Bakıda gələcəyin ulduzları yetişir: “Konyaspor” futbol məktəbindən REPORTAJ VİDEO
Bakı, 28 noyabr, AZƏRTAC
Bakının müxtəlif məhəllələrindən gələn azyaşlı futbolçular hər gün eyni məqsəd üçün meydançaya çıxırlar: bir gün böyük arenalarda, minlərlə azarkeş qarşısında oynamaq… Türkiyənin “Konyaspor” klubunun Bakıda fəaliyyət göstərən futbol məktəbi də məhz bu məqsədlə yaradılıb. Hədəf gələcəyin peşəkar futbolçularını yetişdirmək və onları Türkiyə başda olmaqla, dünyanın tanınmış klublarına yollamaqdır.
AZƏRTAC “Konyaspor” futbol məktəbinin işi və burada yetişən gənc istedadlar barədə reportajı təqdim edir.
Məktəbdə hazırda 2012, 2013 və 2014-cü il təvəllüdlü uşaqlar məşq edirlər. Yaşları kiçik olsa da, onlara baxanda gələcəyin müdafiəçilərini, hücumçularını və qapıçılarını görmək olur. Məşqçilər deyir ki, uşaqlar arasında xüsusi istedadlar var və onları peşəkar səviyyəyə çatdırmaq, potensiallarını üzə çıxarmaq üçün həm fiziki, həm də psixoloji hazırlığa böyük önəm verilir.
Məktəbin prioriteti yalnız texniki bacarıqları öyrətmək deyil, eyni zamanda uşaqlara peşəkar futbol düşüncəsi aşılamaqdır. Yəni, onlar futbola sadəcə həvəs kimi deyil, daim inkişaf, məsuliyyət və ciddi zəhmət tələb edən məşğuliyyət kimi yanaşırlar. Burada azyaşlı futbolçulara oyunu oxumaq, düzgün mövqe seçimi və komandada davranış mədəniyyəti öyrədilir. Məşqçilər bildirir ki, məqsəd sadəcə futbol oynayan yox, futbolu anlayan və analiz edə bilən nəsil yetişdirməkdir.
Klubun baş məşqçisi Nihad Ələsgərov qeyd edib ki, akademiyanı sıradan futbol məktəbi kimi dəyərləndirmək düzgün olmaz: “Bura kənardan adi uşaq futbol məktəbi kimi görünə bilər, amma bizim əsas məqsədimiz gələcəyin peşəkar futbolçularını yetişdirməkdir. Burada məşq edən uşaqlar arasında kifayət qədər istedadlı və perspektivli oyunçular var. Onların inkişafı üçün sistemli məşq prosesi qurmuşuq. Düzgün metodika və ardıcıl iş nəticəsində bu uşaqları gələcəkdə Türkiyə və Avropanın müxtəlif klublarına yönləndirmək mümkündür”.
Baş məşqçi klubun uzunmüddətli strategiyasına da toxunub: “Məqsədimiz bir və ya ikiillik deyil, davamlı inkişaf etməkdir. Sistemli şəkildə peşəkar kadrlar yetişdirməyi hədəfləyirik. İstəyirik ki, buradan çıxan uşaqlar gələcəkdə Azərbaycan futbolunu layiqincə təmsil etsinlər”.
Onun sözlərinə görə, bu yanaşma artıq öz bəhrəsini verir və akademiyada məşq edən azyaşlılar hədəflərinə çatmaq üçün böyük əzmlə çalışırlar. Həmin futbolçulardan biri də 12 yaşlı Mirmikayıl Seyidlidir. O, böyük hədəflər uğrunda çalışdığını bildirib: “4 ildir futbolla məşğulam. Bu akademiyaya təxminən 5-6 ay əvvəl qoşulmuşam. Buradakı məşqlər çox maraqlı və faydalıdır. Gələcəkdə “Real Madrid” və “Barselona” kimi böyük klublarda oynamaq istəyirəm. Yanvarın 19-dan 23-dək Türkiyənin Konya şəhərində keçiriləcək turnirdə iştirak edəcəyik. Yarışa ciddi hazırlaşırıq. Oraya çempionluq üçün gedəcəyik. Bunun üçün hər gün daha çox çalışırıq”.
Böyük hədəflərlə gələcəyə doğru inamla addımlayan bu uşaqları görəndə ümidimiz daha da artır. Bəlkə də bu gün söhbətləşdiyimiz futbolçular gələcəyin ulduzları olacaqlar...
Bölmənin digər xəbərləri
