İQTİSADİYYAT
BAKIDA TRASECA-NIN NÖVBƏTİ KONFRANSI İŞƏ BAŞLAMIŞDIR
Nəqliyyat naziri Ziya Məmmədov konfransı açaraq bu tədbirin məqsədi barədə məlumat vermiş və Azərbaycan Prezidenti Heydər Əliyevin tövsiyə və tapşırıqlarına uyğun olaraq, beynəlxalq nəqliyyat dəhlizlərinin işinin ahəngdar qurulması üçün həyata keçirilən tədbirlərdən danışmış, respublikamızdan keçən beynəlxalq nəqliyyat dəhlizləri ilə daşınan yüklərin ilbəil artdığını vurğulamış və ölkəmizin geniş tranzit imkanlarına malik olduğunu bildirmişdir.
Konfransın gündəliyinə TRASECA və Beynəlxalq Dəmir Yolu Birliyi arasında qarşılıqlı anlaşma memorandumu; TRASECA -da təmsil olunan dövlətlərin dəmir yolu, liman və su nəqliyyatı təsərrüfatlarının birgə bəyannaməsi; Bakı multimodal (qarışıq) daşınmalar üzrə fəaliyyət proqramının müzakirəsi daxildir.
TRASECA Hökumətlərarası Komissiyası Daimi Katibliyinin baş katibi Abdurəşid Tahirov və Beynəlxalq Dəmir Yolu Birliyinin baş direktoru Filipp Rumeqer beynəlxalq nəqliyyat dəhlizlərinin inkişafında Azərbaycanın rolunu və həyata keçirdiyi tədbirləri yüksək qiymətləndirmişlər.
Abdurəşid Tahirov və Filipp Rumeqer qarşılıqlı anlaşma memorandumunu imzaladıqdan sonra gündəlikdə duran ikinci məsələnin -birgə bəyannamənin müzakirəsinə başlanılmışdır. Konfrans iştirakçıları bəyannamə layihəsi ilə bağlı fikir və mülahizələrini bildirmiş, müxtəlif təkliflər irəli sürmüşlər.
Konfrans iyulun 18-də öz işini davam etdirəcəkdir.
Bölmənin digər xəbərləri
