BAKI-TBİLİSİ-CEYHANIN TƏMƏLİNİN QOYULMASININ BİR İLİ TAMAM OLMUŞDUR
Tədbirin iştirakçıları ərazi ilə yaxından tanış olmuş, terminalın genişləndirilən sahəsində baş nasos stansiyasının tikintisi, magistral kəmərin nasos qurğularına və digər obyektlərə baxmışlar.
Azərbaycan Dövlət Neft Şirkətinin prezidenti Natiq Əliyev, Bakı-Tbilisi-Ceyhan (BTC) layihəsinin baş icraçı direktoru Maykl Taunzend, Türkiyənin, Gürcüstanın ölkəmizdəki səfirləri Əhməd Ünal Çeviköz və Zurab Qumberidze Səngəçal terminalının genişləndirilməsi sahəsində görülən işlərə dair geniş açıqlama verdilər.
Bildirildi ki, ötən il Azərbaycan, Gürcüstan və Türkiyə prezidentləri tərəfindən təməli qoyulan bu kəmərin tikintisində bir il ərzində böyük irəliləyişə nail olunmuşdur. Bakıdan Ceyhanadək bütün boru kəməri marşrutu boyunca 17 tikinti sahəsində qızğın iş gedir. Layihənin reallaşdırılmasına indiyədək 1 milyard ABŞ dollarından çox vəsait xərclənmişdir. Layihə 2004-cü ilin dördüncü rübündə başa çatacaq və “Azəri” yatağından ilk neft 2005-ci ilin əvvəllərində ixrac ediləcəkdir.
ARDNŞ-in prezidenti Natiq Əliyev Bakı-Tbilisi-Ceyhan layihəsinin müəllifi Prezident Heydər Əliyevin bu sahədə tarixi fəaliyyətini xüsusi vurğulayaraq dedi ki, biz Azərbaycanı Gürcüstan və Türkiyə, oradan da dünya bazarları ilə birləşdirəcək bu boru kəmərinin gerçəkliyə çevrilməsinin şahidi olmağımızdan qürur duyuruq. Bu, Azərbaycan Prezidenti Heydər Əliyevin uğurlu neft strategiyasının düzgünlüyünü bir daha təsdiqləyir. Bir il bundan əvvəl elə bu yerdə üç ölkənin prezidentlərinin xeyir-duası ilə boru kəmərinin təməli qoyulandan sonra əldə olunan nailiyyətləri görəndə insan heyran qalır. İndi boru kəməri marşrutu boyunca 17 tikinti sahəsində 10 min işçi BTC-nin gələn ilin sonunadək tamamlanması üçün var gücü ilə çalışır. Ümidvarıq ki, 2005-ci ilin yazında BTC ilə nəql olunan neft yüklənmiş ilk tanker Ceyhandan yola salınacaqdır.
BTC layihəsinin icraçı direktoru Maykl Taunzend məlumat verdi ki, bütövlükdə kəmərin tikintisinin 40 faizi tamamlanmışdır. Tikintidə 10 min adam çalışır ki, bunlardan 2200-dən çoxu Azərbaycandadır. Bu günədək BTC Azərbaycanda layihənin tikintisi üzrə podratçısı olan CCİC şirkəti vasitəsilə 100-dən artıq, yerüstü qurğuların tikintisi üzrə podratçı Spi KapaqPetrofak şirkəti vasitəsilə bir çox xidmətlərin göstərilməsi üçün 37 şirkət, Səngəçal Terminalının Genişləndirilməsi Proqramı üzrə podratçı AzfenTekfen alyansı Səngəçaldakı tikinti işlərinə 55 yerli köməkçi podrat təşkilatı cəlb etmişdir.
Natiqlər söylədilər ki, BTC regiona faydalar gətirməklə, müsbət dəyişikliklər yaradacaq mühüm bir layihədir. Bosfor boğazından yan keçməklə kəmər neftdaşıyan nəqliyyatın labüd artımının qarşısını alacaq, ətraf mühit risklərini azaldacaq, tranzit ölkələri üçün sanballı gəlirlər gətirəcək, Azərbaycan-Gürcüstan-Türkiyə ilə Qərb arasında iqtisadi və siyasi əlaqələrin möhkəmlənməsinə kömək edəcəkdir.
Sonra jurnalistləri maraqlandıran suallara ətraflı cavab verildi.
Bölmənin digər xəbərləri
