“Baku Fires” və “Astana Arlans” boks komandalarının heyəti açıqlanıb
Bakı, 3 mart, AZƏRTAC
Ölkəmizi Dünya Boks Seriyası (WSB) liqasında təmsil edən “Baku Fires” klubu martın 4-də növbəti görüşünə çıxacaq.
AZƏRTAC xəbər verir ki, komandamız Boks Mərkəzində ötən mövsümün qalibi “Astana Arlans”la qarşılaşacaq. Qazaxıstan təmsilçisi hazırda üç xalla qrupda üçüncü yeri tutur. Hesabında altı xal olan “Baku Fires” isə qrupda ikinci pillədədir.
“Baku Fires” və “Astana Arlans” komandalarının heyəti artıq məlumdur. Belə ki, Məhəmməd İbiyev (“Baku Fires”, 52 kq) Oljas Sattibayev (“Astana Arlans”), Nəsrəddin Məmmədov (60 kq) Zakir Safiullin, Tamerlan Abdullayev (69 kq) Aslanbek Şıybergenov, Mixail Dalqalivets (81 kq) Nurdaulet Jarmanov, Arslanbek Mahmudov (91 kq-dan yuxarı) isə Nurjan Bekzatov ilə qarşılaşacaq.
N.Məmmədov cari mövsümdə komandamızın heyətində ilk döyüşünə çıxacaq. Ancaq N.Məmmədov ötən il iki dəfə WSB liqasında rinqə çıxaraq, görüşlərdən birində qalib gəlib. Onun rəqibi Qazaxıstanın ən güclü boksçularından olan Z.Safiullin 2015-ci ilin Asiya çempionatının gümüş mükafatçısıdır. Odur ki, bu qarşılaşma boksçumuz üçün çox çətin olacaq.
AİBA Pro Boxing turnirindən təcrübəsi olan Tamerlan Abdullayev isə bu mövsüm ilk dəfə WSB liqasında rinqə çıxacaq. Onun rəqibi 2015-ci ilin iyununda kubalı Roniel İqlesias üzərində qələbə qazanaraq, diqqət mərkəzinə düşən A.Şıybergenovdur.
M.İbiyev “Astana Arlans”ın ən təcrübəli üzvlərindən biri O.Sattibayev ilə üz-üzə gələcək. Qazaxıstan boksçusu WSB liqasında 7 döyüşdən 5-də qalib gəlib. O, son dünya çempionatının gümüş mükafatçısı Yosbani Veitia üzərində qələbə qazanmaqla, potensialını ortaya qoyub.
“Astana Arlans” ötən tur səfərdə “Uzbek Tigers”ə 1:4 hesabı ilə məğlub olub. Qazaxıstan təmsilçisi bu səbəbdən Bakıda qələbə qazanmaq üçün əlindən gələni edəcək.
Bölmənin digər xəbərləri
