Banqladeş parlamenti buraxıldı
Bakı, 6 avqust, AZƏRTAC
Banqladeş Prezidenti Şahabuddin Çuppu Baş nazir Şeyx Hasinanın istefasından sonra parlamentin də buraxılmasına dair qərar imzalayıb.
AZƏRTAC xəbər verir ki, bu barədə məlumat dövlət başçısının administrasiyasının yaydığı press-relizdə yer alıb.
“Prezident silahlı qüvvələrin üç qolunun rəhbərləri, müxtəlif siyasi partiyaların sədrləri, vətəndaş cəmiyyəti nümayəndələri və “Tələbələr ayrı-seçkiliyə qarşı” hərəkatının liderləri ilə görüşündən sonra parlamentin buraxılması haqqında qərar qəbul edib”, - deyə press-relizdə bildirilir. Yeni parlament seçkilərinin tarixi isə hələ açıqlanmayıb.
“Tələbələr ayrı-seçkiliyə qarşı” hərəkatının liderləri isə özlərinin formalaşdıracağı Nazirlər Kabinetindən başqa heç bir hökuməti qəbul etməyəcəklərini bildiriblər.
Nobel Sülh Mükafatı laureatı Məhəmməd Yunisin keçid hökumətində aparıcı rol oynayacağı gözlənilir. Həmçinin müvəqqəti hökumətə banqladeşli yazıçı, alim, müəllim və ictimai xadim Səlimullah Xan və Dəkkə Universitetinin hüquq professoru, Asif Nəzrul da başçılıq edə bilər.
Bu arada, Banqladeş Sərhəd Təhlükəsizlik Qüvvələri qeyri-qanuni sərhəd keçidlərinin qarşısını almaq üçün yüksək hazırlıq vəziyyətinə gətirilib. “The Daily Star” qəzetinin məlumatına görə, ölkədə nəzarəti ələ alan ordu son günlərədək hakimiyyətdə olan “Avami Liqası” partiyasının bir çox üzvünün hökumətin devrilməsindən sonra xarici ölkələrə qaçmasının qarşısını almaq məqsədilə təhlükəsizlik tədbirlərini gücləndirib.
Bölmənin digər xəbərləri
