“Baku stars” voleybol komandası birinci liqa yarışlarının qalibi olub
Bakı, 4 aprel, AZƏRTAC
Qadın voleybolçular arasında Azərbaycan çempionatının birinci liqasının 2017/2018-ci il mövsümünə yekun vurulub.
AZƏRTAC xəbər verir ki, 9 komandanın iştirakı ilə təşkil olunan yarışın qalibi adını “Baku stars” qazanıb. Belə ki, yığmanın sabiq üzvlərindən Alla Həsənova, Yelena Parxomenko və Şəfəq Kərimovanın yer aldığı komanda finalda “İqtisadçı” ilə üz-üzə gəlib. Gərgin idman mübarizəsi şəraitində keçən qarşılaşmanın taleyinə tay-brekdə aydınlıq gəlib. Daha təcrübəli voleybolçulardan təşkil olunan “Baku stars” 3:2 hesabı ilə qalib gəlib və yarışın qızıl medallarına yiyələnib.
Üçüncü yer uğrunda qarşılaşma da gərgin alınıb. “Azərreyl-2”- “Dəmiryolçu” matçında ikincilər daha dəqiq oynayıblar. Onlar debüt mövsümündəcə birinci liqanın bürünc medallarına sahib olublar.
Beləliklə, 4 ay davam edən çempionatda ilk üçlüyü müvafiq olaraq, “Baku stars”, “İqtisadçı” və “Dəmiryolçu” tutub.
Mükafatlandırma mərasimində Azərbaycan Voleybol Federasiyasının birinci vitse-prezidenti Faiq Qarayev, vitse-prezident Vəsilə Abulova və veteran idmançı Elmira Ağakişiyeva iştirak ediblər.
Bölmənin digər xəbərləri
