DÜNYA
Bayden əmindir ki, respublikaçıların prezidentliyə namizədi Tramp olacaq
Bakı, 24 yanvar, AZƏRTAC
Nyu-Hempşir ştatında keçirilən ilkin seçkilərin nəticələri Amerikanın sabiq lideri Donald Trampın Respublikaçılar Partiyasından prezidentliyə namizəd olacağını göstərir.
AZƏRTAC xəbər verir ki, bu barədə ABŞ Prezidenti Cozef Baydenin seçki qərargahının yayımladığı bəyanatda deyilir.
“Donald Trampın Respublikaçılar Partiyasından prezidentliyə namizəd olacağı aydındır”, - deyə bəyanatda bildirilir. ABŞ liderinin sözlərinə görə, amerikalıların şəxsi azadlıqları və ölkədəki iqtisadi vəziyyət seçkilərin nəticəsindən asılı olacaq.
Cozef Bayden seçkilərdə təkcə demokratların deyil, bəzi respublikaçıların, həmçinin heç bir partiyanın tərəfdarı olmayan sadə vətəndaşların da dəstəyinə ümid etdiyini vurğulayıb.
Donald Tramp yanvarın 23-də Nyu-Hempşirdə respublikaçıların praymerizində yeganə rəqibi Nikki Heyli üzərində qələbə qazanıb.
Xatırladaq ki, ABŞ-da növbəti prezident seçkiləri 2024-cü ilin noyabrına təyin olunub. Aprelin 25-də Cozef Bayden yenidən dövlət başçısı seçilmək üçün çalışacağını deyib, Donald Tramp isə ötən ilin noyabrında prezident postu uğrunda mübarizəyə başladığını elan edib.