Tədbiri kənd təsərrüfatı nazirinin müavini Bəhram Əliyev açmışdır. Şəkinin Küngüt kəndindən gəlmiş arıçı-fermer Lətif Lətifov, “Şahdağ-E” arıçılıq firmasının direktoru Elxan Ələkbərov, Türkiyə Arıçılar Assosiasiyasının yaradıcılarından biri olan Bəhri Yılmas, Azərbaycan Elmi-Tədqiqat Heyvandarlıq İnstitutu Abşeron stansiyasının direktoru, biologiya elmləri namizədi Fəxrəddin Musayev və başqaları çıxış edərək sərgi-satış yarmarkasının keçirilməsinin məqsəd və məramından, respublikamızda arıçılığın inkişafının perspektivlərindən danışmışlar.

Sonra tədbirin iştirakçıları sərgi salonuna daxil olmuşlar. Burada ölkənin 60 rayonundan gəlmiş 200 nəfərədək arıçı-fermer müxtəlif çeşidli arıçılıq məhsullarını nümayiş etdirdi. Ayrı-ayrı bölgələrdən gətirilmiş, müxtəlif rəng çalarına, dada malik bal, ta qədim zamanlardan min bir dərdin dərmanı kimi istifadə edilən dərəmum və s. tamaşaçı-alıcıların zövqünü oxşayırdı. Burada arıçılığın inkişafına dair ədəbiyyat, arıçılıq alət və avadanlığı da nümayiş etdirilirdi.

Ehtiram Məmmədov Dövlət Torpaq və Xəritəçəkmə Komitəsinin Saatlı rayon şöbəsinin müdiridir. O, eyni zamanda 12 ildir ki, arıçılıqla da məşğul olur. Arı ailələrini rayona yaxin Ağarəhimli kəndində və rayondan 56 kilometr aralıda yerləşən qış otlaq sahəsi deyilən yerdə saxlayır. 54 arı ailəsinə xidmət edir. Ötən il 970 kiloqram məhsul götürmüşdür. Bu il iqlim şəraitinin qeyri-münasib, yəni yaz fəslinin soyuq, yayın isti keçməsi nəticəsində bir qədər az - cəmi 820 kiloqram bal kəsmişdir. O, üç ildir ki, keçirilən sərgi-satış yarmarkalarında iştirak edir.

Ehtiram deyir:

- Arıçılıq gözəl peşədir. İki arzum var: birincisi, bu peşəni nəsildən-nəslə ötürməkdir, ikincisi isə, təsərrüfatımda arı ailəsinin sayını 100-ə çatdırmaqdır. Çalışıram ki, oğlum Rəşad bu lazımlı peşəni davam etdirsin. Hər dəfə sərgi-satış yarmarkasına onu da gətirirəm. Arılara xidmət göstərərkən dadıma çatan da elə odur. Çox güman ki, o da mənim yolumla gedəcəkdir.

Azərbaycan Ekologiya Standartları Monitorinq Fondunun prezidenti, biologiya elmləri doktoru, professor Rauf Sultanov arıçılığın inkişafının vacibliyi və balın xeyiri barədə belə dedi:

- Balın tərkibi insanın sağlamlığı üçün çox faydalı və vacib olan qlükoza, fruktoza, müxtəlif vitaminlər və mikroelementlərlə zəngindir. Bu maddələr insan orqanizmində heç bir dəyişiklikliyə məruz qalmadan qısa müddətdə qana sorulur və orqanizmin xəstəliklərə qarşı müqavimətini gücləndirir. Məhz belə xüsusiyyətlərinə görə bütün dünyada balı əvəzsiz pəhriz qidası sayırlar.

Arıçılıq məhsullarının sərgi-satış yarmarkası sentyabrın 24-dək davam edəcəkdir.