Bakı Musiqi Akademiyasının professoru beynəlxalq konfransda məruzə ilə çıxış edib
Bakı, 26 aprel, AZƏRTAC
Üzeyir Hacıbəyli adına Bakı Musiqi Akademiyasının (BMA) “Azərbaycan ənənəvi musiqisi və müasir texnologiyalar” kafedrasının professoru, fəlsəfə elmləri doktoru Mina xanım Hacıyeva Başkir Dövlət Universitetində “Müasir insanın varlığının etnotarixi, hüquqi və mədəni-linqvistik əsasları” adlı beynəlxalq elmi və praktik konfransda çıxış edib.
BMA-dan AZƏRTAC-a bildirilib ki, etnosların, müasir insanın və cəmiyyətin mənəvi, fəlsəfi, siyasi-hüquqi, dil inkişafının aktual məsələlərinin hərtərəfli öyrənilməsinə həsr edilən konfransda müxtəlif ölkələrdən (Rusiya, Moldova, Vyetnam, Özbəkistan, Qazaxıstan, Qırğızıstan, Azərbaycan) olan alimlərin məruzələri dinlənilib.
Beynəlxalq konfransda M.Hacıyevanın məruzəsi “Azərbaycan mədəniyyətinin inkişafı” mövzusuna həsr olunub. O, məruzəsində Azərbaycanın qədim tarixi, orta əsr alimləri, şair-filosofları və XX-XXI əsr bəstəkarlarının əsərləri, İkinci Qarabağ müharibəsi haqqında məlumat verib. Professor Mina Hacıyevanın rəhbərliyi altında Tarix-nəzəriyyə fakültəsinin 4-cü kurs tələbəsi Gülər Babayeva "Azərbaycanda xanəndəlik sənətinin inkişafı" adlı mövzu ilə konfransda çıxış edib.
Bölmənin digər xəbərləri
