Bakı yollarının 65 yaşlı “dəmir brilyant”ı – FOTOLAR
Bakı, 11 dekabr, AZƏRTAC
“Əslində bu maşın atamın yadigarıdır. Atam 1958-ci il aprelin 12-də növbəlik qaydasında “Moskviç- 407” markalı avtomobil alıb, bir müddət onu idarə edəndən sonra övladlarına bağışlayıb. İndi biz qardaşlar onu ata yadigarı kimi qoruyub saxlayırıq”.
Bunu paytaxtın Suraxanı rayonunun Əmircan qəsəbə sakini Vaqif Quliyev AZƏRTAC-ın müxbiri ilə söhbət zamanı deyib.
Vaqifin atası Əsəd Quliyev İkinci Dünya müharibəsindən əvvəl Əmircanda fəaliyyət göstərən zavodda tornaçı işləyib. 1942-ci ildə sürücülük məktəbini bitirəndən sonra müharibəyə yola düşüb. 1945-ci ilədək cəbhədə atıcı olub, 1948-ci ilədək isə Xarkovda sürücü kimi fəaliyyət göstərib. Müharibədən geri qayıdandan sonra üç il Bakıda sürücü işləyib. İkinci Dünya müharibəsi iştirakçısı kimi ona torpaq sahəsi ayrılıb. Həmin ərazidə tikdirdiyi evin birinci mərtəbəsi qaraj, ikinci mərtəbəsi isə stomatoloji kabinet olub. 1952-ci ildə ixtisasca stomatoloq olan Sona ilə ailə həyatı qurandan sonra diş texniki kimi çalışmağa başlayıb.
“Atamın aldığı “Moskviç-407” qəsəbədə ilk nəqliyyat vasitələrindən olub. O vaxt kənddə doğulan uşaqların çoxunu onun avtomobili ilə xəstəxanadan evə gətiriblər. Onlardan biri də 1962-ci ildə dünyaya gələn kiçik qardaşım Həsəndir”,- deyə Vaqif məlumat verir: “İndiyədək kənddə keçirilən ən mühüm tədbirlərdə, xeyir-şər məclislərində maşının xidmətindən istifadə edilir. Elə məclislər olub ki, toy sahibinin arzusu ilə gəlini də atamın maşını ilə aparıblar”.
Quliyevlər ailəsində texnikaya, aviasiya peşəsinə böyük maraq var. Vaqif və qardaşı Akif əvvəllər Zabratdakı aviasiya şirkətində helikopter pilotu işləyiblər. Hər ikisi Birinci Qarabağ müharibəsi veteranıdır. Kiçik qardaşı Həsənin qızı Sona gənc alim kimi bu il Bakıda keçirilən Beynəlxalq Aerokosmonavtika Konqresində iştirak edib. Hazırda İtaliyanın Turin şəhərində elmi iş müdafiə etməyə hazırlaşır. Akifin oğlu Əsəd hazırda helikopter pilotudur. Vaqifin qızı Kristina "Azərbaycan Hava Yolları" Qapalı Səhmdar Cəmiyyətində dispetçer işləyir.
Vaqif “Moskviç-407”ni o qədər detallarla zənginləşdirib ki, indi də müasir avtomobillərdən geri qalmır. Avtomobilin xarici görkəmi isə göz oxşayır, necə deyərlər, elə bil zavoddan indi çıxıb. O, atasının yadigarı olan avtomobilin çox işlənməməsi üçün 1990-cı ildə özünə “Moskviç-412” markalı avtomobil alıb. Həmin nəqliyyat vasitəsi hər il Azərbaycan Avtomobil Federasiyası və “Zhara Events”in təşkilatçılığı ilə Bakıda keçirilən klassik avtomobillərin sərgisində iştirak edir.
Əmircan qəsəbəsinin küçələrində hamının xüsusi marağına səbəb olan göy rəngli avtomobil şütüyür. Quliyevlər ailəsinin çox sevdiyi və uzun illərdən bəri qoruyub saxladığı “Moskviç-407” markalı avtomobilin bu il 65 yaşı tamam olub. Görkəmi, yaraşığı ilə göz oxşayan bu “dəmir brilyant”ın təkərləri hələ neçə illər küçələri naxışlayacaq...
Bölmənin digər xəbərləri
