Bakı, 17 iyul, AZƏRTAC

Azərbaycan Banklar Assosiasiyasına (ABA) üzv banklar ölkəmizin iqtisadi inkişafının əsas drayveri olan real sektorun maliyyələşdirilməsi, habelə qiymətli kağızlar bazarının genişləndirilməsi istiqamətində davamlı və ardıcıl fəaliyyətlər göstərir.

ABA-dan AZƏRTAC-a bildirilib ki, “SOCAR Polymer Investments” şirkətinin “SOCAR Polymer” layihəsinin maliyyələşdirilməsi məqsədilə bu ilin iyul ayında emissiya etdiyi 200 milyon dollar məbləğində istiqrazlara "Azərbaycanın Beynəlxalq Bankı", "Bank of Baku", "Xalq Bank", "Kapital Bank", "Bank Respublika", "Rabitəbank", "PAŞA Bank" və "Ziraat Bank" tərəfindən investisiya edilib. Bu istiqrazların tədavül müddəti 5 il, istiqrazlar üzrə faiz dərəcəsi isə illik 5 faizdir. İstiqrazların buraxılışı Mərkəzi Bank tərəfindən iyunun 19-da qeydiyyata alınıb və istiqrazlar birjadankənar bazarda tam həcmdə yerləşdirilib.

Layihəyə ümumilikdə 864 milyon dollardan çox investisiya edilib. Ölkədə qeyri-neft sektorunda ilk dəfə olaraq “Layihə maliyyələşdirilməsi” prinsipi əsasında layihə xərclərinin təqribən 60 faizini əhatə edən 489 milyon ABŞ dolları həcmində “Qazprombank”dan kredit cəlb edilib. “SOCAR Polymer”in maliyyələşmə strategiyasının növbəti mərhələsi çərçivəsində hazırkı borcun bir hissəsinin daha aşağı faizli borcla yenidən maliyyələşdirməsinə başlanılıb. Banklar tərəfindən ayrılan vəsait “SOCAR Polymer”in maliyyə portfelinin optimallaşdırılması məqsədilə "Qazprombank" SC-dən cəlb edilmiş kredit vəsaitinin bir hissəsinin yenidən maliyyələşdirilməsinə sərf olunub. Bu, “SOCAR Polymer”ə daha sərfəli maliyyə resursları hesabına layihə xərclərini azaltmağa şərait yaradacaq.

Qeyd edək ki, “SOCAR Polymer” son 40 il ərzində ölkəmizin neft-kimya sənayesində həyata keçirilən birinci irimiqyaslı layihədir. Azərbaycanın kimya sənayesinin inkişafının sürətləndirilməsi məqsədi daşıyan layihənin əsası 2013-cü ildən qoyulub. Şirkətin istehsalat obyektləri Sumqayıt Kimya Sənaye Parkının ərazisində yerləşən polipropilen və yüksəksıxlıqlı polietilen istehsal edən iki zavoddan ibarətdir. Zavodlar müvafiq olaraq 2018-ci və 2019-cu ildə istismara verilib. Bu layihənin uğurlu nəticələrinin Azərbaycan sənayesinin bir çox əhəmiyyətli sektorunda multiplikasiya effekti yaradaraq çoxsaylı yeni iş yerlərinin açılmasını təmin edəcəyi gözlənilir.

Məlumdur ki, real sektorda fəaliyyət göstərən dövlət və özəl şirkətlərin mühüm maliyyələşmə formalarından biri də onlar tərəfindən buraxılan qiymətli kağızlara investisiya edilməsidir. Mərkəzi Bank tərəfindən real sektorun kapital bazarı vasitəsilə maliyyələşməsinin təşviqi və kapital bazarında aparılan islahatlar nəticəsində yaxın gələcəkdə kapital bazarı vasitəsilə maliyyələşmə templərinin artacağı gözlənilir.

Azərbaycan Banklar Assosiasiyasına üzv banklar qarşıdakı dövrdə də ölkədə fəaliyyət göstərən şirkətlərin, eləcə də iqtisadi artıma və yeni iş yerlərinin yaradılmasına töhfə verəcək perspektivli layihələrin maliyyələşdirilməsi istiqamətində fəaliyyətlərini aktiv şəkildə davam etdirəcək.