Balkan ölkələrinin mətbuatı: Azərbaycanda tətbiq olunan innovativ yeniliklər digər ölkələrə nümunə ola bilər
Podqoritsa, 4 avqust, AZƏRTAC
Zəruri profilaktik tədbirlər görülməzsə, COVID-19 kənd təsərrüfatına geniş və uzunmüddətli mənfi təsir göstərə bilər. Azərbaycan dövləti pandemiyanın yaratdığı fəsadların qarşısını almaq üçün bütün lazımi tədbirləri həyata keçirib və bu istiqamətdə fəaliyyətlər uğurla davam etdirilir.
AZƏRTAC xəbər verir ki, bu fikirlər Bosniya və Herseqovina, Monteneqro və Albaniya mətbuatında əksini tapıb.
Məqalələrdə bildirilib ki, müsəlman dünyasında qeyd olunan Qurban bayramı ərəfəsində koronavirusa yoluxmanın qarşısını almaq üçün insanların bir araya toplaşmasına nəzarət etmək çox vacibdir. Karantin dövrünün qaydaları ilə bağlı yaranan çətinliklərlə əlaqədar olaraq, Azərbaycanın Kənd Təsərrüfatı Nazirliyi satış nöqtələrində insanların sıxlığının qarşısını almaq məqsədilə qurbanlıq qoyunların onlayn satışı üçün veb-sayt istifadəyə verib. Veb-sayt insanlara kəsilmiş qurbanlıqları satış nöqtələrindən götürmə vaxtlarını və məkanını asanlıqla seçməyə imkan yaradıb. Sifarişlərə əsasən qoyunlar İslam qaydalarına uyğun kəsilib. Vətəndaşlar qurbanlıq qoyunları göstərilən vaxtda seçdikləri məkandan çox tez və asanlıqla götürə biliblər. Bu veb-sayt əsasən yerli istifadə üçün nəzərdə tutulduğundan, yalnız Azərbaycan dilində təqdim olunub.
Yazılarda vurğulanıb ki, bu addımlar gələcəkdə də sağlamlığın, infeksiyalardan qorunmağın və ekoloji qaydalara əməl etmə baxımından digər ölkələrə nümunə ola bilər.
Məqalələrdə, həmçinin dövlət xidmətlərinin bir mərkəzdən təqdim olunduğu “ASAN xidmət”dən də söz açılıb. Diqqətə çatdırılıb ki, onlayn formada təqdim edilən bu model dövlət xidmətlərinin göstərilməsi baxımından unikallığına görə fərqlənir və beynəlxalq aləmdə təqdir olunur.
Aygün Əliyeva
AZƏRTAC-ın xüsusi müxbiri
Podqoritsa
Bölmənin digər xəbərləri
