Bakıda gürcü rəssamların “Mələyin qanadları altında” adlı kukla sərgisi açılıb
Bakı, 15 dekabr, Pərvanə Rəhimova, AZƏRTAC
Dekabrın 15-də Muzey Mərkəzinin İncəsənət Qalereyasında gürcü rəssamların “Mələyin qanadı altında” adlı kukla sərgisinin açılışı olub.
AZƏRTAC xəbər verir ki, sərgi Azərbaycan və Gürcüstan arasında diplomatik əlaqələrin qurulmasının 25-ci ildönümünə həsr edilib.
Sərginin açılışında çıxış edən mədəniyyət və turizm nazirinin müavini Ədalət Vəliyev bildirdi ki, iki ölkənin dərin köklərə malik tarixi əlaqələrində mədəniyyət əsas rol oynayır. Bunu “Mələyin qanadı altında” adlı sərgi də nümayiş etdirir. Burada hər bir eksponat sənətin ürəklə danışması postulatını “səsləndirir”. Rəssamlar isə hər birimizi öz əsərləri ilə insanların daha yaxşı olduğu, qəlblərin möcüzələrə daha açıq olduğu dünyaya göndərə bilən canlı sehrbazlardır. Kuklaların bizi tarix boyunca müşayiət etdiyindən bu möhtəşəmlik dünyanın ən qədim sənətlərindən olan kukla sənət dünyası vasitəsilə ötürüləcək.
Nazir müavini qeyd etdi ki, Bakıda artıq kukla sənətinə həsr olunmuş bir sıra beynəlxalq tədbirlər keçirilib. Bu sərgidə Gürcüstandan gətirilmiş 300 kukla və Azərbaycan rəssamlarına aid 100 kukla nümayiş etdiriləcək. Yeni il ərəfəsində belə bir sərginin açılmasının xoş hadisə olduğunu qeyd edən Ə.Vəliyev sərgini açıq elan etdi.
Sərginin təşkilatçılarından olan, “Kukla” art-qalereyasının sahibi Lalə Kazımova sərginin təşkilində əməyi olan hər bir şəxsə təşəkkürünü bildirdi. O qeyd etdi ki, sərginin ekspozisiyası təqdim edilən əsərlərlə kifayət qədər rəngarəngdir. Burada “Kukla” art-qalereyası kolleksiyasında olan bədii kuklaları, o cümlədən unikal əsər olan “Çərxi fələk” mexanik kuklasını xüsusi qeyd etmək lazımdır. Bu, əsl incəsənət əsərinin müəllifi 2015-ci ilin aprel ayında Bakıda fərdi sərgisi keçirilmiş gürcü rəssam, heykəltəraş və memar Tamara Kvesitadzedir. Azərbaycandan Pərviz Hüseynov və İrina Qundorina, Tamilla Qurbanova, Sənubər Səmədova, Nailə Sultan, Fərəh Əliyeva, Olqa Abbasova, Zinaida Həsənova, Anara Salmanova, Nübar Şahbazovanın əsərləri də sərgidə nümayiş olunur. Ekspozisiyaya Dilarə Atakişiyevanın rəhbərlik etdiyi D’Art studiyasının gənc iştirakçılarının kuklaları da daxil edilib.
Vurğulandı ki, “Mələyin qanadı altında” adlı kukla sərgisi çərçivəsində Tərlan Qorçunun başçılıq etdiyi Bakı Marionet Teatrının “Leyli və Məcnun” tamaşası üçün yaradılmış, gürcü rəssam Baçan Xalvaşının müəllifi olduğu kuklalar da təqdim olunub. Dəbdəbəli marionetlər şəxsən müəllif tərəfindən qonaqlara nümayiş etdirildi və bildirildi ki, bu, Gürcüstan İncəsənət Məktəbinin Azərbaycan teatrı ənənəsi ilə sintezinin aydın nümunəsidir.
Gürcüstanın Beynəlxalq Kukla Sənəti Mərkəzinin direktoru Nana Okruaşvili dedi ki, məhz möcüzə qədim dövrlərdən bəri gürcü uşaqların ən sevimli oyuncağı olan və nəvazişlə “Dedopala” (“Kraliça”) adlandırılan kuklanın vətəni Gürcüstan və Azərbaycanın kukla ustalarını birləşdirən “Mələyin qanadı altında” adlı sərginin əsas qəhrəmanıdır. Gürcüstan tərəfindən sərgidə 32 istedadlı rəssam iştirak edir. Sərgidə bədii kuklalar - “Bulyon” qrupu, Denis Qonobolin, Elene Tsitlanadze, Marina Kençuaşvili, Nana Okruaşvili, Fiso Zaridze; marionetlər - Baçana Xalvaşi, Temo Cavaxi, Irma Kaadze, Nana Okruaşvili, Nino (Nutsa) Xidaşeli; kiçik heykəllər - Aleks Berdışev, Aleksandr Asatiani, Amiran Kuprava, Gela Babunaşvili, Kaxi Eradze, Keti Dzidziguri, Mariam Şvelidze; suvenir kuklalar və oyuncaqlar - “ARTMAN" qrupu, Valentina İordanişvili, İrma Arçvadze, Manana Abzianidze, Manana Mondodauri, Manana Kipiani, Nana Beitrişvili, Tata Bakradze, Tamar BurduIi; suvenirlər - Aleksandr Qotsi, İra Lavrinenko, “LT Handmade” qrupu, Sofi Etsadaşvili öz əsərlərini təqdim ediblər. Etnoqrafik kuklaların müəllifi Asmat Sagiridze özü ilə 34 əsərini sərgiyə gətirib. Gürcüstanın Beynəlxalq Kukla Sənəti Mərkəzinin direktoru Nana Okruaşvili işlərini şəxsən özü təqdim etdi.
Sərginin açılışının sehrli ab-havası Yeni il bayramını xatırladan və uşaqlığımızın canlanmış kuklalarını təqdim edən, Larisa Tarusovanın rəhbərliyi altında fəaliyyət göstərən “Günay” Uşaq Teatrının gənc aktyorlarının iştirakı ilə yadda qaldı.
Sərgidə təqdim edilən əsərlər kukla sənətinin müxtəlif janrlarına aiddir. Bədii kuklalar, kiçik heykəllər, marionetlər və müxtəlif texnikalarda hazırlanmış hədiyyə kuklalar - geniş “palitra” ilə ecazkar və təkrarolunmaz dünyanın müxtəlifliyini və çoxobrazlılığını göstərəcək ki, həmin dünyanın da qapıları kiçik mələklər tərəfindən ilin sonunadək qonaqpərvərcəsinə açıq olacaq.
Sərgi dekabrın 30-dək davam edəcək.
Bölmənin digər xəbərləri
