Balakəndə iki dildə təlim-tərbiyə verən uşaq bağçasından reportaj VİDEO
Balakən, 10 sentyabr, AZƏRTAC
Azərbaycan multikultural dəyərləri, tolerantlığı ilə dünyada nümunə göstərilir. Balakən, Zaqatala və Qax rayonları çoxmillətli xalqların birlik və bərabərlik şəraitində yaşadığı bölgələrimizdəndir. Bu rayonlarda yaşayan xalqların folkloru və etnoqrafiyası ilə yanaşı, dillərini də inkişaf etdirmək üçün kifayət qədər imkan və şərait yaradılıb.
AZƏRTAC-ın bölgə müxbiri xəbər verir ki, elə şimal-qərb qapımız Balakənin timsalında da bunu görmək olar. Əməkdaşımız rayonda ingiloyların sıx məskunlaşdığı İtitala kəndində iki dildə təlim-tərbiyə verən uşaq bağçasında olub.
İtitala kəndində yerləşən şəhid Manaf Umuxanov adına körpələr evi-uşaq bağçasında iki dildə təlim-tərbiyə verilir. Burada yay təlim məşğələlərinə səhər tezdən başlanılır. Kəndin bir özəlliyi də ondan ibarətdir ki, böyüklər kimi, balacalar da velosipeddən istifadəyə üstünlük verirlər. Bu isə onların ilkin yaş dövründən sağlam böyüməsinə şərait yaradır.
Uşaq bağçalarında yay məşğələləri hər zamankı kimi maraqlı keçir. Çünki uşaqlar həyətdə tək stol arxasında oturmur, həm də müxtəlif oyunlara cəlb edilirlər.
Balacaların müxtəlif bilik və intellektual oyunlara cəlb edilməsi, mahnı və rəqslər ifa etməsi daha çox zəhmət və əziyyət tələb edir. Bu işdə qrupun tərbiyəçi müəlliminin üzərinə daha çox yük düşür.
Tərbiyəçi-müəllim Albina Mustafayeva yay planına uyğun olaraq uşaqlar üçün hər gün əyləncəli məşğələlər təşkil edildiyini, onların intellektinin daha yaxşı inkişaf etməsinə çalışdıqlarını bildirir. “Bağçamız bu yaxınlarda təmir edilib, bizim üçün daha əlverişli imkanlar yaradılıb, gözəl avadanlıqlarla təmin olunmuşuq”, - deyən tərbiyəçi-müəllim daha sonra qrupundakı uşaqlarla birlikdə növbəti intellektual oyuna başlayır.
Müəssisə fəaliyyətə başlayan gündən burada iki dildə təlim-tərbiyə verilir - Azərbaycan və gürcü dillərində. Qruplarda uşaqlar çoxdur, onların təlim-tərbiyəsi ilə məşğul olanlar isə təcrübəli mütəxəssislərdir.
Əsaslı təmir olunaraq fidanların istifadəsinə verilən uşaq bağçasının divarlarındakı rəsmlər diqqətimizi çəkir. Bağçanın müdiri Səlimət İsayeva deyir ki, bu rəsmləri tərbiyəçi-müəllimlər və texniki heyət öz əlləri ilə çəkiblər. Səlimət müəllimə sözlərinə onu da əlavə edir ki, kollektiv yeni təlim ili başlayana kimi divarlarda daha bir neçə iri dekorasiya və nağıllara aid illüstrasiya çəkməyi planlayır.
“Bağçamız 1988-ci ildən fəaliyyət göstərir. Yaxın zamanlarda əsaslı təmir olunub. Bu müəssisə 55 yerlikdir və üç qrupumuz var – bir körpələr və iki böyüklər qrupu. Böyüklər qrupundan biri də gürcü dilindədir”, - deyə o əlavə edir.
Azsaylı xalqların dilinin, dinin, təhsil və mədəniyyətinin inkişafına hər zaman dəstək olan dövlətimiz ucqar İtitala kəndində sakinlər üçün lazımi infrastruktur da yaradıb. Burada insanların sosial qayğıları diqqətdə saxlanılır. Kənddə müasir məktəb, mədəniyyət evi fəaliyyət göstərir, eləcə də digər infrastruktur yenidən qurulub.
Bölmənin digər xəbərləri
