Bakıda “Qardaşlığımız əbədidir” adlı rəsm sərgisi açılıb VİDEO
Bakı, 18 dekabr, AZƏRTAC
Dekabrın 18-də Azərbaycan Rəssamlar İttifaqında Şimali Kipr Türk Cümhuriyyətinin Azərbaycandakı nümayəndəliyi, Yeni Azərbaycan Partiyası (YAP) Yasamal Rayon Təşkilatı və Beynəlxalq Qalereyanın birgə təşkilatçılığı ilə “Qardaşlığımız əbədidir” adlı rəsm sərgisi açılıb. Layihənin rəhbəri sənət təşəbbüsləri ilə tanınan Aygün Əzizova olub.
AZƏRTAC xəbər verir ki, sərgidə Azərbaycanın müxtəlif bölgələrindən olan, fərqli yaş qruplarını təmsil edən 200-ə yaxın rəssam iştirak edib. Onların təqdim etdiyi əsərlər həm Azərbaycan, həm də Şimali Kipr Türk Cümhuriyyətinin mədəni irsi, incəsənəti və təbiətinə həsr olunub. Bu rəngarəng sənət nümunələri qardaş xalqların ortaq dəyərlərini və ruhani bağlarını əks etdirirdi.
Tədbiri giriş sözü ilə açan Beynəlxalq Qalereyanın direktoru Elnurə İsgəndərova sərginin hazırlanmasına iki ay vaxt sərf olunduğunu bildirib. O, sərginin məqsədinin gənc nəslin azərbaycançılıq ideologiyası və vətənpərvərlik ruhunda tərbiyə olunması, onların asudə vaxtlarının səmərəli təşkili və sosiallaşmasına dəstək vermək olduğunu vurğulayıb.
Tədbirdə çıxış edən Şimali Kipr Türk Cümhuriyyətinin Azərbaycandakı nümayəndəsi Ufuk Turqaner ölkələrimiz arasındakı əlaqələr barədə məlumat verib.
Diqqətə çatdırıb ki, Şimali Kiprlə Azərbaycan arasında çox güclü bir könül bağı mövcuddur. “Bu bağ kökləri qədim tarixə dayanan, dərin və sarsılmaz bir qardaşlıqdır. Biz bu qardaşlığı daha da möhkəmləndirmək, bu əlaqələri daha güclü etmək üçün kiçik, lakin mənalı bir addım atmaq istədik. Bu gün sərgidə nümayiş olunan əsərlər həqiqətən çox dəyərlidir. Həm peşəkar, həm də həvəskar azərbaycanlı rəssamlar ölkələrimizin təbiətini, mədəniyyətini və sivilizasiyasını əks etdirən əsərlərlə iştirak ediblər”,- deyə U.Turqaner əlavə edib.
Milli Məclisin deputatı Cavanşir Feyziyev qeyd edib ki, digər mədəniyyət xadimlərimiz kimi, rəssamlar da Şimali Kipr Türk Cümhuriyyətinə xüsusi diqqət göstərir, zaman-zaman bu ölkəyə səfər edərək orada əsərlər yaradırlar. Bu əsərlər Azərbaycan rəssamlarının Şimali Kipr haqqında təsəvvürlərinin bədii əksidir. Layihə ölkələrimiz arasında mədəni əlaqələrin güclənməsinə töhfə verməklə yanaşı, Şimali Kiprin turizm potensialının tanıdılması baxımından da əhəmiyyət daşıyır. Növbəti mərhələdə sərginin Şimali Kiprdə keçirilməsi nəzərdə tutulur”.
YAP Yasamal Rayon Təşkilatının sədr müavini Elnarə Mustafayeva vurğulayıb ki, qardaşlıq bağları mənəvi dəyərlərin yüksək səviyyədə təzahürüdür. Onun sözlərinə görə, bu cür sərgilər ölkələrarası əlaqələri möhkəmləndirir və Azərbaycan ilə Şimali Kipr Türk Cümhuriyyəti arasında münasibətlərin inkişafına töhfə verir.
Azərbaycan Rəssamlar İttifaqının sədri, Xalq rəssamı Fərhad Xəlilov və digər çıxışçılar da sərgi barədə fikirlərini bölüşüblər.
Sonra qonaqlar sərgi ilə yaxından tanış olublar.
Tədbirin sonunda iştirakçılara Şimali Kipr Türk Cümhuriyyətinin Azərbaycandakı nümayəndəliyi tərəfindən sertifikatlar təqdim edilib.
Bölmənin digər xəbərləri
