BAKIDA PANKRATİON ÜZRƏ DÜNYA KUBOKU YARIŞLARI KEÇİRİLƏCƏKDİR
Bakı, 17 iyun (AZƏRTAC). İyunun 24-25-də Bakı İdman Sarayında
pankration üzrə 3-cü Dünya kuboku yarışları keçiriləcəkdir. Yarışlarda Azərbaycan, Ukrayna, Rusiya, İran, Yaponiya, Uqanda, Türkmənistan, Misir, Bolqarıstan, Latviya, Gürcüstan, Qazaxıstan, Cənubi Amerika, Çin, Yunanıstan, Avstriya, Nepal, Hindistan, Kipr, İngiltərə, Braziliya, Bolqarıstan, İordaniya və Avstraliyadan 150-yə yaxın idmançı iştirak edəcəkdir.
Azərbaycan yığmasının baş məşqçisi Fikrət Bağırovun bildirdiyinə görə, komandamızın tərkibinə 23 kişi və 4 qadın daxil edilmişdir. Yarışlar iki versiya - fulkontakt (tam kontakt) və laytkontakt (yüngül kontakt) üzrə keçiriləcəkdir.
Pankration eramızdan əvvəl 648-ci ildə qədim Olimpiya oyunlarının proqramına daxil edilmişdir. Ən çətin və möhtəşəm idman oyunu olan pankration yarışlarına Olimpiya oyunlarının 4-cü günü başlanırdı və pankration üzrə Oimpiya oyunlarının qalibləri milli qəhrəmanlar hesab edilirdilər. Bu idman oyununun mahiyyəti ondadır ki, iki silahsız atlet güləş, əl və təpik zərbələri, ağrıtörədici və boğucu üsulları tətbiq etməklə döyüşürlər. İdmançılar hər hansı müdafiə avadanlığından istifadə etmirlər. Yunanlar pankrationu gənclərin müharibəyə əlbəyaxa döyüşə hazırlanması üçün gözəl vasitə hesab edirdilər. Görkəmli qədim yunan alimləri Pifaqor, Hippokrat və Aristotel pankration üzrə Olimpiya çempionu olmuşlar.
Dünya kuboku çərçivəsində iyunun 20-22-də məşqçilər və hakimlər üçün beynəlxalq seminar təşkil ediləcəkdir. Seminarı Beynəlxalq Pankration Federasiyası İcraiyyə Komitəsinin üzvləri Viktor Korj (Ukrayna), Evanhelos Koytras (Yunanıstan), Aleksandr Mandrik (Ukrayna) keçirəcəklər.
Bölmənin digər xəbərləri
