Bakı, 6 avqust, AZƏRTAC

Banqladeş Silahlı Qüvvələrinin Baş qərargah rəisi general Vaker-Uz-Zaman Baş nazir Şeyx Hasinanın istefasından sonra bütün partiyalarin təmsil olunduğu müvəqqəti hökumətin formalaşdırıldığını elan edib.

AZƏRTAC xəbər verir ki, bu barədə “Daily Pakistan” qəzeti məlumat yayıb.

“Müvəqqəti hökumətin formalaşdırılması qərarı bütün siyasi partiyalarla müzakirələrdən sonra qəbul edilib. Nazirlər Kabinetinin fəaliyyəti və ölkədəki vəziyyətin normallaşdırılması üzrə tədbirlərlə bağlı ölkə Prezidenti Şahabuddin Çuppu ilə məsləhətləşmələr aparılır”, - deyə Vaker-Uz-Zaman xalqa müraciətində bildirib. Onun sözlərinə görə, bundan sonra ölkə ilə bağlı bütün qərarlar ordu tərəfindən veriləcək.

Ölkədəki zorakılıqlara son qoyulmasına çağıran Baş qərargah rəisi, həmçinin müvəqqəti administrasiyanın etirazlar zamanı baş verən bütün ölüm hallarının araşdırılmasında ədaləti təmin edəcəyinə vəd verib.

Bir müddət öncə, Banqladeş Prezidenti Şahabuddin Çuppu ölkə sakinlərinə televiziya ilə müraciət edib. O, eyni zamanda 2018-ci ildə rüşvət ittihamı ilə həbs olunan, lakin bir ildən sonra səhhətinin pisləşməsi ilə əlaqədar xəstəxanaya köçürülən müxalif millətçi partiyanın sədri Bequm Xaledu Ziyanın dərhal həbsdən azad edilməsi barədə göstəriş verib.

Qeyd edək ki, iyulun əvvəlində Banqladeşdə kütləvi etirazlar başlayıb. Əvvəlcə dinc xarakterli aksiyalar sonradan 350-dən çox insanın ölümü ilə nəticələnən iğtişaşlara çevrilib. Hüquq-mühafizə orqanları hadisələrlə əlaqədar minlərlə fəalı həbs edib.

Bazar günü tələbə hərəkatının hakimiyyətlə əməkdaşlıqdan imtina etməsindən sonra paytaxt Dəkkədə və bütün ölkə ərazisində etiraz və nümayişlərin yeni dalğası başlayıb. Şeyx Hasina iğtişaşlar fonunda istefa verərək paytaxt Dəkkədəki rəsmi iqamətgahını tərk edib.