Bakıda “İpək Yolu Volqa-Xəzər Dəhlizi Birinci İllik Subregional” mövzusunda beynəlxalq konfrans keçirilib
Bakı, 23 oktyabr, AZƏRTAC
Oktyabrın 23-də Bakıda Mədəniyyət Nazirliyi və UNESCO-nun Ümumdünya İrs Mərkəzinin birgə təşkilatçılığı ilə “İpək Yolu Volqa-Xəzər Dəhlizi Birinci İllik Subregional” mövzusunda beynəlxalq konfrans keçirilib.
AZƏRTAC xəbər verir ki, konfransda ölkəmizlə yanaşı, Qazaxıstan, Türkmənistan, İngiltərə, Yaponiya, Rusiya Federasiyasının Tatarıstan Respublikası və İrandan olan nümayəndələr iştirak ediblər.
Konfrans Azərbaycan Respublikası Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Beynəlxalq və ictimaiyyətlə əlaqələr sektorunun müdiri Pərvanə Vəliyevanın moderatorluğu ilə baş tutub.
P.Vəliyeva konfransın məqsədinin “İpək Yolu Volqa-Xəzər Dəhlizi Transsərhəd Nominasiyası”nın İşçi qrupunun bir hissəsi olan milli əlaqələndiriciləri, yerli və beynəlxalq ekspertləri, Ümumdünya İrs Mərkəzini, Yaponiyanın Tokio Universitetini, Böyük Britaniyanın London Universitet Kollecini və Beynəlxalq Mərkəzi Asiya Araşdırmaları İnstitutunu (IICAS) bir araya gətirmək olduğunu diqqətə çatdırıb.
UNESCO yanında Azərbaycan daimi nümayəndəliyinin rəhbəri, səfir Elman Abdullayev bildirib ki, İpək yolu Azərbaycanda ticarətin və ipəkçiliyin inkişafına güclü təkan verib. “2005-ci ildən etibarən UNESCO-nun Dünya İrs Komitəsinin təşəbbüsü ilə irihəcmli “Transsərhəd İpək Yolu abidələrinin Dünya İrs Siyahısına nominasiyası” proqramı həyata keçirilməkdədir. Azərbaycan Respublikası 2018-ci ildə sözügedən proqrama qoşulub. Bu proqram tarixi İpək yolunun üzərində yerləşən ölkəmizin zəngin mədəni və tarixi irsinin beynəlxalq səviyyədə təbliği, həmçinin abidələrimizin Dünya İrs Siyahısına daxil edilməsi, eləcə də onların qorunmasında mühüm əhəmiyyətə malikdir”, - deyə o qeyd edib.
Konfransda çıxış edən Mədəniyyət nazirinin müavini Fərid Cəfərov keçirilən tədbirin uğurlu olacağına inandığını bildirib. Qeyri-maddi obyektlərin İpək Yolu üzərində mövcud olduğunu deyən nazir müavini Azərbaycanın bu layihələrdə çox fəal olduğunu qeyd edib. O diqqətə çatdırıb ki, mədəniyyətlərarası dialoqun yaxşılaşması üçün bir çox platformalarda ölkəmiz fəal iştirak edib: “Mədəni irsin qorunması, həmçinin bu istiqamətdə görülən işlər ölkə olaraq bizim üçün çox vacibdir”.
Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin rəisi Səbinə Hacıyeva İpək Yolunun çox mühüm əhəmiyyət daşıdığını vurğulayıb: “Bu yol bizi sadəcə ticarət üçün deyil, eyni zamanda, mədəni, iqtisadi sahədə də birləşdirib, xalqları bir-birinə yaxın edib, mədəniyyətləri qovuşdurub”.
Tədbirdə digər çıxış edənlər UNESCO üzrə Azərbaycan Respublikasının Milli Komissiyasının ikinci katibi Emil Əhmədov, Yaponiyanın Azərbaycandakı səfirliyinin müşaviri Takeya Yukihiro və UNESCO-nun Ümumdünya İrs Mərkəzinin Asiya və Sakit Okean Bölməsi üzrə Layihə Mütəxəssisi, professor Roland Lin İpək yolu üzərində olan şəhərlərin tarixindən, mədəni irsin qorunması və tanıdılması istiqamətindəki işlərdən söz açıblar.
Bildirilib ki, Böyük İpək yolu keçdiyi ölkələrin həyatında mühüm rol oynayıb, onların digər ölkələrlə əlaqələrinin inkişafına böyük təkan verib. Həmçinin Şərqdən-Qərbə uzanan İpək yolu vasitəsilə ticarət yollarının əhəmiyyəti getdikcə artıb, Avrasiya məkanında bir-birinin ardınca yaranan böyük dövlətlər arasında dostluq və əməkdaşlıq əlaqələri güclənib.
Sonra UNESCO-nun Ümumdünya İrs Mərkəzinin Asiya və Sakit Okean Bölməsi üzrə Layihə Mütəxəssisi, professor Roland Linin moderatorluğu ilə Birinci İllik Subregional Konfransın məqsədilə bağlı Azərbaycan, İran, Qazaxıstan, Rusiya və Türkmənistanın ekspertlərinin fəaliyyətlərinin gedişatı müzakirə edilib.
Bildirilib ki, tarixi ticarət marşrutları Çin, Yaponiya, Hindistan, Monqolustan, İran, Özbəkistan, Tacikistan, Azərbaycan və digər ölkələrdən keçib. Avropa ölkələrinə əvvəlcə ipək, daha sonra ədviyyat, qızıl, gümüş, mirvari və sair daşınıb. Mövcud olduğu dövrdə Böyük İpək yolu keçdiyi ölkələrin həyatında vacib rol oynayıb. Qədim İpək yolunun bərpası dəniz nəqliyyatını Avropa və Asiya ölkələri arasında tranzit yük axınına malik olan mühüm nəqliyyat vasitəsinə çevirib.
İpək yolunun əsas qolunun Çindən başlayaraq Sin-Kicanqdan, sonra Kaşqardan keçərək Amu-Dəryayadək gəlib çıxdığını, Səmərqənd, Buxara, Mərv, Tus, Damqan, Rey və Qəzvin kimi şəhərlərdən keçdiyini, bir sözlə tarixi imkanları olan İran İslam Respublikasının ərazisinin Orta Asiya ölkələrini, Avropanı İran körfəzindəki cənub limanları ilə birləşdirmək üçün ən əlverişli dəhliz olduğu vurğulanıb.
Konfrans iştirakçıları “İpək Yolu Volqa-Xəzər dəhlizi”nin müəyyənləşdirilməsi və sənədləşdirilməsi layihəsi üzrə iştirakçı ölkələrin əldə etdiyi tərəqqi və onun ayrı-ayrı potensial komponentlərinin konservasiya vəziyyətini nəzərdən keçiriblər.
Qeyd edək ki, bu görüş, həmçinin layihənin ümumi icra planının razılaşdırılması, işçi qrupunun genişləndirilməsinin zərurəti və “İpək Yolu Volqa-Xəzər dəhlizi” Ümumdünya İrsi üzrə namizədlik prosesinin koordinasiya mexanizminin razılaşdırılmasına yönəlib.
Konfrans oktyabrın 26-da yekunlaşacaq.
Bölmənin digər xəbərləri
