Baş katib: Qlobal Cənub QHT Platforması beynəlxalq təsir mexanizminə çevriləcək
Bakı, 15 may, AZƏRTAC
Qlobal Cənub QHT Platformasının Baş Katibliyinin Azərbaycana həvalə olunması ölkəmizin beynəlxalq dialoqda artan rolunu və Qlobal Cənub ölkələrinin bizə olan etimadını bir daha nümayiş etdirir. Əlbəttə ki, üzvlərimiz Prezident İlham Əliyevin keçən il təsis konfransında səsləndirdiyi çıxışı və “Azərbaycana hər zaman güvənə bilərsiniz!” fikrini dərindən hiss etdiklərini göstərmiş olurlar. Platformamız Braziliyadan Almaniyaya, Keniyadan Efiopiyaya qədər geniş coğrafiyanı əhatə edən çoxsaylı beynəlxalq tədbirlər həyata keçirib. Üzvlərimiz son bir il ərzində bizə etimad göstərərək növbəti beş il üçün rəhbərliyi bizə həvalə ediblər. Görünür ki, dünyanın müxtəlif ölkələrindən olan üzvlərimiz Azərbaycan Milli QHT Forumunun İdarə Heyətinin sədri Ramil İskəndərlinin rəhbərliyi ilə son bir ildə görülən işləri yüksək qiymətləndiriblər.
Bu fikirləri AZƏRTAC-a açıqlamasında Qlobal Cənub QHT Platformasının yeni seçilmiş Baş katibi Fuad Kərimli deyib.
Platformanın ilk Baş Assambleyasının Dünya Şəhərsalma Forumunun 13-cü Sessiyasının (WUF13) ərəfəsində keçirilməsinin xüsusi əhəmiyyət daşıdığını deyən Baş katib bildirib ki, Qlobal Cənub QHT Platforması WUF13 çərçivəsində şəhərsalma çağırışlarının müzakirəsi və Azərbaycanın “ağıllı şəhər” təcrübələrinin paylaşılması üçün mühüm platformadır.
“Dünya Şəhərsalma Forumunun 13-cü Sessiyası (WUF13) Qlobal Cənub QHT Platforması üçün xüsusi əhəmiyyət daşıyan bir tədbirdir. Bu, UN-Habitat tərəfindən Qlobal Cənub QHT Platformasına göstərilən dəstəyin də bariz təzahürüdür. Belə ki, “Urban Expo” çərçivəsində bizə 78 kvadratmetrlik pavilyon ayrılıb. Bunu bizə olan diqqətin və etimadın göstəricisi hesab edir, təşəkkürümüzü bildiririk. Burada biz Qlobal Cənubdan olan QHT-lərə sürətli şəhərsalma prosesinin doğurduğu çağırışlara dair həll yollarının müzakirəsi üçün bir platforma təqdim edəcəyik. Qlobal Cənub bir çox istiqamətlərdə Qlobal Şimal ilə müqayisədə daha ciddi sosial və infrastruktur təzyiqləri ilə üzləşir. Şəhərləşmə də bu problemlərdən biridir. Biz beynəlxalq tərəfdaşlarımıza Azərbaycanın bölgələrində tətbiq olunan “ağıllı şəhər” nümunələrini təqdim etməyi planlaşdırırıq. Bu təcrübələrin onların öz ölkələrində gələcək layihələr üçün faydalı bir model kimi istifadə olunacağına inanırıq”, - deyə Baş katib qeyd edib.
Onun sözlərinə görə, Qlobal Cənub QHT Platforması üzvlərin səslərini beynəlxalq səviyyədə gücləndirməyi və növbəti illərdə bunu əsas qlobal təsir mexanizminə çevirməyi hədəfləyir.
“Qlobal Cənub QHT Platforması olaraq üzvlərimizin səsini daha güclü şəkildə eşitdirmək üçün bütün imkanlarımızı səfərbər etməyə qərarlıyıq. Biz bunu onların mövqelərinin beynəlxalq tədbir və konfranslarda ifadə olunması, eləcə də Qlobal Cənubla bağlı ümumi məsələlərin gündəminin formalaşmasına töhfə verən alternativ hesabatlar və tədqiqatlar hazırlamaqla həyata keçirəcəyik.
Növbəti beş il üçün əsas hədəfimiz platformanı Qlobal Cənubda fəaliyyət göstərən yerli təşkilatların fikirlərini beynəlxalq siyasi dairələrin ən yüksək səviyyələrinə daha effektiv şəkildə çatdıran ən nüfuzlu mexanizmlərdən birinə çevirməkdir. Eyni zamanda, platformanın yaradılması təşəbbüsünün Azərbaycanın yerli QHT-ləri və Qlobal Cənubdan olan beynəlxalq tərəfdaşlar tərəfindən irəli sürülməsini xüsusi qürurla qeyd edirik. Bu təşəbbüs ölkəmizin qlobal proseslərdə müasir, dayanıqlı və aparıcı mövqeyini daha da möhkəmləndirən mühüm göstəricidir”, – deyə F.Kərimli vurğulayıb.
Müxbir – Ceyhun Xəlilov
Bölmənin digər xəbərləri
