çalıb. Fleyta alətində səslənən bu əsər füsunkarlığı və şəffaflığı ilə seçilib.
Uşaqların hər birinin simasındakı təbəssüm və sevinc cizgiləri onların musiqiyə olan sevgilərindən xəbər verir. Əlbəttə ki, bu sevgini onlara aşılayan müəllimlərin zəhməti danılmazdır. Məktəb-studiyanın yüksək ixtisaslı müəllimləri- Əməkdar müəllimlər Ayişə Əliyeva, Nərgiz Mansurova və dosent Mədinə Tuayeva, sənətşünaslıq üzrə fəlsəfə doktoru Sevda Məmmədova, dosent Gülnarə Quliyeva, Ofeliya Axundova, Arzu Rzayeva, Naira Qulamova, Dilarə Salayeva, Nərminə Əliverdizadə, Nuranə Zeynalova, Anna İsrafilova, Qüdrət Həsənzadə hər bir şagirdə individual yanaşaraq, onlarda olan istedadı professional səviyyəyə çatdırmağa çalışırlar.
Professor Tərlan Seyidovun 40 il ərzində rəhbərlik etdiyi BMA-nın Orta ixtisas musiqi məktəb-studiyası şagirdlərin ifa qabiliyyətlərini, onların mərhələli şəkildə inkişaflarının yoxlanılmasını, eyni zamanda, uşaqların böyük auditoriya qarşısında çıxış etmək imkanının təminatı üçün müntəzəm olaraq bu kimi tədbirlər təşkil edir. Məktəb-studiyanın müəllim heyəti üçün şagirdlərin hərtərəfli - həm ifa, həm də nəzəri biliklər baxımından inkişafı böyük əhəmiyyət kəsb edir.
Məlum olduğu kimi, məktəb-studiya BMA-nın tələbələri üçün təcrübə ocağı sayılır. Belə ki, tədris ili boyunca BMA-nın tələbələri məktəb-studiyanın dərs prosesində iştirak etmək və bu təhsil ocağının yüksək ixtisaslı müəllimlərindən yararlanmaq imkanına malikdirlər. Keçirilən konsert tədbirində də təcrübəçi-tələbələr konsertmeyster qismində şagirdləri müşayiət edirdilər. Qeyd etməliyik ki, tədbirin aparıcısı təcrübəçi-tələbə Fidan Nağıyeva olub.
BMA-nın Orta ixtisas musiqi məktəb-studiyasının həyata keçirdiyi bütün tədbirlər ilk növbədə uşaqların musiqi aləminə yanaşma üsulunun düzgün formalaşmasına yönəlib.
Bölmənin digər xəbərləri
